Ромин деген бір депутаттың сотқа роман-роман хат жазып, «Тасжарғанды» тығырыққа тіреген кезі. Газет шығып жатқан. Ерекең редакцияға келді де, бірінші бетті быт-шыт қылып сызып, апыл-ғұпыл бірдеңе жазуға отырды. Сосын қайдан тауып алғаны белгісіз, «Мынаны сал» деп Кенжеге әлдебір суретті нұсқады.
Сондағы сурет не дейсіз ғой, сұқ саусақ пен ортан теректің арасынан сойдиып шығып тұрған бас бармақ. Оның үстіне жай сурет емес, «Мә саған!» дейтін ниетті меңзейтін жұдырықтың осы қалыптағы қоладан құйылған мүсіні. Бұл аздай, «Біз періске дайынбыз!» деген тақырып қойыпты.
Мақалада не жазылғаны есімде жоқ. Бірақ басылымдағы біраз адам кәдімгідей абыржыдық. Сот газетті онсыз да депуттатың аяғына жығып беріп жатқанда, қайдағы періс дейміз ғой баяғы. Бірақ Ерекең саспайды.
Сөйте-сөйте үйрендік. Абжыланнан (Ерекеңнің өз сөзі) бірер саты төмен тұрғандармен (бақа-шаяндармен) білекті түріп тастап, өзіміз де перісе беретін болдық. Бұл кісінің бір қасиеті сол ғой, «ДАТ»-қа жуып кеткен журналистің қаламына батылдықтың сиясын аямай құйып береді. Дегенмен өзіндік стилін ешкім қайталай алмайды. Ерекеңнің перісі – бөлекше періс!
Тебісі де бір керім. Бірер жыл бұрын ба, ТВ «31-дің» студиясында «… қысып тұр, ұқтың ба?!» деп қойып, бір айтқанды ұға қоймаған қарсыласын жұдырықпен жақтан бір салып, ыңқ еткізіп бір тепкен. Көп адам бұған риза болды. «Керемет бағдарлама шықты» деп, журналистер де мәз. Құдайшылығымды айтайын, бұған менің көңілім толмады. Өйткені мен білетін Ерекеңнің тебісі бұдан әлдеқайда жойқын болуы тиіс-тін.
…Кейін түсіндім ғой, шалбары тарлық қылған сияқты. Арнадағы әріптестер де қызық, әңгімені ақырындап төбелеске апаратын болған соң, «спорттық кәстөммен келіңіздер» десе де, болар еді ғой.
Мұны неге айтып отырмын? Періс пен тебістің жеті атасын меңгерген Ерекең Мәжіліске үміткер екен. Ойланбай дауыс берер ем – облыста тұрамын. Ел-жұрт бар ғой, Парламентте де періс болсын десе, неғылар деп қоям…
Сансызбай МОЛДАЖАНОВ,
«ДАТ»-тың 2011–2013 жылдарғы шолушысы
Кездесулерде не айтылды?
«Люстрация туралы заң қабылдаймыз»
«Сұғанақ қолдарға заңмен тыйым салу керек». Бұл – ҚР Парламенті мәжілісінің депутаттығына кандидат, тәуелсіз журналист Ермұрат Бапидің Алматыдағы Әуезов ауданының ақын-жазушыларымен кездесуде айтқан уәжі.
Мәжіліс депутаттығына үміткер Ермұрат Бапи үгіт-насихат жұмысы аясында Алматыдағы бір топ қаламгермен кездесті. Әуелгі сөз халықтың ақшасына қол салған Нұрсұлтан Назарбаев пен қоғамды жегі құрттай жеген оның отбасына ойысты. Түрлі зерттеулерге сүйенсек, Назарбаев 200 млрд доллар көлеміндегі елдің қаржысын қалтасына басқан. Басқаша айтсақ, бұл Қазақстанның 8 жылдық бюджеті екен. Ал оның сұғанақ қол отбасының қылғытқан қаржысы 1 трлн долларға жуықтаған.
«Бұл теңдесі жоқ тонау! Өз халқын бейшара қылып тонаудың бұдан асқан сорақы түрі жоқ. Тіпті бұл әлемдік тарихта кездеспейді, Пиночеттің кезінде де болмаған. Депутат болсам, люстрация туралы заң қабылдауға ұйытқы боламын. Бұл ел тарихына баға беру, саралау және билік бишігін білегіне ілген азаматтарды тексеру. Қылғытқан қаржысының анық-қанығын анықтау. Комиссия құрып, шетелге кеткен капиталды қарағаннан түк өнбейді. Елде қалыптасқан заң болу керек, заңның негізінде жұмыс істеу керек», – деді Е.Бапи.
Мәжілістен үмітті кандидаттың үгіт-насихат жұмыстары кезінде қалам ұстаған қауым да ағынан жарылды. Ақын Баян Бекетова өзін мазалаған бірнеше мәселені тізбектеді. Жазушы қаламақысы, Жазушылар одағы мәселесінен басталған сөз Алматыдағы ретсіз құрылыспен аяқталды. Ақын Аманғазы Кәріпжанұлы да армия, қорғаныс, жастар саясаты, студенттер жатақханасы тапшылығы, т.б. қордаланған түйткілді жеткізді. Ал өнер адамдарына өкпелі жазушы Нұрдәулет Ақыш тәуелсіз журналист Ермұрат Бапиді қолдайтынын ашық айтып, дауыс беруге шақырды.
«Қоғам өкілдері Парламентке баруы керек»
- ҚР Парламенті мәжілісі депутаттығына кандидат, тәуелсіз журналист Ермұрат Бапи Алматыдағы №3 сайлау округіне қарасты Алатау ауданындағы №209 мектеп-гимназияның ұстаздарымен және қызметшілер ұжымымен кездесті.
Кездесуге сәл кешігіп келген Е.Бапи сөзін алматылықтардың мұңына айналған кептеліс мәселесінен бастады. Бұған дейін бұл проблеманы «Дат» оппозициялық газетінде бірнеше рет қаузаған үміткер Алматыдағы көлік қозғалысын реттеу, экологиялық ахуалды жақсартуға қатысты ой-пікірін жеткізді. Әрі бұл саяси аламанға не үшін ат қосып жатқанын түсіндірді.
«30 жыл өзгерісті күттік. Қазір халық елдегі сіресіп қалған саяси жүйені өзгертуге құштар. Билік «Жаңа Қазақстанды» халықпен бірге құруы керек», – деді үміткер.
Топтаманы дайындаған –
кандидаттың сайлауалды штабы,
Толық нұсқа: https://fb.watch/iRjIgEvAJE/
