• Қазақстанда олигархтық капитализмнің заманы өтті, деп ескертті президент Қасым-Жомарт Тоқаев (ҚазТАГ).

«Мемлекет елімізде жұмыс істейтін барлық ірі өндіруші компаниялардың қызметін өте жіті бақылайды. Біз капиталды шетелге заңсыз шығаруға жол бермейміз. Олардың түрлі әлеуметтік бағдарламаларды жүзеге асыруын қадағалап отырамыз», – деді Тоқаев кеше Қарағанды облысына жасаған жұмыс сапары барысында.

Оның айтуынша, өндірісті жаңғырту үдерісіне, экологияны қорғау ісіне ерекше назар аударылады. «Салық төлемақысы ерекше бақылауда. Егер ірі өнеркәсіп кәсіпорындары бұл талаптарға сай келмесе, біз серіктестікті тоқтатуға мәжбүр боламыз. Бұл – ешқандай қорқыту емес, керісінше, бүкіл өркениетті әлемде қабылданған қарапайым, адал және әділ жұмыс ережелері. Қазақстанда олигархтық капитализмнің заманы өтіп, ел азаматтарының алдындағы әлеуметтік жауапкершілікті сезінетін кезең жетті. Азаматтарымызға тиімді әрі әлеуметтік жауапкершілікті сезінетін, ел экономикасында жетекші орындағы бизнес керек», – деді Тоқаев.

Дегенмен қазақстандық олигархтардың заманы бітті дегенге күдік келтіретіндер бар. Мәселен, белгілі қазақстандық қайраткер Қайрат Жолдыбаев өзінің ФБ-парақшасында былай деп жазады: «Мен мынаны түсінбеймін. Олигархтарға қылмыстық іс қозғалмаса, олардың шетелде тыққан қаржыларын қандай заңды негізбен елге қайтармақ? Жоқ әлде өзара келісіммен қайтармақ па? Солай болған жағдайда әділдік қайда қалады?».

Дұрыс пайым! Назарбаевтық олигархтарды «құртып бітіру» үшін, ең алдымен олар ұрлық жолмен шетелге тыққан капиталды елге қайтару керек еді. Сонда ғана қазақстандықтар олигархтар заманының біткеніне кәміл сенеді.

ДАТ-информ

Болат «Барыстан» АЙЫРЫЛДЫ

• Алматы қаласының мамандандырылған ауданаралық экономикалық соты «Найза-БН» компаниясының жарғы капиталындағы мемлекет үлесін сатып алу-сату туралы келісімшарттың күшін жойды. «Бұл компания «Барыс-4» ірі көтерме базарының иесі деп көрсетілген» деп хабарлайды Алматы сотының баспасөз қызметі.

Сот прокуратураның «Барыс-4» көтерме базары жекешеленгенін заңсыз деп тану туралы талап арызын қанағаттандырған. Қаржы министрлігінің ақпаратына қарағанда, «Найза-БН» құрылтайшыларының бірі – Қазақстанның бұрынғы президенті Нұрсұлтан Назарбаевтың інісі Болат Назарбаев.

Талап арыз түсіруге «заңды тұлғаның жарғы капиталындағы мемлекет үлесін жекешелендірген кезде өкілетті мемлекеттік органдардың заңсыз жеңілдіктер мен басымдықтар бергені» негіз болған. «Сот талқылауы кезінде талап арызда келтірілген уәждер дәлелденді» дейді сот хабарында.

Жергілікті БАҚ мәліметіне қарағанда, базар бір жарым миллион долларға (үш миллион долллардан астам) бағаланған, бірақ оны небәрі 307 миллион теңгеге (640 мың доллар шамасы) сатқан.

Сот шешімі әзірге күшіне енбеген.

Orda.kz порталының мәліметіне қарағанда, бұрын базар сатушылары «базардағы монополия жөнінде арызданған». Экономикалық ресурстардың заңсыз шоғырлануымен күрес жөніндегі комиссия биыл шілде айында базарды мемлекетке қайтаруды көздеп отырғанын айтқан.

Tengrinews.kz басылымының хабарлауынша, ақпан айында көтерме базар сатушылары «базар әкімшілігі базарға тек өздері қалаған фирмалардың өнімдерін кіргізеді» деп шағымданған. Олардың сөзінше, соның салдарынан кейінгі бес жылда сауда айналымы күрт төмендеген. Алматыдағы «Алтын Орда» базарын да Болат Назарбаевпен байланыстырады.

Azattyq.org

 

 

ПАТРИОТ БЛОГЕР НЕГЕ ҚАМАЛДЫ?

• Павлодар қаласына Ресейдегі мобилизациядан қашып келгендерге «Қырым кімнің жері?» деген сұрақ қойған қоғам белсендісі Диас Құзайыров 5 тәулікке қамауға алынды, деп хабарлайды «Азаттық».

Қазанның 3-і күні кешке Павлодар қаласының мамандандырылған әкімшілік соты Диас Құзайыровты Әкімшілік құқық бұзушылық туралы кодекстің 434-бабы, 1-бөлімі бойынша («Ұсақ бұзақылық») айыпты деп танып, 5 тәулікке қамау туралы шешім шығарған. Сот қаулысында «Диас Құзайыров қоғамдық орында шу шығарып, өзге адамдарға күш көрсетіп, қорлап, ұйымдастырушыларға балағат сөз айтқан» деп жазылған.

Ресейдегі мобилизациядан қашып келген азаматтарға 27 қыркүйекте жергілікті кәсіпкерлер мейрамханада түскі ас берген. Павлодар кәсіпкері Айдар Құрымбаев көрші ел азаматтарына «қазақ халқының қонақжайлығын көрсеткісі келетінін» айтқан. Ұйымдастырушылар мейрамханаға «Азаттық» тілшісін кіргізбеген.

Түскі ас берушілер мен Диас Құзайыровтың арасында мейрамхана сыртында жанжал туып, сөз қағысқан. Белсенді полиция шақырған. Алайда ертеңіне полиция қарсы тараптың да арыз жазғанын хабарлаған, деп хабарлайды «Азаттық».

Ал «ДАТ»-қа хабарласқан керекулік ұлт патриоты Руза Бейсенбайтегінің сөзіне қарағанда, іс-шараны ұйымдастырушылардың бірі белсендіні «ұлтшыл, халық жауы» деп айыптаған.

«Оқиға былай болған, – дейді Руза. – Біздегі бір ресторанның қожайыны, жас қазақ жігіті, қазақшаға судай, келімсектерге дастархан жайды. Соған Диас та, мен де барғам. Блогер ретінде келімсектерге алдын ала ескертіп: «Мен блогермін, сіздерге сұрақтар қояйын деп едім», – деп, Украинадағы соғысқа қатысты сұрақтарды қояды.

Сол кезде бір орысқұл мәңгүрт мені де, Диасты да «нацист» деп, видеоға түсірді. Сосын Диас полиция шақырады, «ұлтшыл» дедің деп. Әлгі қатын да арыз жазады, «қонақтармен кикілжіңге барды» деп. Ең қызығы – полиция Диастың арызын қараусыз қалдырды да, өзін абақтыға жапты. Ал қазақ халқының мүддесіне қарсы шыққан қатын бостандықта сайрандап жүр».

Диас Құзайыровтың адвокаты Әскербек Кәкімов сот шешімімен келіспейтінін айтты. Оның сөзінше, сот дәлелдерді ескермеген. «Диас ешкімге тіл тигізген жоқ, Ресейден келгендерді қуған жоқ. Ұйымдастырушылар оған жала жауып отыр. Оның барлығы Диас түсірген ютуб-арнадағы тікелей эфирінде тұр. Сондықтан сот қаулысына шағым жасадық», – деді ол.

Еске салсақ, Павлодар белсендісі, блогер Диас Құзайыров биыл Қаңтар оқиғасы кезінде митингіге қатысып, 15 тәулікке қамауға алынған еді. Ал Youtube желісінде жариялаған видеода Диас Құзайыровтың Ресейден келген екі азаматқа «Қырым кімдікі?», «Павлодар кімдікі?» деген сұрақ қойғаны көрінеді. Ресей азаматтары «Қырым да, Павлодар да сонда тұратын адамдардікі» деп жауап берген. Бұл видео әлеуметтік желіде жылдам тарап, қоғамда резонанс тудырған.

Ендеше павлодарлық полицайлар мен сот кімнің түртпегімен тәуелсіз блогер азаматты абақтыға қамады? Бұған ақордалық идеологияның тұтқасын ұстаған Ерлан Карин мырза не деп жауап берер екен?

Қазақстанның цифрлық даму, инновация және аэроғарыш өнеркәсібі министрі Бағдат Мусиннің ресми ақпаратына қарағанда, 21 қыркүйектен бері 70 мыңға жуық ресейлік Қазақстанда «ЖСН» алған. «Біздің міндетіміз – ресейлік азаматтарға ЖСН беру, бізге ел ретінде олардың келуін біліп отыру, заң бұзушылықтарын анықтау және оларды тіркеу маңызды. Біз оларға нөмер беру арқылы оны барлық мәліметтер базасына енгіземіз», – деді Мусин сейсенбі күні үкімет кулуарында. Ол атап өткендей, мемлекет ресейліктерге ЖСН беру үшін төлем жасамаған, ол шығынды операторлар көтеріп отыр.

Бейресми деректер бойынша, Ресейден Қазақстан шекарасы арқылы өткен, путиндік мобилизациядан қашқан ресейліктердің саны 200 мыңнан асып кеткен. Ал қазақстандық билік «қашқындардың» бұл жөңкілуіне қарсы ешбір әрекет жасамай отыр.

Айсұлу ОСПАН,

«D»