• 22 маусым күні премьер-министр Асқар Мамин Қазақстанда «үндістандық штаммға» ұқсайтын вирус мутациясының «анықталуына» байланысты астанада санитарлық-эпидемиологиялық ахуалды күшейтуді тапсырды. Ол сонымен бірге көрші елдерде індет өршіп тұрғанын алға тартып, мемлекеттік шекарада бақылауды күшейту қажеттігін де айтты.

Бір күн бұрын Қазақстан Денсаулық сақтау министрлігі елде тез тарайтын «үндістандық штаммға ұқсайтын вирус мутациясы анықталды»деп мәлімдеген. Зерттеудің түпкілікті қорытындысы әлі жарияланбады.

Ал денсаулық сақтау министрі Алексей Цой аймақтағы медициналық мекемелер дайындықты күшейтуі тиіс, вакциналау науқанын да жылдамдату қажет деді. Оның айтуынша, үндістандық штаммның тез жұғатын, ауыр өтетінін ескерсек, аймақтар өздерін қажетті дәрі-дәрмек қорымен және медициналық жабдықтармен қамтамасыз етуі тиіс, мобильдік топтардың дайындығын пысықтап алған абзал.

Министрліктің мәліметінше, республика бойынша инфекциялық орындардың – 25 пайызы, реанимациялық бөлімдердің 21 пайызы бос емес. Соңғы мәлімет бойынша, Қазақстанда бір күнде 944 адамнан коронавирус пен «пневмония» анықталған, 13 адам қайтыс болған.

Azattyq.org

ЕЛЖАНҒА ЕЛБАСЫ НЕГЕ ШҮЙЛІКТІ?

• Бұрынғы денсаулық сақтау министрі Елжан Біртанов «СК-Фармация» компаниясының бұрынғы басшысы Берік Шәріптің сотында куәгер ретінде сөйлеп, компания басшысының кінәсі жоғын айтты, деп хабарлады «Азаттық».

Еске салсақ, айыптау тарабы Берік Шәріпті былтыр індет кезінде «бір реттік қорғаныш киімдерін сатып алу бойынша басқа тасымалдаушыларға қарағанда қымбатырақ баға ұсынып, соның өзінде өнімді уақытында жеткізбеген компанияға басымдық берді» деп айыптаған. Соның салдарынан елде қорғаныш киім тапшылығы туындап, нәтижесінде дәрігерлер жаппай коронавирусқа шалдыққан.

Тоғыз айға жуық тергеуде отырған экс-министр Біртанов тергеу тарабының айыптауымен келіспей, былтыр қорғаныш киім тапшылығының туындауына «СК-Фармация» емес, Қытай тарабы кінәлі деп мәлімдеген. «CК-Фармация» мен Берік Шәріп тасымалдауды кешіктірген жоқ, қасақана әрекет етті деу – мүлде қисынсыз. Бұл – форс-мажор, Қытайдағы процестің кешіктірілуі. Қытай тарабы Қазақстанмен жасасқан келісімшарттарды орындамады. Сәйкесінше, қазақстандық тарап «СК-Фармациядан» уақытында заттарды ала алмады», ­– деді Біртанов.

Өзі үйқамақта отырса да, Елжан Біртанов әріптесіне шыр-пыр болып, араша түскен: «Бұл жерде Берік Шәріптің жеке кінәсі жоқ, – деді экс-министр сот процесі кезінде. – Керісінше, ол қорғаныш киімдерді мүмкіндігінше жылдам жеткізуге тырысты… Ол нендей қылмыс жасады – білмеймін. Оны адал қызметкер деп санаймын. Өзге әріптестер де сөзімді дәлелдей алады. Менің тарабымнан оған қысым жасалған жоқ. Маған жағу үшін, біреуге қандай да бір басымдық берді дегеннен де ешқандай қисын көріп тұрған жоқпын. Маған сол кезде, қазір де тендерден кімнің ұтқаны-ұтатыны бәрібір… Бұл жеке нарық. Денсаулық сақтау министрлігі оны ешқашан бақылаған емес», – деді Біртанов.

Былтырғы қараша айынан бері қамауда отырған Біртановқа қайткенде де қомақты айып тағу үшін, тергеу органы мен прокуратура жанталасып, түрлі дәлелдер іздестіруде. Өткен сот процестері кезінде Біртанов өзіне таңылған айыптың барлығын дәлелді және дәйекті түрде жоққа шығарды.

Ендеше Біртановты соттаудың астарында қандай қисын  болуы мүмкін? Біздің редакцияға жеткен инсайдерлік ақпаратқа қарағанда, экс-министрді қалай да айыпты етуге елбасы Нұрсұлтан Назарбаев мүдделі болып отырған көрінеді. Сол себепті прокуратура мен тергеу орындары айыпты «саусақтан сорып», Біртановты түрмеге жабудың айла-шарғысын жасауға амалсыз мәжбүр болып отыр.

Ал Ержанға елбасы неге соншалықты шүйлікті, оның экс-министрден ала алмаған қандай ақысы мен өші болуы мүмкін? Инсайдердің ақпаратына сүйенсек, Біртанов қаржыны жеке дара жеген және бөліспеген.

Әлбетте, біз бұл ақпараттың анық-қанығын айта алмаймыз. Бірақ Біртановты соттауға берілген нұсқаудың қатты екені анық. Бірақ іске қара жіппен көктеп тігілер дерек пен дәйек тапшы. Әйтпегенде Елжан ендігі түрмеде отыруы тиіс еді…

Ермұрат БАПИ