Жаңа жылға қараған түні Қарғандыда орын алған қанды оқиға мемлекеттік тұрғыдағы қоғамдық-саяси кемшіліктерді кезекті рет жалаңаштап берді.
Қарағандыдағы жағдай өршіп, шұғыл түрдегі ресми ақпарат қажет болып тұрған шақта әншейінде әлеуметтік желіде ақпараттық жекпе-жекке шығып, қоғам белсенділерімен арпалысып жүретін қазақстанық БАҚ «қолбасшысы» – министр Абаевтың үні неге шықпай қалды?! Биік мінбелерден аузымызды көпіртіп мақтайтын қазақстандық ноу-хауымыз – Қазақстан халқы ассамблеясы жұмған аузын неге ашпады?!
Сен тұр, мен атайын деп тұрған қазақ журналистеріне болған жағдайды бүкпесіз, ашық жазуға неге рұқсат берілмеді?! Прокуратура «жалған мәліметтерді таратсаңдар, жауапкершілікке тартыласыңдар» деп елді үркіткенше, шынайы ресми ақпаратты уақытылы неге бермеді?! Демалыс күндері «усиление» деп қиналып жүретін құқық қорғау органдары күдіктінің шекара асып кетуіне қалайша жол берді?! Әлеуметтік желілерде тараған алып-қашпа әңгімелер неге теріске шығарылмады?!
Тек полцияның қолында болатын анықтамалардың суреттері мен бейнежазбалар қалайша Интернет желілеріне тарап кетеді?! Ақыр соңында бейкүнә Рақымжан Жансейіттің (суретте) қазасына кім немесе кімдер кінәлі?
Тойға кешігіп келген қазақ сияқты, кешігіп шыққан ресми мәліметтерде билік өкілдері: «Қарағандыда жағдай орнықты, заң бұзушылықтарға жол берілген жоқ» деп жазды.
Осындайда – «Айналайындар, ол сендердің сіңірген еңбектерің емес. Сендер шұғыл түрдегі жеке шешім қабылдаудан қорқып, жоғарыдан қандай нұсқау келіп түседі екен деп жүргенде, көзі ашық, көкірегі ояу азаматтық белсенділер белсене араласып, жағдайды тізгіндеп берді!» – деп айтудан басқа уәж жоқ. Сол азаматтық белсенділердің бірі, «Қарағанды оқиғасының» басы-қасында жүрген жергілікті қоғамдық белсенді азамат Жексен Әбдрахманов ағамызды әңгімеге тартып, болған жағдайдың жай-жапсарын айтып беруін сұрадық.
