- Күлбілтелемей ашығын айтайық. Сайлау жарияланғалы бері, қалжың-шыны аралас әр нәрсені айтып келеміз. Әлеуметтік желінің эмоциясына сенсек, үміт артатындар көп.
Бірақ әлеуметтік желідегі әр өңірде тұратын қауымның бәрі можаритарлы жолмен додаға түсетін кандидаттың сайлаушысы емес. Әр кандидаттың сайлаушысы – өзі түсетін өңірдің халқы. Сондықтан әлеуметтік желідегі «лайық» пен пікірге емес, шынайы жағдайға талдау жасаған дұрыс.
«Сайлауға түссеңші, парламентке барсаңшы» – деп, желіде де, өмірде де айтып жатқандар көп. Әрине, сенім артқасын айтады. Сенімді ақтау – ауыр жүк. Сондықтан нақты шешімімді айтайын.
Көп ойлана келе, Астана қаласының мәслихат депутаттығына кандидатурамды ұсындым, өтінішімді жұма күні жаздым… Неге қалалық мәслихат, неге парламент мәжілісі емес?
Себебі, біріншіден, Астананың атынан түсіп жатқан парламентке лайықты кандидаттар көп. Астанадан берілген екі-ақ орын, оған мен сыйлайтын Арман Шораев, Сұлтанхан Жүсіп ағаларымыз түсіп жатқанда, олармен таласқаным, олардың дауысын бөліп, азайтуға ықпал еткенім әбестік болар.
Екіншіден, өзім мектеп директорлығына үш жыл уақытқа үлкен мақсат қойып келгенмін. Қазірге екі жыл болды, енді бір жыл уақытым бар. Сондықтан орта жолдан тастап кету – ата-ана және қоғам алдындағы жауапсыздық болар. Ұлттық мектеп жобасын толық аяқтап, біраз тірлік істеп кетуім керек. Ал мәслихат депутаттары өзінің негізгі жұмысынан кетпейді.
Үшіншіден, саяси тәжірибеміз керемет емес, бізге әлі бұл жақта өсу, тәжірибе жинау керек. Ал мәслихат сайлауына түсу, мүмкіндік болып жатса, мәслихат депутаты болу – сол тәжірибе жинауға мүмкіндік.
Төртіншіден, әрине, ол – сайлаудағы әділдік, мүмкіндік. Оны ойламай, бағамдамай, мен депутат боламын деп айқайлай беру – ақымақтық болар. Парламентке өтетініме сенбеймін. Енді мәслихатқа мүмкіндік бар деп ойлаймын.
Сондықтан бар мүмкіндіктерді пайдалана отырып, Астана деңгейінде білім саласына, ұлттық мәселелерге, әлеуметтік мәселелерге барынша әсер ете алатындай мәслихатқа баруға шешім қабылдадым… Әзірге артық әңгіме айтып қойып заңсыздыққа ұрынбайық.
Аятжан АХМЕТЖАНҰЛЫ
«ДИВАН БАТЫРҒА» СЕНІП ҚАЛМАЙЫҚ!
- Елге танымал қоғам белсенділері сайлауға ат қосып жатыр. Бұл дұрыс, елде саяси бәсеке артады. Бәсеке артса, саяси мәдениет қалыптасады.
Дегенмен айта кететін екі жайт бар.
Біраз адам әлеуметтік желідегі «подписчиктеріне» сеніп, депутат болудан дәмелі. Бірақ дауыс беретін сайлау участогыңдағы электорат пен әлеуметтік желідегі оқырмандар – екеуі екі бөлек аудитория. «Фейсбук» пен «Инстраграмдағы» досың, оқырманың – ол республика бойынша сені оқитын кісілер. Ал жеке мандат бойынша нақты бір округтен сайлауға түссең, сен соңғыларының қолдауына ие болуың шарт. Олар сені мүлде оқымауы да мүмкін. Кезінде ресейлік блогер Варламов Омбы қаласының мэрі боламын деп сайлауға түсуге талпынып, қажетті он мың қолды да жинай алмаған.
Енді сайлаушыларға қатысты. Ертең «сын сәті тақады, 1 ай бойы қаттырақ бақырып, көрінген әкім-қара, министрді сынасам, сайлауда жеңіп шығуым мүмкін» деп, небір аузымен орақ орған шешендер шығады. Сөйтіп, аузына келгенін айтатын талай «диван батырға» да куә боламыз.
Бір қызығы – солардың айтқанына имандай сеніп, ұйып тыңдайтындар көп болады. Сондай «хайповщиктерге» ұрынбайық. Бұл енді қауіпті құбылыс.
Алдағы сайлауда ел-жұртқа айқайламай, аттандамай, шынымен елге қызмет етіп жүрген белсенді тұлғаларды таңдасақ. Ісі мен сөзі сай келетін депутаттыққа лайық азаматтарды іріктеуіміз қажет. Шатастырмайық. Қоғамның деңгейі өсетін уақыт келді.
- Ongar_onlaine telegram арнасы
Парламент
САЙЛАУЫНА
қатысамыз!
- Елде парламент сайлауы жарияланды. Биыл мәжіліске тек қана партиялық тізіммен емес, жеке округтер бойынша мажоритарлы жүйемен өтуге де болады.
Соңғы үш жылдан астам уақыт бойы күрессек те, билік біздің партияны тіркеген жоқ. Құрылтай съезін өткіземіз дегенде, түрлі арандатуларды ұйымдастырып, ондаған белсендімізді пойыздан түсіріп, ақыр соңында жиынымыздың шырқын бұзды.
Бірақ бұл – күрес тоқтады деген сөз емес. Алдағы уақытта біз Демократиялық партияны ресми тіркеуден өткізу жұмысын қайта жандандырамыз.
Ал қазіргі айтпағымыз: Демократиялық партияны құру жөніндегі ұйымдастыру комитетінің белсенділерімен ақылдаса келе, белгілі сарапшылармен, саясаттанушылармен кеңесе отырып, біз алдағы парламент сайлауына қатысамыз деген шешім қабылдадық! Мәжіліс сайлауына тек қана Алматы қаласы бойынша емес, Қазақстанның басқа да өңірлерінен азаматтар қатысады деген байламға келдік.
Парламент атқарушы биліктің айтқанын орындап, дегенін жасап отыратын нотариус болмауы тиіс. Парламент халыққа қажетті заң қабылдайтын, елдік, ұлттық мүддені қорғайтын, ақиқатты айтатын биік мінбер болуы керек! Барлық демократиялық елдерде солай.
Алдағы уақытта кандидат ретінде құжаттарымызды тапсырамыз, ресми түрде тіркеуден өтуге талпынамыз. Барлығын ашық түрде сіздерге хабарлап, көрсетіп отырамыз. Бізбен бірге болыңыз, ағайын!
Инга ИМАНБАЙ
- Редакциядан: Қаңтар үшін қиянатты болып, үйқамақта отырған Демпартия жетекшісі Жанболат Мамайдың жары Инга Иманбай дүйсенбі күні Алматы қаласындағы № 3 сайлау округі бойынша депутаттыққа кандидат ретінде тіркелуге өтініш берді.
САЯСИ ОЛИМПТЕ
Ертісбаевтай суайт
БОЛҒАН ЕМЕС…
- Мемлекет үшін жемқор ұры қауіпті ме, жоқ әлде принципсіз алаяқтың зияны көбірек пе? Меніңше, принципсіз адам әлдеқайда қауіпті.
Неге дейсіздер ғой? Ұрыны ерте ме, кеш пе ұстап, жазасын беруге болады. Оның қылмыстық іс-әрекеттерінің ізі міндетті түрде қалады. Келтірген шығынын да қарапайым математикалық әдістермен өлшеп-санау қиын емес. Ал ұстанымы мың құбылатын, бүгін былай, ертең олай сөйлейтін, кешегі сөзінен ертесіне-ақ тайқып шыға келетін адамға Қылмыстық кодексте жаза қарастырылмаған. Ондай бап кодексте жоқ.
Солай бола тұра, принципсіз суайт билікке келсе, мемлекетке де, қара халыққа да анағұрлым көп залал әкеледі. Оның екіжүзді табиғаты, сөздерінің тұрақсыздығы елді әбден адастырады. Қалың бұқараны алжастырып қана қоймай, тұтастай мемлекетті бос әуре-сарсаңға салып кетеді.
- ҚР президентінің кеңесшісі Ермұхамет Ертісбаевтың «Время» газетінде (28.12.2011 ж.) шыққан «Я слежу и за метлой, и за оппозицией» деген сұхбатына салынған сурет.
Сондай, өзі де, сөзі де пәтуәсіз, заманына қарай мың құбылатын хамелеонның ең айшықты үлгісі Ермұхамет Ертісбаев дер едім. Қазақстанның саяси олимпінде дәл Ертісбаевтай суайт болған емес. Саяси аренада жүрген 30 жылында оның платформасының, соған сәйкес риторикасының қанша рет өзгергенін санау үшін екі қолдың саусағы да жетпес. Бірінші президентпен нарықтық экономиканы қолдап, коммунистік өткенге аузы көпіргенше лағнет айтудан шаршамаған ол бүгінде сол коммунистердің партиясын басқарып отыр. Бүгін партияның съезін өткізіп, сайлауда 30–40% алып, жеңіске жетсек, парламентке өзім бастап барамын депті.
Сізге қайдам, менің түсінігімде ондай адамның парламентте отырғаны – үлкен қауіп. Не өз ұстанымы жоқ, не елге ұсынары жоқ, партияға да қатардағы мүшелердің дауыс беруі арқылы емес, жоғары жақтың пәрменімен келген саясаткер-сымаққа қандай сенім болуы мүмкін?
Айтпақшы, бір қызық айтайын. «Қазақтарда мемлекеттілік болған жоқ» деген пікірді бірінші болып Путин немесе Назарбаев айтты деп ойлайсыздар ма? Жоқ, олай емес екен. Ол идеяны алғаш тықпалаған дәл осы Ертісбаев. Сенбесеңіздер, сонау 2008 жылы Закон.кz сайтына берген сұхбатын оқып көріңіздер.
Түйінді өздеріңіз шығарарсыздар.
Мұхтар ТҮМЕНБАЙ
ДУМАН думаннан ҚАЛДЫ
- Алматы облысы Қаскелең қаласындағы № 12 бірмандатты сайлау округі журналист, YouTube-тегі «ND» каналының авторы Думан Мұхаммедкәрімді заң талаптарына сай емес деп, мәжіліс сайлауына үміткер ретінде тіркемей қойды, деп хабарлайды «Азаттық».
Комиссия журналист ел ішінде сегіз ай еш жерде тіркеуде тұрмаған деп отыр. «Алматы облысы бойынша полиция департаментінің көші-қон қызметі басқармасының (ПД КҚҚБ) жауабына сәйкес, кандидат Думан Мұхаммедкәрім Астана, Орал, Көкшетау қалаларында, Ақмола мен Алматы облыстарында тіркеуде болған. 2021 жылғы 21 желтоқсаннан бастап, тіркеуден алып тасталған. 2022 жылғы тамыздан қазіргі уақытқа дейін Алматы облысының Іле ауданында тіркелгені анықталған. Алматы ПД КҚҚБ-сы
көрсеткен мәліметтер негізінде кандидат Мұхаммедкәрімнің өтінішін Конституцияның 51-бабының 4-тармағында белгіленген талаптарға сай қанағаттандырмаған (Ел аумағында 10 жыл тұрақты тіркеуде тұру талабы). Яғни, кейінгі 10 жыл ішінде еліміздің аумағында тұрақты тұру талабына сәйкес емес», – деді комиссия төрайымы Ұлтусын Бархинова.
Комиссия отырысын журналист Мұхаммедкәрім өзінің «ND» арнасында жария етті. Комиссия отырысында журналист бұған келіспейтінін айтқан, алайда отырысқа қатысып отырған көші-қон қызметінің өкілі Мұхаммедкәрім «сегіз айдай база бойынша тіркеуде болмаған» деп қысқа қайырды. «Келіспесеңіз, әрине, сотқа беруге құқығыңыз бар», – деді комиссия төрайымы Бархинова.
Журналист комиссия шешіміне қарсы және бұл шешімнің «саяси астары бар» дейді.
«Кейінгі 10 жыл ішінде еліміздің аумағында тұрақты тұру» талабына сәйкес емес деуі – заңсыз. Мен журналиспін, бірнеше қалада тұрғаным рас. Дегенмен мен ел ішінде тұрдым ғой. Негізгі тіркеуім – Алматы облысы Іле ауданында, тұрақты түрде. Ал жұмыс бабымен өзге қалаларда тұрғанда, сол жақта уақытша тіркеуге тұрып келдім. Бұған дейін Астана қаласында пәтер жалдап тұрғанымда, пәтер иесі мені уақытша емес, тұрақты тіркеуге қойған екен. Сөйтіп, мен пәтерден шығып кеткеннен кейін, мені тіркеуден де шығарып жіберген. Мен оны кейін көлік алғанда, арада сегіз ай өткенде бір-ақ білдім. Көші-қон қызметі айтып отырған «сегіз ай базада болмауымның» себебі – осы», – дейді Думан Мұхаммедкәрім.
Журналист комиссия шешімінің үстінен сотқа шағымданбақ. Бірақ «ол шағымымды сот қарап біткенше, қайта құжат тапсырып үлгермеуім әбден мүмкін» деп отыр.
Бірнеше жыл мемлекеттік телеарнада жұмыс істеген Думан Мұхаммедкәрім кейінгі жылдары YouTube желісіндегі «ND» арнасының авторы ретінде қоғамдық-саяси мәселелерге байланысты хабарларымен танылған. Ол арнасында Қаңтар оқиғасы туралы видеолар жариялап келеді.
