Жойқын жарылыстан соң, Арыстан тарап жатқан хабарлар соғыс алаңынан жеткен суыт хабарларға ұқсайды. Кеше жарылыс салдарынан тағы бір адам қайтыс болды.
Сонымен қаза болғандар аны әзірге үшеуге жетті. Шымкенттегі облыстық аурухана, балалар ауруханасы мен қалалық аурухананың жансақтау (реанимация) бөлімінде 15 адам жатыр. Жарылыс салдарынан жалпы 165 адам зардап шеккен, 89 жаралы ауруханада жатыр. Ішкі істер министрлігі таратқан ақпарат бойынша, Арыс қаласынан шамамен 41 мың халық эвакуацияланған. Қазір қаланың төңірегі толық қоршауға алынып, қалаға кіруге тиым салынған. Арнайы саперлік әскери бөлімдер жарылмай қалған снарядттарды залалсыздандыру ісімен айналысу үстінде.
«Әскерилер Арыстың 16 көшесінен 70 жарылмаған снаряд жинады. Көптегені үйлерде жатыр. Қазір қалаға келудің қажеті жоқ, тіпті құжаттарды алу үшін де», – деп хабарлады кеше Түркістан облысы әкімінің кеңесшісі Сәкен Қалқамановтың сөзіне сілтеме жасаған «Азаттық».
«Арыстағы жарылыстан соң, қаланың 350-ден аса тұрғыны әлі табылмай жатыр» деп, қалалық Төтенше жағдай департаментіне сілтеме жасап, Otyrar.kz сайты хабарлады. Шымкент қалалық төтенше жағдайлар департаментінің ішкі және сыртқы коммуникациялар тобы жоғалғандар тізіміндегі үш адам табылғанын мәлімдеді.
«Шымкентте қырықтан аса эвакуациялық пункт жұмыс істеп жатыр. Департамент дерегінше, онда 4 880 адам орналастырылған. Оның 2 428-і – бала. Арыстықтардың көбін туыстары әкетіп жатыр. Ресми дерек бойынша, Шымкентке тіркелгендердің жалпы саны – 20 371. Арыстан көшірілгендердің кейбірі «биліктен көмек жоғын» айтып шағынған» деп хабарлайды «Азаттық».
Қазақта «апат /ажал/ айтып келмейді» деген сөз бар. Бірақ Арыстағы апат «айтып келді». Бұл жөніндегі мәселенің егжей-тегжейін газеттің 5-бетінде жарияланған «Арыс полигоны апат сеуіп тұр» деген мақаладан оқисыздар.
Бет қатталып жатқанда, біздің тілшіміз телефон арқылы мақала ауторы Әуелхан Назарқасымұлына хабарласты.
«Мен Арыстан ешқайда кеткен жоқпын, үйде жатырмын, – деді Әуелхан мырза. – Бүгін (26 маусым) Арыста 42 градус ыстық. Үйім әскери полигоннан қашық емес. Түнде бір жарылыс болды, таңғы 9-да тағы бір жарылысты естідім. Алғаш жарылыстың дүмпуі басталған күні суретке түсірейін деп, желдеткішті ашып едім, жарылыстың күші өзімді қалпақтай ұшырды. Қоймаға жақын тұратындардың не жаны қалғаны кім білсін? Елмен бірге, қаланың сыртына шыққан едім, балама үйде қалған құжаттары керек болған соң, кері қарай қалаға келдік. Қаланың кіре берісінде екі жерде әскери күзет тұр екен, жібермейді. «Блокпостан» өте алмай, келген себебімізді түсіндіріп, әрең өттік. Көшеде екі сапер кетіп бара жатыр екен, аулада снаряд бар-жоғын сұрады».
«D»
