- Сурет «ВКонтакте» желісінен алынды.
Қазақтың киелі жері – қасиетті Торғай өңірі 2017 жылдан бері зымырандардың сынақ алаңына айналған. Енді, міне, таяуда халықпен ешбір санаспастан, зымырандарды сынақтан өткізу үшін, Торғай өңірінің 76 мың ш/гектарын Ресейге жалға берді. Бүгінге дейін Торғай даласына 4 рет зымыран қалдығы құлап, қазірдің өзінде Торғай халқы оның залалын көріп жатыр. Ауру көбейіп барады. Әсіресе қатерлі ісік, онкоаурулар (рак) меңдеп бара жатыр, малдан мутант төл тууда.
Министр Атамқұловтың Торғайға келіп, ат төбеліндей ақсақалдар алдында бұл еш зардапсыз, зияны жоқ дегені –өтірік, алдамшы сөз болып шығуда. Керек десе, сол ақсақалдардың тұтас Торғай уәлаяты халқының атынан келісім беретіндей құқығы жоқ! Бүкіл халықтың игілігін көздейтін маңызды шешімдер тек қана халықтың қалауымен шешілуі тиіс!
Бабаларымыз найзасының ұшымен қорғап, ұрпағына мұра еткен ұлан-ғайыр жерін бүгінде қалауынша «жалға берушілер» мен «жалға алушылар» саудаға салып келеді. Зымырандар сынағын өткізіп, оның қалдықтарын Жер-Анамыздың жүрегіне қадап, тұнығымызды лайлауда.
Бабаларымыздың қасиетті өлкесі зымырандардың сынақ алаңына айналып, оның уын қазақ ішіп, пайдасын Ресей көрмек. Талай ұлт көсемдері мен батырлар шыққан, сахарада мектеп қоңырауын соғып, Алтынсариннің Торғайда ашқан мектебінің алдынан өткен Ахмет Байтұрсын, Міржақып Дулат сынды Алаш ардақтыларын, елі үшін жанын пида еткен Шақшақ Жәнібек, Амангелді, Кейкі сынды батырларды берген киелі, дархан Торғай топырағында зымырандар қалдығы құлайтын полигон салу туралы ұйғарымды халықтан асып қабылдауға ешкімнің құқы да, қақысы да жоқ!
Жер – тек қана мемлекеттің меншігі! Ал мемлекет иесі – халық. Ендеше бұл жерде сынақ өткізуді, зымыран ұшыруды шеше алатын да тек халық. Торғай полигонына қарсылық – еріккеннің ісі емес, елдік мүдде мен болашақ ұрпақтың саулығы үшін, келешек үшін жасалған қадам. Сынақ алаңындағы ауылдарға жол тартып, су жүргізіп, фельдшерлік орын ашамыз деген желеу-сылтаумен келіп, зиянды зымыран сынағын өткізбек. Біле білсеңіздер, су тартып, жол салу, медициналық қызмет көрсету – мемлекеттің тікелей міндеті. Ресейге сол полигон қажет болса, өз жерінде ашып, бермекші болып отырған өтемақыларын өз азаматтарына берсін!
Егер осы қабылданған шешімдер кері қайтарылмаса, бұл жағдай Торғай өңірінің тұрғындары мен барлық қазақстандықтарды толқытып, алаңға шығуына мәжбүр етпек.
Петицияға қолдау көрсеткен қоғам қайраткерлері:
Серік Тұрғынбеков, Төлен Әбдік, Сәбит Досанов, Қойшығара Салғара, Балташ Тұрсынбаев, Рысбек Сәрсенбай, Тұрсын Жұртбай, Жанкелді Шымшықов, Уәлихан Қайсаров, Еркін Рақышев, Қайырлы Омар, Әкім Ысқақ, Жекен Абдрахманов және басқалар.
Қазақ болғанымыз үшін ҚОР БОЛЫП ЖҮРМІЗ!
- Қадірменді ұлтшыл азаматтар мен тіл жанашырлары! ШҚО облыстық және қалалық маслихаттары депутаттары! «Нұр Отан» партиясы! Журналистер мен блогерлер! Адамдардың өмірін құтқарып жүрген біздің ұжымды құтқаруға көмектесіңіздер!
Сіздерден Өскемен қаласы жедел жәрдем станциясы ұжымындағы жас маман-медиктер көмек сұрайды. Станция қызметшілерінің 70 пайызы – қазақ жастары. Оның ішінде қазақ мектебін бітірген, медициналық колледждің қазақ бөлімін бітірген мамандар өте көп. Соған қарамастан, қазақ елінің жедел-жәрдем станциясында қазақ тілінде бір ауыз сөз жоқ, жиналыстар, нұсқаулықтар, медициналық құжаттар – орыс тілінде. Және де қазақ тілінде колледж бітірген мамандарға құжаттарды қазақ тілінде толтыруға мүмкіндік бермейді. Басшылық қазақ тіліне ашық қарсы саясат жүргізуде деп ойлаймыз.
Ең сорақысы – құжаттарды тексеретін дәрігер-эксперт Татьяна Александровна Лазавая – 1938 жылы туған 82 жастағы зейнеткер кемпір! Валерия Викторовна Сухарева деген зейнеткер – аға дәрігер. Валентина Александровна Маслова деген кемпірдің зейнеткерлікке шыққанына 7 жыл болды, әлі сүйретіліп жұмыста жүр. Бұлардың барлығы зейнеткер болса да, жас мамандарға орындарын босатпай, жұмыстан шықпай, мемлекеттік тілге қарсы саясат жүргізуде. Қазақ тілін қорғап шыққан бір жас маманның артына түсіп, күн көрсетпей, басқа жұмысқа ауысуға мәжбүр етті. Бұл станцияда жұмыс істеу үшін, өз ана тіліңді ұмытып, мәңгүртке айналғанда ғана тыныштық береді. Жұмыс ішіндегі жиналыстар, науқасқа көмек көрсету нұсқаулықтары тек орыс тілінде талқыланады. Жұмыста таратылатын әр медицина қызметкеріндегі планшеттерде қазақ тілінде құжат толтыру мүмкіндігі жоқ. Тілдерді таңдағанда, «қазақша» деген түймеше ғана бар, ары қарай бассаңыз, мемлекеттік тілде құжат толтыру мүмкіндігі жоқ.
Тағы бір сорақылық – станцияның бас дәрігері – қазақ, бас дәрігердің орынбасары – қазақ, кадрлар бөлімінің бастығы да қазақ. Барлығы ауылдан шыққан таза қазақтар болса да, орысша шүлдірлеп, қазақша қойған сұрағымызға орысша жауап береді. Өз ана тілінде сөйлеген адамдар біздің станцияда күлкіге айналып, екінші сортты адам қатарында жүргендей сезінеді. Бас дәрігер мен оның орынбасарына қанша шағым жасасақ та, ескерусіз қалып, шағымды ұйымдастырды деген адамды басқа жұмысқа ауыстыруға мәжбүрлейді. Сол қаусаған орыс кемпір-шалдарға қарап, жалтақтаған құлдық сана!
Соңғы бір жылдың ішінде еңбек инспекциясына, қалалық және облыстық прокуратураға жазған шағымдарымыздың бірі де қаралмай, тексерусіз қалды. Осы жағдайды халық білу керек. Елім, қазағым деген азаматтар, жететін жеріне жеткізіп, бізді мынау құлдықтан құтқаруларыңызды сұраймыз! Өйткені біздің өз әрекетімізден ешқандай нәтиже шықпай жатыр. Тым болмаса, қазақ тілді мамандарды қудалайтын кемпірлер зейнеткерлік демалыстарына кетіп, қазақтарға қиянат жасауын доғарса екен дейміз. Олардың қазақтарға жасаған қысымынан шаршадық.
- Құрметпен сіздерден көмек сұрайтын Өскемен қаласының жас медицина мамандары, жедел жәрдем станциясының қазақ жастары (түпнұсқада аты-жөндері сақталған – Ред.).
Заманбек Қабдештің ФБ-парақшасынан.
Өскемен қаласы
БІЛІМ министріне БАЗЫНА
Құрметті Асхат Аймағамбетов мырза!
Бұл мәселені сіздің ғана шеше алатыныңызға сеніп, өз базынамызды жеткізуді мақсат еттік. Егер бұл мәселе шешілмесе, біз түбегейлі шындықтан күдер үзе берсек болады.
Біз – Қ.Жұбанов атындағы Ақтөбе өңірлік университетінің жанынан ашылған «Жоғары Колледж» ЖШС-нің оқытушыларымыз. Ашылғанына үш жыл болған колледждің құрылу кезеңінде түрлі қиыншылықтар болды, бірақ ұжым жақсы қалыптасты.
Алайда сол ұжымның ішіне өткен жылдың көктемінен бастап сызат түсті. Колледжге жаңадан келген басшы Б.С.Кульбаева (түпнұсқада осылай жазылған – Ред.) ұжымның берекесін кетірді. Жаңа басшы келгелі колледждегі жас мамандар бірінен кейін бірі қысым көрді, өзіндік еркіндігі мен шындығы бар адамдар қысымға ұшырады. Тіпті колледждегі мықты деген оқытушылардың өзі амалсыздан бірінен соң бірі жұмыстан шығып кетті. Бұл тек біздегі жағдайдың жалпы көрінісі ғана. Сізге осы басшы келгелі болған жағдайларды анықтап айтқымыз келеді:
1. Келген бойда Қ.Жұбанов университетінің үздік түлегі, жас жазушы, сценарист, қазақ тілі және әдебиеті пәнінің оқытушысы Жақсылық Әлиханның қыр соңына түсті. Бұған себеп болған сол оқытушының басшыға қарата айтылған «азаматтық қоғамда бәрі тең» деген сөзі. Жас маман сізге де өз шағымын жазған болатын. Алайда аяқсыз қалды. Ақыры өзі жұмыстан кетіп тынды. Бұны ол өз еркімен жасады деп ойламаймыз. Бұл жерде өзіне тыныштық жоғын білгендіктен кетті.
2. Кейін тағы сол қазақ тілі және әдебиеті пәні оқытушысы Ибрагимов Төлеген жұмыстан кетті. Бұл оқытушы да Қ.А.Яссауи атындағы ХҚТУ-ді үздік бітірген мамандарымыздың бірі еді. Алайда Кульбаева одан да өз әдісі арқылы құтылды. Жас маман декреттік демалыстағы кадрдың орнына келген болатын: «Декреттік демалыстағы оқытушы жұмысқа шыққандықтан, сізбен келісімшарт үземіз» деген жалған желеумен өз ойын жүзеге асырды. Төлеген де сізден көмек сұрап, хат жазған болатын.
3. Сол сияқты дене шынықтыру пәнінің мұғалімі Б. Забихолла, колледж футбол құрамасының бапкері А. Құлтай «өз еріктерімен» жұмыстан шықты. Қысқасы, онға тарта білікті маманның жұмыстан кетуі – көңіл көншітерлік жағдай емес. Олардың арасында Л.Н.Гумилев атындағы ЕҰУ-ды, Қ.Жұбанов атындағы АӨУ-ді тәмамдаған жас мамандар бар.
Жас және білікті мамандардың жұмыстан кетуі – жағымсыз жағдай. Бұған директордың біліксіздігі және адамдармен қарым-қатынас этикасының жоқтығы әсер етуде. Біз де әрең шыдап жүрміз. Күнделікті болатын айқай-шу, арыз-шағым, түрлі дау-дамайлар, колледждегі тұрақсыздық бізді шаршатты.
Құрметті Асхат Қанатұлы! Еліміздің бас ұстазы ретінде осы жағдайға көңіл бөлуіңізді өтінеміз. Сізден осы мәселелер төңірегінде жан-жақты тексеріс жүргізіп, жұмыстан кеткен және колледждегі қызметкерлер мен студенттерден пікір алмаса отырып, мәселені шешуіңізді сұраймыз. Біз әділдікті талап етеміз!
- Колледждің бір топ оқытушылары жазған талапты Думан Бақытгелді жария етті.
Ақтөбе қаласы
