- Ермұрат бауырым, елім үшін деген қадамыңызды қолдай отырып, бұдан былайғы азаматтық парызыңыз бен депутаттық қызметіңізге төмендегідей аманат жолдаймын.
- Қоғамның барлық салаларында – өндіріс, құрылыс, көлік, қызмет көрсету, білім беру, денсаулық сақтау, тәртіп сақтау құрылымдары, сот, прокуратура және т.т. тәуелсіз кәсіподақтар ұйымдастыру бойынша заң қабылдау.
Мақсат – қазіргі жағдайдан басқаша, жұмысшы, қызметкер, жұмыс беруші, мекеме немесе кәсіпорын басшылары және мемлекет өкілі еңбек қатынастарында тең құқылы және тең жауапкершілікті субъектілер болады.
Қазір жұмысшы, қызметкер өз еңбек және әлеуметтік құқықтары бойынша, басшылар алдында – тек өтінуші, сураушы ғана болып тұр. Ал егер олардың тәуелсіз кәсіподағы болса, өздерінің еңбек және әлеуметтік құқықтарын сақтауды талап етушіге айналады.
Қоғам тұрғысынан мақсат – еңбекшілер болашақ демократияның басты субъекті болатындықтан, тәуелсіз кәсіподақ арқылы оларды ұйымдасқан, заңды саяси мәдениетке баулу. (Кезінде теледидардан, бір жағынан біздің елімізде күлкілі сияқты, ал шын мәнінде ойландыратын оқиға көрсетілді. Ол бір топ отставкадағы полиция офицерлері мардымсыз зейнетақыларына байланысты Астанада пикетке шықты. Егер олардың Батыста сияқты тәуелсіз кәсіподағы болса, қажетті және беделді қорғауды сол жасар еді).
Бұл заңның қоғамымызға қосымша пайдасы – қазіргі тәртіп сақтау, тергеу, жазалау органдарындағы адамгершілігі әлі қалған қызметкерлерді түрлі заңсыз жауыздыққа айдап салатын, Назарбаев кезінде көтеріліп, оның билігін халықтан қорғауда жүрегі жоқ «төбеттерге» айналған орта және жоғары басшы буынға бағынбай, адам құқықтарын сақтау мен заң талабы бойынша қарсы әрекетке жол ашылуы мүмкін. Солай, бірінші кезекте, Отаны мен халқына қызмет ету басталар, тәртіп қорғау құрылымдарының халыққа жауыздығы азаяр!
2.Қалайда қайтарылатын оффшордағы, ел ішіндегі ұрланған қаржыны Ұлттық қорға шоғырландырып, оның көлемі, жұмсалуы ашық, елге белгілі адамдар мен адал қаржы мамандары, эксперттерінен құралған тәуелсіз Халықтық комиссияның бақылауында болуы керек.
Маңыздысы – елде ашық ғылыми-техникалық, технологиялық жобалар конкурсы жарияланып, Ұлттық қор есебінен КОБ өкілдерін қазіргі халыққа ең қажетті, жұмсалған қаржы қайтарымы, ұтымы жылдам өндіріс орындарын жасауға құлшындыру.
КОБ-ті қазақ жастарын еңбекке тартып, оларды жаңа технологиялық мамандықтарға үйретіп, жоғары жалақы беріп, әлеуметтік жағдайларына қарайласса, мемлекет тарапынан түрлі жеңілдіктер мен ынталандыру шаралары қаралсын.
Әлімхан НҰРЕКЕЕВ
ДАУЫС БЕРМЕГЕНДЕР – ең құрып қалған қоғамда ӨМІР СҮРУГЕ ӘБДЕН ЛАЙЫҚ
Былтырғы Қаңтар қырғынында «Көне матадан көйлек тігіп кисем, көне көйлек бола ма, жаңа көйлек бола ма?» деп жазған постыма: «Ойба-а-ай, келістіріп тіксе жаңа көйлек болады! Ол шеберіне байланысты! Ақ-көк, тіккенің бәрі көйлек…» дегендер де болып еді.
Міне, кешегі сайлаудағы былықтың бәрі сол көне матадан көйлек тігіп кигеннің кесірі. Тігісінен сөгіліп, шешілді де қалды! Бүгін ұяттан жұрдай болып, жалаңаш отырсыздар! Жаңа Қазақстан, әділетті Қазақстандарыңыздың сиқы – осы! Әкімдердің тапсырмасын орындаймыз деп, ақиқи жолдан тайған мектеп басшылары мен аз-маз алған ақшалары үшін арын сатқан ұятсыз мұғалімдер, сіздер халықтың үкідей үлпілдеткен үмітін үзгендеріңізді түсінесіздер ме?
Әй, қайдам, ондай бақыт қайда сіздердей санасызға?!
Биліктің түгі кетпейді, оларға керегі де осы. Жаңа Қазақстанға сенетіндер мен сенбейтіндер болып, қақ жарылып, өзара қырылысқан халыққа жаным ашиды.
Ал анау халықтың сенімін сатқан мұғалімдердің әрқайсысының атын атап, түсін түстеп, «Қарабет» деген атпен жұртқа жариялау керек. Білім саласынан аластатуға ат салысу керек ондайларды. Ондайлар ұрпақ тәрбиелеумен айналыспауы тиіс!
Бір қарын майды шірітетін сол құмалақ-мұғалімдер үшін бүкіл мұғалімге күйе жақпауларыңызды сұраймын. Мен де мұғаліммін. Мұғалім деген атты ақырғы деміме дейін қорғауға дайын мұғаліммін! Өз ісіне адал, сайлауда да адалдықты сақтаған мұғалімдерге алғыс!
«Мен жаңа Қазақстан болатынына сенбегем, сенбеймін де» деп, жамбасын жерден көтеріп, көшеге шығып, өз дауысына өзі ие болып, дауыс беруге де жарамағандар, мында келіп, білгішсініп, пікір жазуға құқыларыңыз жоқ! Сіздер ең құрып қалған қоғамға лайықсыздар! Сіздер үшін ешкім жақсы өмір жасап бермейді, соны біліңіздер!
Келесі сөз тәуелсіз бақылаушылар жайлы. Сіздердің шыдамдылықтарыңызға, төзімділіктеріңізге, әділдік үшін таңды таңға ұрып шырылдаған, әр дауыс үшін күрескен әр минуттарыңыз үшін басым жерге жеткенше иіп, тағзым етемін! Жаңа Қазақстанның күнін жақындататын жандар – сіздер!
Жемқорлық жайлаған билік тілің түгілі, түбіңе жетеді!
Жаңа Қазақстан үшін күрес енді басталды…
Айгүл ЖҰМАДІЛ
