Ермұрат БАПИҒА
Қатыгез қоғам қырсықса,
Қабақтан борап, қар бүркіп.
Үйірілмедің ұршықша,
Ынсаптан ұшқан Тау Бүркіт.
Қасиетті Кәрі Ертіске,
Кіндігің қаны жуылған.
Қайғыдан елің өрт ішсе,
Қайран Ер, белің буылған.
Шырқап бір шықтың тұғыр қып,
Алтай мен Сауыр шыңдарын.
Шындықты сенен ұғындық,
Қаламы қылыш шын дарын.
От ауыз орақ тілменен,
Ақиқатты айтқан алдаспан.
Қаймықпай соттан, түрмеден
Датыңа затың жалғасқан.
Қитұрқы билік
Торымен шырмап, … құрып.
Қасқая қарсы атылған,
Қайтпас та қайсар тектілік!
Асқағым, саған
Атса да,
Дұшпанның оғы жетпейді.
Найзағай түсіп жатса да,
Шыңдардың түгі кетпейді!
Ұлықбек ЕСДӘУЛЕТ
ӘЙ, ЕРМҰРАТ! ЕРМҰРАТ!
Жүгі ауыр ма ғаламның,
Жүгі ауыр ма заманның?!
Ширек ғасыр өзіңді
Білетұғын ағаңмын!
Сен де талай сыналдың,
Мен де талай сыналдым.
Ширек ғасыр Ермұрат,
Сол DAT-ыңды шығардың.
Түстік талай отқа да,
Түстік талай сотқа да,
Дұрыс жолға сен түстің,
Енді титтей тоқтама!
Сен халқыңа сенесің,
Ел ертеңін көресің.
Күрес жолы – ауыр жол,
Сенем, оны жеңесің!
Әй, Ермұрат! Ермұрат!
Бірінші боп кел, брат!
Ел соңыңнан ереді,
Жер қайысқан қол құрап!
Әй, Ермұрат! Ермұрат!
Бірінші боп кел, брат!
Тілекші ағаң Жұмаш КӨКБӨРІ
