Шығыс күнтізбесі бойынша 2021 жылдың 12 ақпанында кіретін Сиыр жылы сізге не береді? Жұлдызнамашылардың көмегімен «ДАТ» дайындаған жоралғы не дейді?
ТЫШҚАН
- Талғат АЯН, Тоғжан ҚОЖАЛИЕВА, Владимир КОЗЛОВ, Мейіржан ТЕМІРБЕК.
Жыл басын иемденіп алған «қу тышқандар» үшін бұл жылы біраз қиындыққа төзуге тура келеді. Ұсақ-түйек «тышқаншылаған» тірліктің өзі үлкен мәселеге айналып кетпесін десеңіз, күйгелектене көрмеңіз. Қызмет-кәсібіңізге қатты назар аударуға тырысыңыз: осы ғана сізге сәтті бағыт болады. Бизнес пен қаржы саласында Тышқандар қатты қиналмайды, өйткені Сиыр оған сенімді серіктес болады. Әсіресе шығармашылық адамының екінші тынысы ашылады.
СИЫР
- Макс БОҚАЕВ, Асылхан МАМАШҰЛЫ, Мұхтар ТАЙЖАН, Серғазы МҰХТАРБЕК.
2021 жыл – Сиырлар үшін мүшел жас. Олар біртоға, оңайлықпен сөз өтпейтін болғанымен, бұл жылы қастасқан адамның «жағасында қолы кетеді». Сиыр – сенім мен сабырдың иесі, сондықтан жылдан жамандық күтпеңіз. Зеңгі баба тұқымын қызмет бабында көптеген өзгерістер күтіп тұр. Сіздер үшін бұл жыл көптеген қызығымен есте қалмақ. Ерінбей еңбек етудің арқасында көптен күткен іс оң шешімін табады. Сондықтан желге қарсы жүруден қаймықпау керек.
БАРЫС
- Досым СӘТПАЕВ, Даная ҚАЛИЕВА, Қазыбек ИСА, Сұлтанхан АҚҚҰЛЫ.
Өзіне сенімді Барыстар өте сақ және бәрін есеппен істеуі керек. Ойға алған жоспарын жүзеге асыру үшін ақыл-кеңес беретін адам іздейді.Олар өзгеге деген бар жақсылығын аямайды. Бұрынғы кедергі болған мәселелерді жеңіп, ойына алған іске тәуекел етеді. Бойында байқалмай жүрген таланты ашылып, елді аузына қаратады. Бұл жолда барлық күші мен мүмкіндігін салады. Бірақ денсаулығын күтіп, ескі сырқаттың алдын алған жөн болады.
ҚОЯН
- Айман ТҰРСЫНХАН, Оңғар ҚАБДЕН, Рысбек СӘРСЕНБАЙҰЛЫ, Серік ӘБДІРАХМАНОВ.
Қояндар әдеттегідей жан-жағына күдікпен қарайды. Біраз достары сенімінен шығады. Жұмыстан басқа дүниенің бәрін кейінге ысырып, Сиыр жылында жаңа салаға қызығушылық танытады. Жаңа жыл «қитарлар» үшін тосынсыйға толы болады. Бірақ ол сыйдың жағымдысымен қатар, жағымсызы да бар. Мәселен, жақыным деп жүрген жандарыңыз күтпеген жерден сан соқтырып кетуі мүмкін. Секемшілдігіне қарамастан, Қояндар айналасын ерекше көзқараспен таңдандырады. Махаббат сезіміне бөленеді.
ҰЛУ
- Ерлан ҚАРИН, Әкежан ҚАЖЫГЕЛДИН, Виктор КОВТУНОВСКИЙ, Жанарбек ӘШІМЖАН.
Жүрісі маңдымайтын Ұлулар Сиыр жылында сәттілікке қол жеткізеді. Қызметтегі табыс, саяхат жасау – биылғы жылдың еншісінде. Жыл басында көптен берi қолға алған iсiн аяғына дейiн жеткiзеді. Мазалап жүрген қаржы мәселесін жыл басында реттеп алғаныңыз жөн. Соның арқасында қазынаңыз біраз майланып қалады. Дәулеті молайып, көңілі орнына түседі. Бұл – тек өзіне ғана, өз күші мен мүмкіндігіне сенетін Ұлуға тән. Өз мүмкіндігіңізді жіберіп алмаңыз.
ЖЫЛАН
- Әлнұр ІЛИЯШЕВ, Сергей ДУВАНОВ, Инга ИМАНБАЙ, Уәлихан ҚАЙСАРОВ.
Сиыр Жыланды жақтырмайтынына қарамастан, қалағанына қол жеткізуіне кедергі болмайды. Жыланның қулығы мен айласы түрлі жағдайларға итермелейді. Бір қарағанда, жаңа жыл сіздің ырқыңызға бағынатындай көрінуі мүмкін, бірақ сізге от тигізсе, лап етіп тұтанғалы тұрған май секілдісіз. Сондықтан бұл жылы барынша салмақты болуға тырысыңыз. Жоспарды, мақсат пен міндетті қайта қарауға тура келеді. Жыл аяғында асығыңыз алшысынан түсіп, үлкен табыс пен жақсылыққа кеңелуіңіз мүмкін.
ЖЫЛҚЫ
- Марғұлан СЕЙСЕНБАЙ, Арайлым НАЗАРОВА, Сейтқазы МАТАЕВ, Әділ ТОЙҒАНБАЕВ.
Сиыр – Жылқыны қолдайды. Бірақ қолдайды деп, қол қусырып отырмаңыз, қоңыр желістен шабысқа көшкен дұрыс. Өзіңізге тиесілі несібені тартып алмасаңыз, ауыздағыдан айырылуыңыз мүмкін. Биыл сіздерге мөлшерсіз ақша жұмсап немесе біреуге қарыз беруге болмайды. Бұрынғы досыңыз көп көмек береді, қиын мәселені шешуге қол ұшын береді. Сырттай жанашыр болған адамдардың ілтипатына кенелесіз. Табиғат аясында көбірек қыдырыңыз, денсаулыққа көңіл бөліңіз.
ҚОЙ
- Баян РАМАЗАНОВА, Евгений ЖОВТИС, Ырысбек ТОҚТАСЫН, Анар РАҚЫМЖАНОВА.
Ішкі дауысыңызды көбірек тыңдаңыз, өз шешіміңізге көбірек сеніңіз. Қызметте өзгерістер болуы мүмкін, жаңа ұсыныстан жалтармаңыз, батыл болыңыз. Шопан ата тұқымы үшін сынға толы жыл келді. Сол себепті кейбір жағдайлардың тәуекелге итермелеуіне қарамастан, абай болғаныңыз жөн. Жалқаулықты жеңуге тырысыңыз – салғырттық Сиырға серік бола алмайды. Қаржы мәселесін шешу сіздің емес, өзгелердің қолында. Аса қымбат мүлік сатып алуды кейінге қалдырыңыз.
МЕШІН
- Айдана АЙДАРХАН, Өміржан ӘБДІХАЛЫҚ, Сағат ЖҮСІП, Амангелді КЕҢШІЛІКҰЛЫ.
Жыл иесі – Сиыр Мешінде туғандарды жаны сүйеді. Сәнқой, ырду-дырдуы, көңілді бас қосуларды ұнатады. Өзін өзгелерден артық санайды. Жыл басында көптен берi қолға алған iсiңiздi аяғына дейiн жеткiзесіз. Сиыр жалғызбастылар үшін өз жұбын табуға қолайлы жағдай туғызады. Сіздің назды қылығыңыз бен сыршылдығыңыз махаббат әлемінде өз көмегін тигізеді. Сиыр жылында табысқа кенелтетін жаңа жұмыс орны сізді күтіп тұр. Қапы қалмаңыз!
ТАУЫҚ
- Серікжан МӘМБЕТАЛИН, Бэлла ОРЫНБЕТОВА, Сәния ТОЙКЕН, Әсел ҚАРАУЫЛОВА.
Жаңа жыл Тауық жылы туғандарды игілік пен мол табысқа кенелтеді. Әйткенмен оған жету жолы маңдай терді талап етуі мүмкін. Жыл басы аса қиын соғады. Жүктелген міндеттің көптігінен мезі боласыз. Одан қорқудың қажеті жоқ. Көктем бастала сала, өз өміріңізді реттеп, қалаған жұмысыңызбен айналысуға мүмкіндік туады. Әріптестерді таңдау еркі өзіңізге бұйырады және одан қателеспейсіз. Қай іске кіріссеңіз де, түбінде одан жеңімпаз болып шығасыз.
ИТ
- Қайрат МИРАШЕВ, Бәшір ЖАНАЛТАЙ, Сейдахмет ҚҰТТЫҚАДАМ, Геннадий КРЕСТЬЯНСКИЙ.
Ит жылы туғандар Сиыр жылы жақсы жаңалыққа кенеледі. Тұрақтылыққа үйренген Ит жылғылар өмір сүру ырғағын аздап өзгертуіне тура келеді. Жұмыста немесе отбасында кикілжіңдер туындап жатса, ақылыңыз бен шыдамдылығыңызға сенім артыңыз. Бұрыннан армандап жүрген көлікті алып, баспаналы боласыз. Жұмыс ауыстыруды көздеп жүргендерге жаңа жол ашылады. Бірақ Иттер өзі ойлаған жоспарын жария етпегені дұрыс.
ДОҢЫЗ
- Ринат РАФХАТ, Жанат ЕСЕНТАЕВ, Берік ӘБДІҒАЛИЕВ, Ермұрат БАПИ, Қанат ТӨРЕБАЙ.
Сиыр Доңыздардың айын оңынан тудырады. Сіздің болашағыңыз осы жылғы жұмыстарға тікелей байланысты. Ақшаны қалай оңай тапсаңыз, жұмсалуы да солай болады. Сол себепті қаржылық үнемге ерекше көңіл аударыңыз. Қарыз бен несиеге жоламауға тырысыңыз. Отбасыңыздың да қам-қарекетін қамдап қоюды ұмытпаңыз. Сондай-ақ талпақ танаудың өзіне қатысы жоқ жұмыстардан аулақ жүргені жөн. Жақын жандарыңызға көңіл бөліп, сезім беріктігін сақтай түсіңіз.
“D”