- Ресейдің ел астанасындағы елшілігі алдында жалғыз адамдық пикет өткізбек болып, әкімшілік жазаға тартылған қарағандылық зейнеткер азамат Айтқожа Фазылов (суретте) сот шешіміне байланысты Жоғарғы сотқа шағым түсіру үшін құжат әзірлеп жатыр. 30 желтоқсанда апелляциялық сот оның шағымын қанағаттандырмаған еді.
Желтоқсан айының ортасында Айтеке ақсақал Ресей думасы депутаттарының Қазақстанның елі мен жерінің тұтастығына қауіп төндіріп жасаған мәлімдемелеріне наразылық білдіріп, елшілік алдында пикет өткізбек болған. Алайда оны астанаға бара жатқан жолда полиция ұстап, Әкімшілік кодекстің 488-баптағы 4-тармағы («Бейбіт жиын өткізу тәртібін бұзу») бойынша хаттама толтырылып, 50 айлық есептік көрсеткіш көлемінде (139 мың теңгеге жуық) айыппұл салған болатын.
«Азаттықтың» хабарлауы бойынша, бірінші инстанциядағы сот Айтқожа Фазыловты қаланың өзге де тұрғындарын бейбіт жиынға қатысуға шақырып, заңды бұзған деп айыптаған. Ал Фазылов Ресей думасы депутаттарының мәлімдемесімен келіспейтінін көпшіліктің көзінше жария еткісі келгенін, әлеуметтік желідегі хабарламасы бірінші кезекте ақпарат құралдарына арналғанын айтқан.
Сот қаулысында Фазылов астаналық жергілікті атқару органына ескерту тапсырмай, осылайша «бейбіт жиын ұйымдастыру тәртібін бұзды» деп жазылған. Ал Айтекең ақсақал әкімдіктің «Facebook»-тағы аккаунтында ескерту қалдырғанын айтады.
«Билікті бұл жөнінде хабардар еттім, олар біледі. Сол себепті де мені ұстады. Айыппұл көлемі зейнетақымнан да көп. Әкімшілік сотқа тарту қазақстандықтардың патриоттық сезімін, туған елге, жерге деген махаббатын жояды. Тоқаевтың өзі жария түрде тойтарыс беру керек деп айтты емес пе?! Менің де солай істегім келген…» – деді Айтқожа Фазылов «Азаттық» тілшісіне.
Біздің газет Айтқожа Фазыловқа қатысты осы әкімшілік істің барысын бақылауға алатын болады.
ҚАЗАҚ ТІЛІ ТУРАЛЫ
ПАРЫЗ БЕН ҚАРЫЗ
- «Қазақ тілін білу – әр қазақстандықтың парызы» деп жазды президент Қасым-Жомарт Тоқаев «Егемен Қазақстан» газетіндегі «Тәуелсіздік бәрінен қымбат» мақаласында.
«Мемлекеттік тілді білу – Қазақстанның әрбір азаматының парызы. Міндеті деп те айтуға болады. Осы орайда мен барша қазақстандықтарға, оның ішінде қазақ тілін әлі жете меңгермеген отандастарыма үндеу тастағым келеді. Жастар ағылшын тілін немесе басқа да тілдерді аз ғана уақытта меңгере алатынын көріп отырмыз. Тұтас буын алмасқан осы жылдарда қазақ тілін үйренгісі келген адам оны әлдеқашан біліп шығар еді», – деп жазды Тоқаев сейсенбіде жарияланған мақаласында.
Президент Тоқаевтың мақалада тіл турасында айтқан пікіріне белгілі журналист Өміржан Әбдіхалықұлы «Фейсбук» парақшасында мынадай пост жазған екен (қаз-қалпында):
- «Қазақ тілін, шын мәнінде, бүкіл халқымызды біріктіруші факторға айналдырудың барлық құқықтық тәсілдері және кепілдіктері қалыптасты» депті президент.
Ол қандай құқықтық тәсілдер мен кепілдіктер? Әлде ойдағы іс пе? Сосын тағы ниетке апарып тірепті. Ал Қазақстанның достық ниетін Дума депутаттары түсінді ме? Жоқ!
«Қазақ тілінің қолданыс аясын кеңейту – орыс тілін кемсіту емес» депті. Рахмет президентке! Құтты болсын!..
Қазақ тіліне мұндай қатынаспен ақпараттық қауіпсіздігімізді қорғай алмаймыз және біртұтас қоғам да қалыптаспайды. Тағы қанша уақыт әркімнің ниетіне қарар екенбіз… Тіл саясатында аса батыл қадам болмаса, бармағымызды тістейміз әлі».
«ДАТ-ақпарат»