Неміс екенімді ұмытпайтын НАМЫСТЫ ҚАЗАҚПЫН…

Гер-аға сонда не деді?

 

 

…Германиядан хабар келді. Леонид Вайман қаза бопты. Ол бұ­рын Қазақстанда тұрған. Бір кезде ол мені де Германияға көшейік деп үгіттеген. Бірақ мен өз­ім­ді Қазақстанда ғана адам ретінде сезінемін (20.01.08.).

 

***

Өзіме де обал жоқ. Нағыз қазаққа айналып біткенмін. Шын неміс екі-үш ай бұрын ауру­ханаға жатып, мұндайға жол бермей, инфарктқа жеткізбес еді. Ал мен өмірім қыл үстінде тұрса да, қазақылыққа салындым…

 

***

Басқа – басқа, ал қа­зақтар маған алакөз бол­ғандай ілік жоғы құдайға да, өзіме де аян.

 

***

Маған қазақтың ішкі мәселелеріне тым сұғына беруге болмайды. Әдеп керек. Әрдайым он ойланып, жүз толғанып, не айтсам да орнымды біліп, сақтана сөйлеуім қажет.

 

***

Өз басым жер бетінде қазақтай қонақжай халық барына шексіз ризамын.

 

***

Мен үшін Германияға кету – өлім жазасымен бірдей.

 

***

Менің ұлтым неміс болғанмен, болмысым – қазақ.

 

***

…Жалпы, қазіргі кез­дегі қазақ газеттерінің қай-қайсысынан да оқи­тын нәрсе табылады жә­не молынан табылатыны оңды құбылыс. Тек оларды орыстар мен орыс­тілді дымбілмес, мен­мен­сіген қазақсымақ міс­кіндердің оқымай­ты­ны өкінішті демесең…

 

***

Қалың тұман ішінде түк білмей, сезбей, бар­лығынан мақұрым қал­ған найсаптар өздерін кім­біз деп ойлар екен, а? Қазақпыз дер ме екен? Әй, қайдам, күдігім бар… Мұны мен айтып отыр­мын: неміс екенін ұмытпайтын намысты қа­зақ – Герольд Бельгер.

 

 

 

Бұзаутіс

 

Гете менен Абайға ерген адам –

Бұзаутісін үш тілдің өрген ағам.

Қара қылды қақ жарған әділдікті,

Құдай өзі қастерлеп берген оған.

 

Қазақ үшін қуанып, қамығатын,

Қаншамыздан Алашқа жаны жақын.

Қазақ мұңы Абайды қайыстырған,

Қаяу салып жүр ме екен жанына тым?

 

Күншуағын жеткізген қысқа күннің,

Қадіріне жетіпті Ұстаның кім?

Алты Алаштың бағына жер аударған,

Атасына не дейміз Сталиннің?!

 

Уақытқа да өліспей беріспеген,

Уы бар ма қазақтың сен ішпеген?

Бар қазақты бір өзің ұрмай-соқпай

Ғашық қылдың ұлтыңа неміс деген!

 

Заманыңның келесің сүйреп көшін,

Намыссыздың күймесін күйреткесің.

Қазақтардың өзіне болмысыңмен

Қалай қазақ болуды үйреткесің.

 

Құралайды көзге атқан сұрмергенім,

Ер мінезден ешқашан сыр бермедің.

Тістеп сүйген қазағын жақсы көріп,

Мың білгірге татитын бір Бельгерім!

 

Ұлықбек ЕСДӘУЛЕТОВ,

2014 жыл

 

Көңіл айту

 

Герағамның ар­тын­­да қалған Райса апа­мызға Алла қу­ат берсін! Марқұмның ру­хына арналған мы­на шумақты жылап от­ы­рып жазған едім:

 

Жылу сыйлап адамдарға жүр едің,

Шаршадың-ау, тоқтады ма жүрегің?

Қазақтың жайын қазақтан артық айтатын,

Енді ешкімнің жоқ екенін білер кім?

Ғайни АҢШЫБАЙ,

Батыс Қазақстан облысы,

«Общественная позиция»

(проект «DAT» №06 (277) от 12 февраля 2015 г.

Қаратөбе ауылы