- Біріккен Ұлттар Ұйымы (БҰҰ) Бас ассамблеясы Семей өңірінің халқын сауықтыру жөніндегі қарарды қабылдады, деп хабарлады ҚазТАГ Қазақстан сыртқы істер министрлігінің баспасөз қызметіне сілтеме жасап.
«Біріккен Ұлттар Ұйымының Бас Ассамблеясы Семей өңірінің халқын сауықтыру, қоршаған ортасын қалпына келтіру және экономикалық дамыту мақсатындағы Халықаралық ынтымақтастық пен қызметті үйлестіру туралы Қазақстан бастамашылық еткен қарарды бірауыздан қабылдады. Құжатта Халықаралық қауымдастыққа Қазақстанға зардап шеккен халықты емдеу жөніндегі арнайы бағдарламаларды әзірлеуге және жүзеге асыруға, Семей өңіріндегі экономикалық өсу мен орнықты дамуды қамтамасыз ету жөніндегі күш-жігерге көмек көрсетуге шақыру жазылған. Аталмыш құжатта Қазақстан үкіметінің Семей өңірінің қажеттіліктерін қанағаттандыруға жәрдемдесу үшін ресурстар бөлудегі маңызды рөлі танылады», – делінген сейсенбідегі хабарда.
СІМ атап өткендей, Халықаралық қауымдастық өкілдерінің рекордтық саны Қазақстан халқымен ынтымақ білдірді – БҰҰ-ға мүше 118 мемлекет қарар жобасының тең авторлары болды. Бірақ бұл қарарға Ресей Федерациясы қол қоймады. Сарапшылардың пікіріне қарағанда, Ресей Семей өңірінің ядролық сынақ зардаптарын ғана емес, сонымен бірге бүкіл «СССР» деген империя Қазақстанға ауыр күйзеліс әкелгенін мойындамай отыр. Семей жерінде 1949 жылдан 1989 жылға дейін 458 атмосфералық және жерасты жарылыстары сынақтан өткізілген «қызыл империяның» мұрагері осылайша адамзат алдындағы қылмысын жоққа шығаруға тырысуда.
«ДАТ-ақпарат»