1 қаңтардан бастап Қазақстанда көлікпен жол жүру тәртібін (ЖЖТ – ПДД) бұзудың айыппұл мөлшері бес пайызға артты.
Еске сала кетсек, 2017 жылы ЖЖТ бұзуға салынған айыппұлдан ҚР үкіметі 1 триллион теңгеге жуық пайда тапқан. Ал өткен 2018 жылы бұл көрсеткіш триллионнан асып жығылары анық. Сонымен бірге көліктің мотор күшіне байланысты салынатын салық көлемі де көбейді. «Колеса» сайты таратқан мәлімет бойынша, 2019 жылдың 1 қаңтарынан бастап көптеген төлемдермен тығыз байланысты айлық есептік көрсеткіш көлемі 120 теңгеге артып, 2 405 теңгенің орнына 2 525 теңге болған. Яғни 5 пайызға жоғарылады.
Сондай-ақ автокөлік иелерінің түрлі жағдайларға қатысты жасайтын төлемдерінің де көлемі артты. Мысалы, жолда белгіленген жылдамдықты сағатына оннан жиырма шақырымға дейін арттырғандар осыған дейін 12 025 теңге айыппұл төлеп келсе, 1 қаңтардан бастап оның көлемі 12 625 теңгеге тең болмақ. Тротуарда, гүлзарда, көгалда не балалар ойнайтын алаңдар мен спорт алаңдарында тоқтап тұрғандар бұдан былай 24 050 теңгенің орнына 25 250 теңге (10 АЕК) төлейтін болады.
Әкімшілік кодекстің кейбір баптарындағы ережені бұзғаны үшін көлік басқару құқығынан айыратын жаза түрі айыппұл салумен ауыстырылуы мүмкін. Бірақ құжатқа енуі мүмкін бұл өзгерістерді депутаттар әлі де қарастыруда.
Көлік салығы да былтырғы жылмен салыстырғанда арта түскен. Мысалы, 2018 жылы ел қазынасына 2 АЕК, яғни 4 810 теңге құйған шағын литражды (қозғалтқыш көлемі 1,1–1,5 текше см-ге дейін) көлік иелері 2019 жылдан бастап 5 050 теңге төлемек.
3 АЕК немесе 7 215 теңге төлеп келгендер енді 7 575 көлемінде ақша жұмсайды. Ал қозғалтқыш көлемі зор джип көліктерінің қожайындары 281 385 (117 АЕК ) теңгенің орнына 2019 жылы 295 425 теңге көлемінде салық төлейтін болады. Сайып келгенде, Қазақстан үкіметі салықпен сорып, халықты қанау арқылы күн көруге көшті.
«D»
