- Бір топ алматылық азаматтар президент Қасым-Жомарт Тоқаевтың атына жазған Ашық хат газет редакциясына келіп түсті. Біз бұл жолдама-жазбаны біраз ықшамдап, экспрессивтік сөздерін қысқартып, жалпы мазмұнын қаз-қалпында жариялап отырмыз. Бұл Ашық хатта жазылған мәселелерге орай пікір айтам деген оқырмандар болса, біз кім-кімнің де ойлы және ашық сөзіне газет бетінен орын беруге дайынбыз.
Редакция
Құрметті Қазақстан Республикасының президенті Қасым-Жомарт Тоқаев мырза! 1991 жылдың қаңтарына дейін республикамызда жүздеген завод, фабрика, түрлі өндіріс орындары жұмыс істеп, халқымыздың әл-ауқатына керектінің бәрін беріп тұрды. Елдегі колхоз-совхоздарда 35 миллион қой, 10 миллионға жуық жылқы мен ірі қара болды. Үкіметтің жоспары мен тапсырмасы уақытысында артығымен орындалатын. Мұның бәрін қатаң түрде бақылап отыратын Мемлекеттік жоспарлау комитеті болды. Жоспар уақытында орындалмаса, қай саланың болмасын басшысы қызметтен қуылатын. Бұл жағдайды көзіміз көріп, қолымызбен ұстадық.
Ал енді осының бәрінің өзі тұрмақ, көлеңкесі де қалған жоқ. Отыз жылдың ішінде республика барлық жағынан құрып бітті. Осының бәрі 30 жыл билікте отырған Нұрсұлтан Назарбаевтың – өзім жалғыз билеймін деуінің кесірінен жоқ болды. Жоғалған дүниелер енді тарихта орнына келмейді. «Болашақта бәрін жасаймыз…» деп халықты алдап, Назарбаев тайып тұрды.
Президент болған Нұрсұлтанға сенімі жоғалған халық енді Сізге – Қасым-Жомарт Кемелұлы, сенерін-сенбесін білмей, аң-таң болып отыр. Ол Нұрсұлтанның кесірінен. Аузы күйген үріп ішеді деген осы: Нұрсұлтанның алдауына түсіп, тақыр жерге отырып қалған қарапайым халық енді қайтсін?!
Бірақ Сіздің болашақты ойлау қабілетіңіз Нұрсұлтаннан артық қой. Халық оны біліп отыр. Сіз Назарбаевтың сөзіне сенбеңіз, ол Сізді жақсылап пайдаланады. Бүгінде ол Бауыржан Байбекті шұғыл түрде президенттікке өткізгелі жүр. Сіз оны білесіз бе?
Сізді пайдаланып, Астананың атауын өз атына лып еткізіп, жымын білдірмей аударып ала қойды. Оған «Халық қаҺарманы» атағын бердіңіз. Республика бойынша барлық облыс орталықтары мен үлкен қалаларда басты көшелердің атын Сіз арқылы иемденіп алды. Оның бәрі Нұрсұлтанның әкесінен қалған жоқ! Ол атауларды оның атына бергеніңіз мүлде дұрыс емес! Олардың барлығы дәл бүгінгі аш-жалаңаш, үйсіз-күйсіз жүрген кедей халықтың адал еңбегіне алынған, салынған дүниелер. Нұрсұлтанның Қазақстанға соншалықты еңбегі жоқ, 30 жыл тек қулықпен жүрді.
Енді Құдайдың жерінің асты мен үсті сатылып жатыр. Кен байлығымыздың 75 пайызы сатылып кетті. Шетелдерге 200 миллиард доллар қарыз екенбіз. Бұл тек біздің газеттен оқып білгеніміз ғана. Жалпы қарапайым халық білмейтін қанша дүние кетті?!
Алматы қаласы астана болып тұрғанда, мұнда министрліктер мен ведомстволардың жүзге жуық ғимараттары болды. Бүгінде бұлардың барлығы мемлекет есебінде жоқ. Ең үлкен бастықтан бастап жекешелендіріп алған адамдар оларды арендаға беріп қойып, жандары қиналмай, ешбір шығын шығармай, ақшаға шомылып отыр.
Алматы облысының барлық құнарлы, сулы жерінің иесі – баяғы Нұрекеңнің туған інісі Болат Назарбаев. Халық бәрін біліп отыр.
30 жыл аз мерзім емес. Осы уақыт аралығында Қазақстан халқы адам танымастай өзгерді. Бұрынғы берекелі бірлікті, туыстай тұтастықты қазақ ұмытты. Бір-біріне деген опасыздық пайда болды. Меймандас елдің салты тозды. Бір уыс талқан мен бір жапырақ нанды танымайтын адамымен бөлісіп жейтін қазақтың ниеті бұзылды. Осының барлығы отыз жылғы жеке-дара биліктің кесірінен болған қасірет!
Қазір біздің қазақ үрей үстінде өмір сүріп, күн көруде. Қай жағымнан полиция кеп қалады деп, ішкен-жегені бойына сіңбей алаңдайды. Шындықты айтып, көшеге шыққан адамдарды көкпарша тартқылап, түрмеге тығады. Бұл алаөкпе полициялар тек қана президент Назарбаевтың тікелей тапсырмасын орындап келді, ол тапсырма әлі де жалғасуда.
Баспасөздің жазуы бойынша, бүгінде 300 мыңға жуық қытай көшіп келіп, Қазақстанда тұрақты тұрып жатыр. Шығыс Қазақстанның, Тарбағатай мен Жетісудың, еліміздің басқа да облыстарының біраз құнарлы жерін қытай баяғыда иемденіп алғанын интернет жазып жатыр. Бұған дейін Нұрсұлтан Назарбаев Қытай басшысымен жасасқан мемлекеттік келісім бойынша, қазір Қытайдың 51 зауыты Қазақстанға көшірілу үстінде.
Біздің Сізге – Қасым-Жомарт Кемелұлы, ендігі айтарымыз:
- Қазақстанда бірде-бір қытай қалмасын, еліне кетсін;
- Қытай салады деген 55 зауыттың бізге керегі жоқ. Тіпті керек болып жатса, жағдайымыз, экономикамыз түзелсе, өзіміз салып аламыз;
- Қытаймен бұған дейін жасалған барлық келісім-шарттар жария етілсін;
- Қазақстаннан жалға жер алып, егін (соя) егеміз деген қытайлық экспансияға түбегейлі тосқауыл қойылсын!
Біз біліп отырмыз: Назарбаев Қытайдан аларын – алды, беретінін – берді. Ендігі жағдай өте қиын. Екі ел арасындағы келісім-шарттың құпиясын «біз – Мәсімов екеуіміз ғана білеміз» деп, Назарбаев қалыптастырып кеткен бұл қиын жағдайдан қазақ халқының көмегімен ғана құтыла аласыз, Тоқаев мырза!
Ендігі мақсат – жаңа президентпен бірлесіп, халық мүддесіне жұмыс істейтін жаңа парламент құру. Бұл арада да Назарбаев өзінің қу есебін құрып, кезекті парламент сайлауында депутат болатын өз адамдарының аты-жөнін жазып та қойды. Халықтың, қоғамның көмегімен Сіз бұл есептің жолын кесуіңіз керек, Қасеке мырза!
Қазақстанға керегі – тек бір ғана палаталы депутаттар корпусы. Оны жалпы халық өз арасындағы беделді азаматтардың есебінен сайлап алуы тиіс. Сонда ғана парламент халықпен ақылдасады, қоғаммен санасады, елі үшін қызмет істейді.
Қазіргі сенат мен мәжілісте отырған депутаттар Нұрекеңнің тізімімен барып, жұмсақ креслоға отыра қалып, халықтың мүддесіне орай бір ауыз сөз айтпаған жандайшаптар. Олардың көпшілігі сайлауды, сайлаушыларды көрмеген жылпостар.
Сондықтан, Тоқаев мырза, бүгінгі отырған депутаттарды тез арада таратып жіберсеңіз, халқыңыз Сізге разы болады. Сізді алақандарына салып, көтеріп жүреді. Осыған сеніңіз. Әрине, бұл өтінішті орындау Сізге жеңіл емес, өте ауыр болады. Десек те халық Сізді қолдайды. Егер қажет болса, осы мәселелер жөнінде референдум өткізуге бастамашы бола алатын президент – Сіз ғана. Нұрсұлтан Назарбаев емес! Конституцияда солай жазылған.
Ал Нұрсұлтан Назарбаевтың қазіргі «Қауіпсіздік кеңесі» деген мекемесі – ол өзінің ойдан шығарғаны. Ондай мекеме Конституцияда да, республиканың штатында да жоқ. «Бірінші президент», «елбасы» деген күлкілі атақтар. «Ел басымыз болсын» деп, халық оны сайлаған жоқ. Оны ол тағы да сол жандайшап депутаттардың көмегімен заңдастырып алған. Бірақ ол заңдастыру 1995 жылғы жалпыхалықтық референдумда қабылданған Конституция талаптарына сай келмейді. Себебі – Конституцияға одан кейін енгізілген өзгерістерге халықтың қатысы жоқ. Яғни, Конституцияға содан бергі енгізілген өзгерістер мен толықтырулар – заңсыз.
Құрметті президент, Тоқаев мырза! Халықтың Сізден содан кейінгі сұрайтын үлкен өтініші – саяси желеумен қамалып, түрмеде отырған азаматтарды шығартыңыз! Кәдімгідей бұйрық беріп немесе президенттік Жарлықпен шығартыңыз. Олар халықтың ақшасын немесе байлығын жеген жоқ. Тек қана президент Назарбаевтың кезінде оның теріс саясатына, теріс экономикалық іс-әрекеттеріне қарсы шығып, заңсыз сотталғандар.
Мысалы үшін, Мұхтар Жәкішев пен Арон Атабектің сүйектерін түрмеден алып шықпай тұрғанымызда, Сіз оларды жедел босатуға пәрмен беріңіз! Бұл шешіміңіз үшін халық Сізді қолдайды, Назарбаевтан қорғайды!
Содан кейін ҚДТ (ДВК) қозғалысын халыққа жау етіп көрсеткенді қою керек! Оны бүкіл Қазақстан халқы қолдап отыр. «ДВК»-ның ұсынысы – халыққа қызмет ету, халықтың қаржысын ұрлап, оны шетелге тықпау, адал болу, елімізді өркендету, Қытайды елге жолатпау, саяси қуғын-сүргінді құрту, тағы басқа айтып жүргені тек жақсылық. Мұндай халықтық талапты көтерген ұйымның «экстремист-террорист» болуы мүмкін емес. Ол «бірінші президенттің» сол кезде ойлап тапқан былжырбайы. Халық мұндай былжырақты түсінбейтін ақымақ деп ойлайды-ау деймін. Халық кімнің кім екенін әбден түсініп болды.
Құрметті Қасым-Жомарт Тоқаев мырза, осы жазылғандарымыздың бір сөйлемі тұрмақ, бір сөзі өтірік болса, Конституциямыз бен заңдарымыздың кез келген бабы алдында жауапты екенімізді біз сезінеміз, әрі мойындаймыз. Бізден қателік кетсе, біз бұл үшін жауап беруге дайынбыз!
Қазақ мемлекетін 30 жыл басқарған Нұрсұлтан Назарбаевтың «Нұр Отан» партиясының соңғы жиналысында айтқан ой-пікірінен ел-жұрт шошыды. Тіпті мынаны айтып тұрған адамның дені сау ма деп, психологиялық жағы нашарлаған шығар деген сыңаймен таңқалушылар да болды. Күні бүгінге дейін естіген құлақтарына сенбейді. Назарбаев сол партиялық жиналыста не айтып еді? Ол былай деді: «Бала табар алдында мемлекетпен ақылдасқан жоқсыңдар»; «Екі сиыр сатып алып, жандарыңды бағыңдар»; «Бүгінгі ауылдар – паразит»… Қазақ мұндайға «Сенген текем сен болсаң, күйсеген аузыңды ұрайын» дейді. Басқа айтарға сөзіміз жоқ!
Құрметті Қасым-Жомарт Кемелұлы!
Біздің ең соңғы ұсынысымыз – Қазақстан астанасының атын «Алашорда» деп өзгертуді халық Сізден өтінеді. Тек осы атау ғана дұрыс болады. «Нұр-Сұлтан» деген атаудың иесі кім? Қызмет бабымен келіп-кеткен бір адам! Ал «Алашорда» деген атауды астанамыздың атауына берсек, бұл қала бүкіл қазақ халқының ордасы екені айғайлап тұрған жоқ па?!
Ал республиканы ұялмай-қызармай 30 жыл басқарып, ел-жұртты осындай кедейшілік халге жеткізген әлгі «біздің» Нұрсұлтан Назарбаев Алматыдағы Республика сарайына келіп, халыққа есебін берсін деп қатаң талап қоямыз! Біз Сіздің халықтық бастамаларыңыздың барлығын қолдаймыз, Тоқаев мырза! Тек қана батыл болыңыз, артыңызда қалың халық тұрғанын ұмытпаңыз! Егер Сіз халық жағына шықсаңыз, біз Сізді қорғаймыз!
Сізге деген ізгі құрметпен Алматы облысы мен Алматы қаласының тұрғындары:
- С. Бектеміров, З. Сағындықов, Ж. Омарбекова, Д. Дарыбай, С. Мақанова, Р. Мұқашова, Б. Жуашев, Д. Өркенбаева, Е. Сағындықова, Б. Серікбаев, М. Жандосова, Р. Майлыбаев, З. Қуандықова, Р. Смақов, З. Дәукеева… – барлығы 85 адам.
