Президент тапсырмасымен Шығыс Қазақстан облысындағы Бұқтырма су қоймасының үстінен салынып жатқан көпірдің құрылысы аяқталып келеді. Аймақ қана емес, бүкіл еліміздің әлеуметтік-экономикалық дамуы тұрғысынан аса маңызды бұл стратегиялық нысан жыл соңына дейін пайдалануға беріледі деп күтілуде.
2019 жылдың 19 қыркүйегінде, осыдан тура 5 жыл бұрын Президент Қасым-Жомарт Тоқаев Үкімет пен Шығыс Қазақстан облысы әкімдігіне «Твиттер» арқылы Бұқтырма су қоймасына көпір салу үшін қаржы бөлуді тапсырған болатын. Қазіргі уақытта көпір құрылысы аяқталуға жақын. Екі бірдей облыстың, 6 ауданның арасын жалғайтын стратегиялық нысан жыл соңына дейін пайдалануға беріледі деп жоспарланып отыр деп мәлімдеді Президенттің кеңесшісі–баспасөз хатшысы Берік Уәли .
«Бұл көпір жергілікті тұрғындар үшін көптен күткен қуаныш, сүйіншілейтін үлкен жаңалық болайын деп тұр. Өйткені Шығыс Қазақстан мен Абай облыстарының Марқакөл, Күршім, Катонқарағай және Көкпекті аудандарының тұрғындары 50 жыл бойы жол азабын тартты. Жазғы уақытта паром арқылы, қыс мезгілінде мұз үстімен жүрді. Талай адамның суға кеткені де жасырын емес. Сондықтан бұл көпірді салудың маңызы жоғары еді», – деп жазды Берік Уәли.
Оның жазуынша, бұл еліміздегі ең ұзын көпір болмақ.
«Екі жолақты автомобиль көпірінің жалпы ұзындығы 1316 метрді құрайды. Тәулігіне 80 мың көлікке дейін өткізе алады. Сонымен қатар жоба аясында ұзындығы 18,6 шақырым болатын көпірге қосылатын жаңа автожол құрылысы қарастырылған», – дейді Президенттің баспасөз хатшысы.
Естеріңізге сала кетейік, 2019 жылы 18 қыркүйекте «Egemen Qazaqstan» газетінде «Елу жыл бұрынғы ескі паром елді қашанғы әуреге түсіреді?» деген тақырыппен журналист Азамат Қасымның мақаласы жарияланған болатын. Осы мақала көпірдің салынуына арқау болған еді.
Енді, міне, әріптесіміздің көтерген орынды мәселесін Президенттің кеңесшісі–баспасөз хатшысы мемлекет басшысына дер кезінде және дұрыс жеткізіп, осыған орай нақты тапсырма берілуінің арқасында алты ауданның халқы елу жыл күткен ерекше көпір ел игілігіне тапсырылмақ. Бұған аймақ тұрғындары аса қуанышты. Оған осы өңірдің тұрғыны Набиолда Кемешевтің әлеуметтік желіде жариялаған мына жазбасы нақты мысал:
«Қиырда жатып, қырқадан шалып, негативтен басқа ел-жұртқа не жақсылық жасадың? Марқакөлде туғаның рас болса, сол Марқа үшін бір шеге қақтыңыз ба??? Бұл – ел арманы, халықтың тілегі, көптің көз жасы! Қанша отбасының баласы жетім, анасы жесір қалды. Талай адам жанын шүберекке түйіп, өмірін бәйгеге тігіп, көкшіл мұздан өтіп жүрдік. Күздің суығында паром тосып, түнеген күндер мен шеті жоқ кезекте алтын уақыттарын сарп еткен кездер артта қалмақ. Азамат Қасымның Марқа ауданының ашылуына, Күршім–Марқа жолының салынуына да журналист ретінде газет арқылы қосқан өзіндік үлесі бар. Ең бастысы – Берік Уәли сияқты осы мәселені жеткізген, дұрыс шешім қабылдаған Президентіміз Қасым-Жомарт Кемелұлына Марқакөл елінің, Күршім, Зайсан, Самар, Большенарым жұртының атынан мың алғыс! Халық деген Алланың 99 жанама атының бірі. Халқымыз аман, жұртымыз тыныш болсын! Көпірдің игілігін ел көреді. Қуан, халқым!» – деп жазды ол.
Міне, ел игілігі үшін жасалып жатқан орасан еңбекке шын жүректен шыққан шынайы тілек! Бұл – екінші жағынан, газетіміздің өткен санында әйгілі журналист Қайнар Олжайдың «Бас-басына сайт болған өңкей қиқым» дегеніндей, қалың жұртқа титтей де пайдасы жоқ, не болса соны жариялай беретін сайттар мен қаптаған блогерлерге де «қызым, саған айтам, келінім, сен тыңда» дегендей астарлы ақыл-кеңес. Азамат Қасымдай қарапайым журналист пен Берік Уәлидей Президенттің баспасөз хатшысының қызметін лайықты бағалау деп қабылдасақ, біздіңше ешқандай сөкеттігі жоқ. Осындай елшіл азаматтардың қатары көбейе бергей!
Сарбаз ҚҰТ-МҰХАММЕД