Редакцияға хат
Қазақстанның байлығын барлық салада талап алып жатқан тек қытайлықтар емес екендігі елге белгілі. Арасында аранын ашқан өз жемқорларымыз да бар. Бірақ байлығымызды көп жылдан бері көбірек асап, иемденіп алып жатқан – Қытай. Алғашында бірқатар қазақстандық кәсіпорындардың үлесін өте төмен бағамен сатып алып, кейін түпкілікті иемденіп кетті. (Бұл жөнінде 12-беттегі жарияланымға көңіл аударыңыз – Ред.).
Қытайдан келіп, қазақтың жерінде жұмыс істеп жатқан қытайлар 67 000 теңге жалақы алатын қазақстандық жұмысшылардан кемінде 10 есе жоғары ақы алатыны бүкіл елге мәлім. Әрине, бұл әділетсіздік «үлкен бастығымыздың» келісімі бойынша жасалып жатқан қиянат деп түсіндік. Қытайлықтарға үлкен теңдік пен мүмкіндік беріп қойған Нұрсұлтан Назарбаевтың өзі. Басқалар (тіпті Тоқаев та – Ред.) ондай мәселеге араласа алмасы жасырын емес. Қытайлықтар анау-мынау, кішігірім басшылармен ақылдаспақ түгілі, сөйлеспейді де, себебі – олармен жасалған келісімшартта осындай кеңшілік берілген.
Ақтөбедегі «Көкжиде», «Құмсай», «Мартук» сияқты мұнайға бай кен орындарымыз 1995 жылдан бері Қытайға беріліп қойған. Бұл кеніштерден түсетін табыстың пайдасы биліктің биік басындағыларға болмаса, халықтың қазынасына түсіп жатқаны мардымсыз.
Енді қытайлар Қазақстанның жеріне орман-тоғай өсіріп, жайқалтамыз деп, Жер туралы заңдылықтар жобасына өз мүмкіндіктерін билік арқылы тықпалағаны да мәлім. Ресейдің Сібірі мен Қиыр Шығысындағы орман-тоғайды отап жатқан қытайлар Қазақстанды жайқалтам деуі – далбаса сөз. Олардың мақсаты – қазақтың жерінде мәңгілік тұрақтап қалудың айла-амалы.
Қазақстанға 56 завод салып, жарылқаймыз деп отырған түпкілікті мақсаты да белгілі – салынатын кәсіпорындардың төңірегіне тұрақтап қалу. Олардан Қазақстанға келетіндер – кілең бойдақ жігіттер, қазақтың үйсіз-күйсіз, жұмыссыз жүрген жас қыздарына үйленіп, мақсаттары – Қазақстанды қытайландыру!
Дәл бүгінгі күнгі жағдай осылай болып та жатыр. Бұрынғы Торғай облысының жеріне орман-тоғай егіп, жайқалтамыз десек, үкімет тиісті қаражат бөлсе, өзіміздің Агроуниверситеттің орман факультетін бітіріп, жұмыссыз жүрген мамандарымыз ол жоспарды ойдағыдай іске асырып береді. Қазақстанға келіп, елімізге, жерімізге түпкілікті орналасуды жоспарлап жүрген қытайлықтарға халықтың қаржысын неге беруіміз керек?
Халық сайламаған, Нұрсұлтан Назарбаев тағайындаған депутат-сымақтарымыздың ағаш отырғызуға 25 жылға қазақтың жерін Қытайға жалға беру керек деп не беттерімен ұсыныс жасағаны жалпы қазақ халқы үшін ұят болды. Өзіміздің Көкшетау, Алматы облысы, Алматы қаласы, Жамбыл және көптеген облысымызда орман-тоғайымыз жайқалып тұрғанына бірнеше ғасыр болды ғой. Қытайды шақырамыз деген депутатсымақтар біліп жүрсін: бұлар қазақтың жерінде не өсетінін білуден бұрын, халық сайламағандықтан, республиканың елі-жұртымен де таныс емес. Халық олардың аты-жөнін де, түр-түсін де білмейді.
Бір мысал айтайын: телевизор көріп отырғанымызда, бір депутат (атын атамадым) бюджет есебінен пайдаланып жүрген автокөлігіне отырмақ болғанда, бір журналист жүгіріп келіп, бір жағдайды сұрағысы келіп еді, анау сөйлеспек тұрмақ, амандаспай тұра қашты. Қытайға жер беру керек деген депутаттың біреуі осы адам.
Қорыта келе айтпағым, дәл бүгінгі күні Қазақстанда жүрген қытайдың біреуі қалмай еліне кетсін! Бізге 56 завод керек болып жатса, экономикамыз көтерілгенде, оны өзіміз де салып аламыз. Бізге қытайдың инвестициясы да, зауыт-фабрикасы да қажет емес. Бізге қажеті – қазақ жерінің амандығы! Қытайға 1 гектар түгілі, бір метр де жер сатылмасын, жалға берілмесін! Біздегі латифундистер, байлар алып қойған жерлер дереу қайтарылсын! Мемлекет пен жалпы қазақ халқының жерінде ешкімнің жұмысы болмасын! Көрмегеніміз қытай болсын! Аңқаулықты қойып, қазақ жерін көзіміздің қарашығындай сақтайық, кешікпейік!
Бекен КӨКІШҰЛЫ, еңбек ардагері, Алматы қаласы