Ермұрат Бапи, ҚР Парламенті Мәжілісінің депутаты:
ҚР Премьер-министрі Олжас Бектеновке!
Мен бүгінгі депутаттық сауалымда Президент Қасым-Жомарт Тоқаевтың кешегі кеңейтілген үкіметтік отырыста сөйлеген сөзін конспектілік тезис тәрізді тізіп шыққандай болуым мүмкін. Себебі – ел Президенті мемлекеттік жанашырлықпен қозғап, Үкіметке қадау-қадау міндет қылған біраз мәселенің ішінде елдің жалпы экономикасына драйвер болатын бірер тақырыпты өте маңызды деп санаймын. Бұл – кадр мәселесі.
Президент Үкіметке айқындап берген бес міндет: «…ірі инфрақұрылымдық жобаларды, цифрландыру және жасанды интеллект, ядролық энергетиканы дамыту, агроөнеркәсіп кешенін нығайту және инвестиция тарту мәселелерін» – жалпы алғанда, барлық экономикалық түйткілдердің тетігін тек бюджеттен түсетін тегін ақша мен инвестиция ғана емес, бірінші кезекте соның көзін табатын кадр шешеді.
Тағы да Президенттің сөзімен айтсақ, «экономиканың дамуы жаман емес» болмаса да, оның қарқынына мемлекет басшысының көңілі толмайтынын білдік. Бірақ Президент жоғарыда аталған бес мәселені алдағы бес жылда орындау міндетін қойып отыр. Еске сала кетейік, алдағы бес жылмен президенттік құзіреттің жеті жылдық мерзімі де шектеледі. Яғни, Президент Тоқаев – өз мойнына алған міндеттердің орындалғаны жөнінде халық алдында рапорт беріп кетуге түбегейлі оқталған адам.
Ендеше «оқталған адамның» талабы да, кәрі де қатты боларын үдірейген Үкімет қапер қылуы керек! Бұл мақсаттың мүлтіксіз және сөзсіз орындалуы Президентке парыз болса, Үкіметке үлкен міндет болмақ. «Алға қойылған міндеттерді жүзеге асыру үшін, тұтас мемлекеттік аппарат тиімді жұмыс істеуі тиіс. Мемлекеттік аппараттың басты міндеті – азаматтарды толғандыратын өзекті мәселелерді шешу. Ол үшін ең алдымен азаматтармен ұдайы байланыста болу керек. Онсыз болмайды». Бұл да Президенттің сөзі.
Президенттің сөз әлпетінен аңғарар болсақ, қоғамдық қотырдың қышуын басатын, «азаматтармен ұдайы байланыс» орнататын бұл міндеттерді кім орындайды? Әрине – кадр! «Кадр бәрін шешеді!» деген атақты тәмсіл барын тағы да білеміз.
«Бізге ең алдымен білікті және ел мүддесін ойлайтын отаншыл кадрлар керек. Дәл осындай мамандарды тауып, оларды басшылық лауазымдарға тағайындаймыз», – деді Президент. Нығыз айтты, талап қылып айтты. Мұндағы тірек (ключевое) сөз – «табамыз»! Табатын – әрине, Үкімет пен Президент әкімшілігі. Ал «басшылық лауазымға тағайындалатын» мұндай кадрларды алыстан немесе Марстан іздеу қажет емес. Олар біздің жанымызда жүр. Президент айтқандай, жауапкершілікті мойнына ала алатын, отаншыл, мемлекетшіл, ұлттық мүдде жолында жанын салатын, халықтық-либералдық ұстанымы табанды азаматтар баршылық.
Ендеше, Олжас Абайұлы, бірінші кезекте ел мүддесін ойлайтын ондай оғлан азаматтарды ең алдымен бизнестен және азаматтық қоғамнан іздеу керек! Президент айтқандай, оларды жауапты лауазымға батыл тағайындау қажет! Мемлекеттік аппаратта жылжымай, жылдап отырған, лауазымдық жауапкершіліктен бұрын, жеке басының қауіпсіздігін күйттейтін, «сауысқаннан сақ», әбден сүрленіп кеткен бұрынғы бюрократқа қарағанда, бізге елдегі өзгерістің бойына балғын қан жүгіртетін жаңа кадр қажет.
Айтпақшы, ондай «сен – тұр, мен – атайын» дейтін жұлынып тұрған және өзінің елін Президентпен бірге өзгертуге құлшынысы қайнап тұрған жастар осы залда да отыр. Мен оларды өз көзіммен күнделікті көріп жүрмін (парламенттік партада қатар отырған Жанарбек Әшімжан, Елнұр Бейсенбаев, Ринат Зайытов). Олар нағыз президенттік талапқа лайық жігіттер!
Ең бастысы – былықпен былғанбаған, азаматтық ерік-жігері таза, жаңа кадрды мемлекеттік органның шарығында шыңдап, оты мен шоғына «қақтап» алып, нағыз мемлекетшіл тұлға қалыптастыру – халықтық қажеттілік болса керек!
Сонымен бірге қоғам мен бизнестен немесе жоғары мектептен келген кадрлар қоғаммен батыл және шынайы сөйлесе алады. Олар мансап пен лауазымдық құзіретін қорғаштап, отырған орнына қауіп төндіруі мүмкін қорқыныштан қаймықпайды, билік мен қоғамның арасына батыл буфер бола алады. Қоғамға іскерлігімен, бизнестегі жетістігімен, мемлекетшіл азаматтық ұстанымымен танылған азаматтар елдегі әлеуметтік-тұрмыстық түйткілдерге қатысты дүрмекті дабырасыз диалог үстелі басында шешуге әлдеқайда қабілетті келеді.
Сондықтан, Олжас Абайұлы, «отаншыл мамандарды тауып, оларды басшылық лауазымдарға тағайындаймыз» деген президенттік тапсырманы Үкімет мүшелеріне міндет етіп қойып, оның орындалу нәтижесін үнемі тексеріп отыруды сұраймын!
Президент өз сөзінде айтқандай, «Ақпараттық жұмыс уақтылы әрі сапалы жүргізілген жағдайда көптеген мәселені, соның ішінде қоғамда дүрбелең тудырған түйткілдерді ушықтырмай» шешуге бел шешіп кірісетін мемлекеттік қызметкер – ол, бірінші кезекте, қоғам мен бизнестен келген кадр деп білем.
«Бізге нақты нәтиже керек. Нәтиже болса ғана даму болады», – деді ел Президенті өз сөзін қорытындылай келе. Ол нәтижені білікті, білімді және батыл шешімдер шығара алатын отаншыл кадр ғана жасайды.
