Алматы қаласындағы №3 сайлау округі бойынша Қазақстан Республикасы Парламентінің депутаттығына кандидат Ермұрат Сейтқазыұлы Бапидың САЙЛАУАЛДЫ БАҒДАРЛАМАСЫ
Елге енген саяси жылымықпен бірге шын мәнінде «Жаңа Қазақстан» құратын сәт туды. Мұндай мүмкіндікті біз ұзақ күттік. Тәуелсіздіктің 30 жылдан астам уақытында біз әлемдік өркениет көшінен көп кейін қалдық. Кейбір елдер «айфонның» алтыншы нұсқасын шығарып жатқанда, біз балтаның басы мен күректің сабын Қытайдан сатып алып отырмыз.
Ендігі жерде халықтың кедейшілік кешкен тіршілігі мен қоғамның тұралаған тұрмысын ертелі-кеш жырлап, қол қусырып, обынып отырғаннан түк шықпайды. Біз «саяси пәтерлер» мен алауыз әлеуметтік топтарға бөлінбей, керісінше, Құдай бұйыртқан қазіргі мүмкіндікті пайдаланып, өзгерістер үшін мейілінше қарманып қалатын күн туды.
Ендігі жерде ешкімге және ештеңеге алаңдайтын жөніміз жоқ. Біз елде өзгеріс жасауды биліктен ғана күтпей, білек сыбанып, жаңа қоғамды, әділетті елді өзіміз – бәріміз бірге жасауымыз керек.
Әлемдік геосаяси қатер еліміздің іргесіне тірелген кезде біз ұлтымыз бен мемлекетіміздің қауіпсіз және жарқын болашағы жолында жік-жікке бөлінбей, жалпыхалықтық мүддемен нақты нақыштағы «Жаңа Қазақстанды» өз қолымызбен құруымыз керек. Осы жолы қапы қалсақ, болашақ ұрпақ бізді кешірмейді!
Мен ел Парламентінің депутаттық мандаты үшін үміткерлік сайысқа дәл осы мақсаттар жолында түсіп отырмын. Маған лауазым да, атақ-дәреже де керек емес. Керегі – әділетті де әдемі Қазақстан құру. Осы жолдағы жанталасар жұмыста ерік-жігерім мен қару-қайратыма мүмкіндік беретін, табаныма тіреу боларлық бұдыр қажет. Сол «бұдыр» – Парламенттің мінбері деп ойлаймын.
Бір ақиқатты мойындауым керек: 25 жыл оппозициялық қозғалыста жүріп, өзімнің құрметті әріптестеріммен бірге айтарлықтай нәтижеге жете алмадық. Ел өзгермеді – «баяғы жартас – сол жартас» күйінде қалды.
Ендігі жерде халық бірігіп көтеруі тиіс, қазақ арқалап өтер ауырлықтың бір пұшпағына тіреу болсам, елімнің ертеңіне жәрдем етсем деймін. Елмен бірге өзгерістер жасауға қажыр-қайратым жетеді деп ойлаймын.
- Осы мақсат жолында парламенттік сайлауға депутаттыққа үміткер ретінде қатыса отырып, үш негізгі тармақтан тұратын бағдарлама ұсынамын:
І. Ұлттық және мемлекеттік мүдде тұрғысында:
- Президенттік-парламенттік республиканың тұғырын нығайту мақсатында:
а) азаматтық қоғам мен мемлекеттік биліктің мәмілелі бастамасы арқылы Қазақстан Конституциясына «Жаңа Қазақстан» талаптарына сәйкес өзгерістер енгізу немесе «Екінші Республиканың» жаңа Конституциясын қабылдауға ықпал етуге бастамашылық жасау;
ә) елдегі қоғамдық қатынастарды халықтық-демократиялық деңгейге жеткізу үшін, аралас сайлау жүйесін жетілдіруге ықпал ету;
б) саяси партияларды мемлекеттік тіркеуге алу мәселесіндегі тосқауылдар мен бюрократизмді жоюға әсер ету;
в) адам құқығы мен сөз бостандығын толық қамтамасыз ететін заңдарға қоғам талабына сәйкес өзгерістер енгізуге күш салу;
г) қоғамдық-көпшілік жиындар еркіндігі негізінде саяси-митингілік мәдениет қалыптастыруға қажетті заң актілерін қабылдауға бастамашылық жасау;
- Ушыққан геосаяси әлемдегі Қазақстанда:
а) ұзақ жылдарғы авторитарлық билік қалыптастырған біржақты сыртқы саясат жүйесіне бірлескен мемлекеттік-қоғамдық ревизия жасау идеясын көтеру;
ә) Қазақстанның экономикалық мүддесіне нұқсан келтіретін одақтар мен бірлестіктердің нәтижесін талдай отырып, республиканың бұл құрылымдар қатарында қалу-қалмауын қоғамның пікірін тыңдай отырып, мемлекеттік дәрежеде біржақты шешу мәселесіне бастамашылық жасау;
б) сыртқы қатерден мемлекеттің қауіпсіздігін жеткілікті дәрежеде қамтамасыз ету үшін, өтпелі кезеңдегі шұғыл шешімдер қабылдау мүмкіндігін президенттік биліктің құзырына беру. Елге кенет төнген қатер – парламенттік сөзбұйдаға салатын дискуссиялық мәселе емес;
в) мемлекетіміздің қауіпсіздігін нығайту мақсатында ұлттық-патриоттық қозғалыстар мен саяси партиялар еркіндігіне қол жеткізу. Бұл мақсатта қоғам мен биліктің тұтастығы мен іс-қимыл бірлігіне ықпал ету;
г) елді ішкі-сыртқы қауіп-қатерден бірінші кезекте қорғайтын ең басты әлеуметтік күш – қазақ халқы екенін мемлекеттік идеология деңгейіне көтеру. Республиканы мекендейтін басқа ұлыстар қазақ халқы өзінің бірінші қамқоршысы, қорғаны және жанашыры екенін сезіну идеологиясын қалыптастыруға ықпал ету;
ғ) мемлекеттік билікке деген халықтың сенімін қалыптастыру үшін, отарлық-империялық заманда, кеңестік-тоталитарлық кезеңде кенде қалған қазақтың есесін қайтару бастамасын көтеру;
д) ұлтаралық қарым-қатынас мәселесін биліктің «тұрақтылық» мүддесі тұрғысында қалыптастыру саясатына, соның салдарынан пайда болатын ұлтаралық кикілжіңдерді қазақтың «есебінен» басып-жаншу үрдісіне тосқауыл қою идеясын көтеру.
ж) кедейшілік кешкен халықтың әл-ауқатын көтеру мақсатында Қазақстан үкіметінің жаңа экономикалық бағдарламасын қабылдауға ықпал ету; Үкіметтің ел алдындағы тікелей жауапкершілігін арттыру үшін, ҚР премьер-министрінің Парламентке есеп беру міндетін заң жүзінде қалыптастыру; ҚР Президенті алдына Үкімет басшысын қызметінен алу (отставкаға жіберу) жөніндегі парламенттік бастаманы Конституциялық заңдар негізінде бекітуге ықпал ету;
з) тәуелсіздік жылдарындағы Қазақстанның саяси-экономикалық тарихын, назарбаевтық басқару жылдарын саралап, ресми құжаттық баға беру үшін, люстрация туралы заң шығаруға бастамашалық жасау;
е) халық қазынасынан ұрланған активтер мен капиталды елге қайтаруға пәрменді ықпал ету үшін, арнайы заң қабылдауға бастама көтеру.
ІІ. Алматы қаласының көлемінде:
- 90-жылдарғы экономикалық дағдарыс, өндіріс орындары мен ауыл шаруашылығын жүйесіз жекешелендіру, жаппай жұмыссыздық салдарынан урбанизациялық ішкі миграцияға душар болып, қала маңына көшіп келуге мәжбүр болған қазақ қауымының бүгінгі әлеуметтік-тұрмыстық ахуалын мемлекеттік дәрежеде сараптауға ықпал етіп, арнайы үкіметтік қаулы қабылдауға ықпал ету;
- Жергілікті экологияны оңалту және ішкі транспорттық қозғалыс мәселесін шешу мақсатында қалаға сырттан кіретін көліктерді ақылы төлем жүйесіне көшіру жөнінде үкіметтік қаулы қабылдау мәселесін көтеру;
- Тұрғын үй құрылысын спутник қалалар мен қаладан тысқары ықшамаудандарға көшіру мәселесін көтеру;
- Сейсмикалық қатері күшті қалада көпқабатты үйлер салу үрдісін тоқтату үшін арнайы заң қабылдауға бастамашылық жасау;
- Жылу-энергетика ошақтарын әртараптандыру мәселесін көтеріп жүрген бастамашыл топтарға республикалық ведомстволар алдында мейлінше көмек көрсету;
- Құрылыстарға мемлекеттік бақылау мәселесін күшейту үшін, құрылыс-архитектура мекемесін қала әкімдігінің ықпалынан шығарып, жергілікті жерге тәуелсіз республикалық вертикаль құруға ықпал ету;
- Әбден тозығы жеткен сумен қамтамасыз ету, кәріз және жылу жүйелерін күрделі жөндеуден өткізудің бесжылдық бағдарламасын жасауға бастамашылық ету;
- Қаланы электр қуатымен толық қамтамасыз ету үшін, қосымша генерациялық қуат көздерін салу мәселесін көтеру;
ІІІ. Алатау және Әуезов аудандары бойынша:
- Екі аудандағы көптеген мектептерде оқушылар санының шамадан тыс артуына байланысты республикалық бюджеттің есебінен қосымша мектептер салу бағдарламасын жасау;
- Тұрғындарды дәрігерлік қамту жағдайын жақсарту мақсатында отбасылық емханалар жүйесін қалыптастыруға мүмкіндік беретін заң актілерін дайындауға ықпал ету;
- Екі аудан сайлаушыларының аманаттық тапсырмаларын (мектеп, аурухана, балалар ошақтары, мәдени-көпшілік және бұқаралық спорт орындарын салу жөніндегі) топтастырып, тиісті қалалық және республикалық атқарушы билік алдына мәлелер қойып, оның орындалуын бақылауға алу;
- Сайлаушыларды жергілікті жерде айына бір рет қабылдау тәртібін қалыптастыру; олардың тиісті ведомстволар мен заң-құқық органдарына жолданған талап-тілектері мен арыз-шағымдарының қозғалыс процесін қатаң бақылауға алу;
Әрине, депутаттық құзірет (егер оған қол жетсе) барысында ұсынылып отырған бағдарламаға нақты жағдайларға байланысты өзгерістер енуі мүмкін. Бірақ оның негізгі қағидаты сақталады. Себебі ұсынылып отырған бағдарламаның қоғамдық-саяси лейтмотиві – менің саяси көзқарасым мен азаматтық ұстанымымның алтын қазығы.
Елдің ертеңі – ердің мойнында!
Халық пен қоғам алдындағы азаматтық және перзенттік парызымды кіршіксіз өтеуге бір Жаратқан жар болсын!
«Жаңа Қазақстанды» бірге жасайық!
Ермұрат БАПИ, ҚР Парламенті сайлауына №3 округ бойынша кандидат
САЙЛАУ ШТАБЫНА ШАҚЫРАМЫН!
Мен – Ермұрат Бапи, Алматы қаласындағы №3 округ бойынша үміткер (кандидат) ретінде ҚР Парламенттік сайлауына қатысу науқанын бастадым. Осы саяси кампанияға орай сайлауалды штабыма:
- үгітші болуға ынталы еріктілерді (волонтер)
- сенімді өкіл болуға ықыласты белсенді азаматтарды;
- жарнама мамандарын;
- журналистер мен блогерлерді;
- тәуелсіз бақылаушыларды;
- коммуникация мен ІТ мамандарын
- тұрғын үй комплекстері мен тұрғылықты жерде әлеуметтік желілер чатын жүргізетін газеттің тұрақты оқырмандарын бір командада жұмыс істеуге шақырамын!
Үгітшілер мен сенімді өкілдер үшін Алматы қаласында тұру міндетті емес.
Мен сайлауға түсетін №3 округке Алматы қаласының Алатау және Әуезов аудандары кіреді. Осы аудандарда тұратын және менің үміткерлігім үшін жұмыс істеуге ықыласты азаматтар өз тұрғылықты жерінде үгіт материалдарын таратуға жәрдем жасайды деген сенімдемін.
- Сайлау науқанына көмектесуге, Парламент мәжілісіне халық атынан баратын тәуелсіз депутаттың жеңісіне ниетті азаматтар маған тікелей хабарласа алады: 8-777-493-83-83, 8-701-299-90-28.
Сайлауалды науқанды ұйымдастырушы штаб мына мекенжайларда орналасқан:
Алатау ауданы бойынша:
Мкр. Шаңырақ-1, Өтемісов көшесі, 127а.
Тел. 8-701-382-49-95, 8-705-736-31-06
Әуезов ауданы бойынша:
Жұбанов көшесі, 94 (Алтынсарин көшесінің қиылысы), 3-қабат.
Тел.8-707-323-03-18, 8-747-855-97-40
Құрметпен, Ермұрат БАПИ
