Жезқазғанның жезі бітті, жеп тындық,

Жеміттердің бетін майлап, сепкіл ғып. 

Ким жегенді кім жемеді – жей берсін, 

Солар тойсын деп тұрдық! 

Қара белі қайыспаса обалдан, 

Енді маған не істе дейсің, о, жалған?! 

Сары мысқа лықа тойған Ким көкем, 

Иттің етін жек көретін боп алған! 

Жезтасқыны қайда кетті Жездінің? 

Жезкиігі қайда кетті Жездінің? 

«Енді жейтін нең бар, ей?!» деп келімсек, 

Қара тасқа қайрап жатыр кездігін! 

Кешірейін соның барлық ағатын, 

Кешірейін мұрсат берсе тағатым. 

Өтінішім, бір-ақ мысқал жез берші, 

Елді сатқан сайқалдың 

Өкшесіне тағатын... 

Жанат ЖАҢҚАШҰЛЫ

Мadeniportal.kz

Билікте жүрген «СОҢҒЫ НАЙМАН» қызметінен кетті

• Сауат Мыңбаевтың «Қазақстан темір жолы» компаниясының президенттігі қызметінен кеткені рас болып шықты. Ол Германияда емделуде, деп жазады Mail.kz порталы. 

Өз оқырманына сілтеме жасаған басылымның дерегінше, Сауат Мыңбаев омыртқасынан алған ауыр жарақаттың салдарынан қызметтен кетуге арыз жазуға мәжбүр болған.

Ол биылғы қаңтар айында тау шаңғысымен айналысып жүрген кезде жарақат алып, шұғыл түрде Германияның атақты «Шарите» ауруханасына жеткізілген еді. Екі айдан астам уақыт өтсе де, С.Мыңбаев алған жарақатынан әлі айыға қоймапты. «Оның жарақаты тым ауыр болғандықтан, әлі қозғала алмайды. Жағдайы мүшкіл. Сол себепті қызметтен кетуге арыз жазуға мәжбүр болды» деп жазады портал өз оқырманының ақпаратына сілтеме жасап.

Әр жылдары түрлі лауазымды қызметтер атқарған, қаржы вице-министрі, Президент әкімшілігі басшысының орынбасары, Ауыл шаруашылығы министрі, вице-премьер, Индустрия және сауда министрі, Энергетика және минералды ресурстар министрі, Мұнай және газ министрі, «ҚазМұнайГаз» компаниясының басқарма төрағасы болған Сауат Мыңбаев биліктегі жоғары лауазымды қызметте жүрген Найман руының соңғы өкілі еді. Негізінен Шапырашты руы жайлаған билік иерархиясында елдегі жеті қазақтың бірі саналатын бұл рудан бүгінде ешқандай өкіл қалмады.

«Тұрақты оқырманымыздың айтуынша, Үкімет басшысы Асқар Мамин Мыңбаевтың орнына лайықты кандидат іздеп, басы қатып жатыр» деп жазды апта басында Mail.kz.

ДАТ-ақпарат

 

 Макс пен Талғат ТОҚАЕВТЫ неге сотқа берді?

• Атыраулық белсенділер Макс Боқаев пен Талғат Аян сайлау туралы заңнамаға енгізілген түзетулерді алып тастауды талап етіп, президент Қасым-Жомарт Тоқаев, парламенттің қос палатасының төрағалары үстінен сотқа шағым түсірді. Белсенділердің пікірінше, бұл түзетулер «партияға кірмеген азаматтардың мәслихатқа сайлану құқығын шектейді».

Боқаев пен Аян азаматтардың мәслихат депутаттарына өзін ұсынуына тыйым салатын 2018 жылы заңнамаға енген өзгерістер Конституцияға қайшы деп есептейді. Олардың айтуынша, Ата заңда қазақстандықтардың мемлекетті басқару ісіне қатысу құқығына кепілдік берілген және аталған өзгеріс азаматтардың жергілікті өкілдіктеріне сайлану құқығын бұзады. Бұл туралы Талғат Аян Facebook-тағы парақшасында жазды.

Бұл өзгерістер қабылданғаннан кейін өткен алғашқы мәслихат сайлауында (2021 жылдың 10 қаңтары) сайлаушылар кандидаттарға емес, саяси партиялар үшін дауыс берді. Бюллетеньде бес партия көрсетілді, арасында бірде-бір оппозициялық партия болмады. Мәслихаттағы орындардың басым бөлігін бұрынғы президент Нұрсұлтан Назарбаевтың «Нұр Отан» партиясы иеленді. Қазақстан билігі сайлаудың «әділ» өткенін айтты. Ал батыс бақылаушылары сайлау «бәсекеге сай өтпеді» деп мәлімдеді.

Белсенділер «мәслихаттар көшені жарықтандыру, ауаның ластануы, жол салу мәселесі сияқты аймақтағы мәселелерді шешуі тиіс», ал партиялық тізіммен сайланғандардың «көпшіліктің мүддесіне бас қатыруы екіталай» деп санайды.

Azattyq.org

Коронавирустың «АЛМАТЫЛЫҚ» түрі пайда болды?

• Қазақстанда коронавирустың «алматылық» штаммы пайда болуы мүмкін. Оған әзірге «алматылық» деген уақытша атау берілген деп хабарлайды «Хабар 24».

Коронавирустың жаңа штаммы (түрі) туралы Қазақ ұлттық аграрлық университетіне қарасты Халықаралық вакцинология орталығының мамандары хабарлаған. 18–25 наурыз аралығында ғалымдар Қазақстанда британиялық және оңтүстік-африкалық штаммдарды анықтау бойынша зерттеулер жүргізген. Соған байланысты коронавирустың 12 үлгісі санитарлық-эпидемиологиялық сараптамадан вакцинологиялық орталыққа берілген. Вирусологтар аталған екі штамм Қазақстанда пайда болды деп есептегендіктен, бұл үлгілер мұқият зерттелген.

«Оларда (санитарлық-эпидемиологиялық сараптама жүргізген мамандар – Ред.) ДДСҰ-нан алған арнайы жиынтықтар бар. Олар үш штаммға тән ерекше мутацияны анықтады. Бірақ нақты қайсысына жататынын анықтай алмады. Осыған байланысты үлгілер бізге берілді», – дейді Халықаралық вакцинология орталығының жетекшісі Қайсар Табынов.

Коронавирустың бұл штаммдарын анықтау үшін қазақстандық ғалымдар бір аптадай уақыт жұмсаған. Алынған үлгілердің бірі зерттеу барысында британиялық штамм екені анықталған. Себебі сәйкестік 100 пайыз. Дегенмен, оңтүстік-африкалық штаммның мутацияға ұшырағаны белгілі болып отыр. Сонымен қатар ухандық штаммнан да мутация анықталған. Бұл мутацияға әзірге «алматылық» деген атау берілген.

«Біз әлі бұл мутация туралы айта алмаймыз. Әзірге басқа изоляттар зерттелмеген. Сондықтан иә, бұл бекітілген мутация деп айтуға болмайды», – дейді микробиолог Виталий Строчков. Оның сөзінше, мутацияның бұл түрін түпкілікті зерттеу үшін, елдің әр өңірінен алынған кем дегенде 10 үлгіні зерттеу керек. «Әзірге бұл вирустардың біздің Қазақстанда қаншалықты кең таралғанын білмейміз. Бұл үлгілер тек Алматы қаласынан алынған. Бірақ толыққанды ақпаратқа қол жеткізу үшін, ауқымды, егжей-тегжейлі зерттеулер жүргізу қажет», – дейді Қайсар Табынов.

 Кaz.nur.kz

 

 

Елде бензин НЕГЕ қымбаттады?

• Ғалым Смағұлұлының карикатурасы.

Қазақстанда тағы да бензин қымбаттады. 30 наурызда Бәсекені қорғау және дамыту агенттігі таратқан мәліметте наурыздың басындағы жағдаймен салыстырғанда бензин құнының 2-10 теңгеге өскені көрсетілген.

Дегенмен, кейбір аймақтағы жүргізушілер бензин құнының кестеде көрсетілген мәліметтен әлдеқайда жоғары екенін айтып отыр. Мысалы, 30 наурызда Шымкентте 92 маркалы бензин – 160 теңге, 96 маркалысы – 178 теңге, дизельдің литрі 170 теңгеден сатылып жатты. «Азаттыққа» сұхбат берген жүргізушілер жанар-жағармайдың қымбаттауы халықтың қалтасына салмақ түсіріп жатқанын айтып шағымданды.

Энергетика министрлігі сейсенбі күні таратқан хабарламасында ішкі нарықтағы мұнай өнімдерінің бағасын мемлекет реттемейді, баға сұраныс пен ұсыныс негізінде айқындалады деп жазған.

«Баға белгілеу кезінде есепке алынатын негізгі факторлар – Қазақстандағы мұнай құны (ішкі бағалар), процессинг (мұнай өңдеу қызметі), салықтар мен акциздер, зертханалық сынақтар мен қоспалар бойынша шығындар, банк қарыздарына қызмет көрсету, цистерналарды беру-жинау, тауарды тасымалдау және басқа да ілеспе шығындар. Бұл ретте мұнайдың құнын айқындау кезінде мұнай өнімінің әрбір түрінің үлес салмағы есепке алынады, ол оның нарықтық құнына және мұнайдың бір тоннасынан өндіру үлесіне негізделеді. Тұтынушылар үшін түпкілікті баға мұнай өнімінің көтерме сауда құны, жанар-жағармай станциясына жеткізілгенге дейінгі барлық көлік шығындары, мұнай базаларында сақтау, бөлшек саудада өткізушінің шығындары, сондай-ақ акциздер мен салықтар негізінде қалыптасады» делінген министрлік хабарламасында.

Azattyq.org