Қазақстан Республикасының Премьер-министрі
Олжас Бектеновке!
Бүгінгі күні еліміздің 11 облысында және республикалық маңызы бар 3 қалада газ тарату жүйесі жұмыс жасайды. Тұтынушылар арасында газды қауіпсіз пайдалану ережелері түсіндіріліп, профилактикалық жұмыстар да жүргізіліп жатқанымен, жазатайым оқиғалар артып келеді.
2019–2023 жылдары газ пайдаланудан зардап шеккендердің саны 536 адам болса, оның 186-сы адам өлімі. Мысалы, 2019–2022 жж. жылыту кезеңінде Шымкент қаласы бойынша келіп түскен жазатайым оқиғалардың саны 22, зардап шеккен 55 адам, оның ішінде өлім жағдайымен 13 адам тіркелді. Сондай-ақ 2021–2022 жж. жылыту кезеңінде келіп түскен жазатайым оқиғалардың саны 14, зардап шеккендер 22 адам, оның ішінде өлім жағдайымен 17 адам тіркелді.
Тұрмыстық баллондар мен газ тұтыну жүйелерін қауіпсіз пайдалану талаптарының сақталуын бақылауды жүзеге асыру жөніндегі функциялар 2014 жылы жергілікті атқарушы органдардың қарамағына берілді. Бұл мүлдем жеткіліксіз. Бақылаушылардың саны да, бақылайтын, тексеретін базасы, керекті құралдары да жоқ, міндеттері мен жауапкершіліктері де белгіленбеген.
Бұрынғы газ инспекциясы құрылмаса, бұл қауіп пен қатер азаймайды. Керекті қаржыға келсек, қираған ғимараттардың құны бұл шығыннан әлдеқайда көп. Адам қауіпсіздігінен қаржы үнемдеудің керек емес екені, сірә да, белгілі. Сондықтан газ пайдалану қауіпсіздігін қадағалайтын және жауап беретін органды қарастыруды ұсынамын.
Бақтықожа ІЗМҰХАМБЕТОВ, ҚР Парламенті Мәжілісінің депутаты
