Дүйсенбі күні, 15 сәуірде, елу шақты көп балалы ана Еңбек және халықты әлеуметтік қорғау министрлігіне тағы келді, деп хабарлады «Азаттық». Аналардың қойған басты талабы – көп балалы отбасылардың баспана мәселесін шешу.
Наразылар биліктен алғашқы жарнасыз үй алуға болатындай жеңілдік жасауды талап ететіндерін айтқан. Аналармен кездесуге еңбек және халықты әлеуметтік қорғау вице-министрі Светлана Жақыпова шықты. Вице-министр келген соң, аналар отбасы табысын есептеу кезінде зейнетақыны отбасы кірісі деп санауға наразылық білдірді. Жақыпова аналар талабын тыңдауға уәде етіп, «қажет болса, өтініштеріңізді өзім қабылдаймын» деді.
Ал бұған дейін – 11 сәуірде Нұр-Сұлтанда тағы да ондаған көп балалы ана наразылық танытқан еді. Олар алдымен Еңбек және халықты әлеуметтік қорғау министрлігіне, кейін мәжіліске барды. Аналар атаулы әлеуметтік көмек аларда қиындыққа тап болғандарын айтып шағымданды.
Наразылар «21 мың теңге көлеміндегі жәрдемақы тұрмыс жағдайына қарамай, әрбір балаға берілуі керек, көп балалы отбасыларды баспанамен қамту қажет» деген талаптарын айтты.
Еске салсақ, осы жылы әлеуметтік жағдайы нашар отбасыларға берілетін жәрдемақы, яғни атаулы әлеуметтік көмекке мемлекет тарапынан өзгерістер енгізілген еді. Республика бойынша 20 789 теңге, Алматы қаласы бойынша 21 172 теңгеден берілетін бұл көмекті кімдер қалай алады? Бұл көмекті алу үшін не істеу керек? Осы сынды сұрақтарға жергілікті билік нақты жауап бере алмауда.
Бұған дейін бірқатар ақпарат агенттіктері 2019 жылдың қаңтар-ақпан айларында Қазақстанда 615 нәресте шетінеп кеткенін хабарлады. Былтыр бұл кезеңде өлген бала саны 587 еді. Бала өлімі былтырғымен салыстырғанда 4,8 пайызға өскен.
«D»