Қазан айында облыс әкімдері өздерінің айлық жалақыларын жария еткен болатын. Nur.kz бұл ақпараттарды талдап, басым көпшілігінің жалақысы бір деңгейде екенін анықтады. Алайда қолдарына басқалардан көп айлық алатындар да бар болып шықты.
Елдегі 14 облыс әкімінің жетеуі өз жалақыларын жария еткен еді. Түркістан облысы (Жансейіт Түймебаев) және Қарағанды облысы (Ерлан Қошанов) әкімдерінің айлықтары мемлекеттік қызметтегі өтілдерін есепке алғанда, 967 мың теңге болған. Міндетті салық пен зейнеткерлік төлемдерді алып тастағанда, 786 мың теңге қалады екен.
Ақмола облысының басшысы қолына 786 мың теңге алса, Батыс Қазақстан облысының әкімі Алтай Көлгінов 761 мың теңге алады екен. Павлодар облысының әкімі Болат Бақауов 744 мың айлық алса, Атырау облысының басшысы 742 мың алады.
Ақтөбе облысының әкімі Бердібек Сапарбаевтың жалақысы Түймебаев пен Қошановтікімен бірдей – 967 мың теңге. Міндетті салықтар мен зейнеткерлік төлемдері төленгеннен соң, ол 864 мың теңгені толығымен алады. Бұл Түркістан мен Қарағанды облыстары әкімдерінің жалақысынан 78 мың теңгеге көп.
Себебі Сапарбаев зейнеткерлік жасына жетіп, БЖЗҚ-на зейнетақы төлемдерін төлемейді екен. Осы жайтты ескерсек, зейнеткерлік жасына жеткен басқа өңір басшылары да бірталай ақшаны өздеріне қалдырады. Зейнеткерлік жасына келесі облыс әкімдері жеткен: Қызылорда (Қырымбек Көшербаев), Алматы (Амандық Баталов), Шығыс Қазақстан (Даниал Ахметов).
Астана басшысы Бақыт Сұлтановтың жалақысы 967 теңге. Ол қолма-қол 786 мың теңге алады. Шымкент әкімі Ғабидолла Әбдірахымовтың жалақысы 953 теңге болса, өз қолына 762 теңге алады екен.
Республикалық маңызы бар қалалар әкімдері мен облыс әкімдерінің жалақысын салыстырсақ, оларда жалақы көлемі бір деңгейде екенін байқауға болады. Министрлердің де жалақысы осы көлемде.
«Миллиардтардың тағдырын шешетін қолтаңбаны қоятын адамның жалақысы жоғары болуы керек. Сонда оны азғыра алмайсың және ол өз лауазымын қадірлейтін болады. Жалақы көлемі жоғары болғанмен, жауапкершілік те жоғары болуы керек», – дейді саясаттанушы Талғат Қалиев.
«Мемлекеттік қызметкерлердің еңбегін бағалау жүйесіне келсек, олардың жалақы көлемі ірі жеке кәсіпорындардағы қызметкерлердің жалақысымен пара-пар болуы керек. Бұл халықаралық тәжірибе! Мемлекеттік қызметкерлердің жалақысы ештеңеден қысылмай өмір сүруге мүмкіндік беруі керек, сонда сыбайлас жемқорлық қаупі де азаяды», – дейді Шымкент әкімі Ғ.Әбдірахымов.
Nur.kz
(медиа-проект «DAT» №39 (451) от 1 ноября 2018 г.)
