«Общественная позиция»
(проект «DAT» №37 (401) от 12 октября 2017 г.
Ойдан-қырдан
Бұған дейін «Анаға апарар жол» фильмі арқылы көпшілікке етене танымал болған актриса Аружан Жазылбекова енді халықаралық киножобаға қатысуда. Актрисаның айтуынша, бұл оның алғашқы әлемдік тәжірибесі, деп жазады Stan.kz порталы.
Соңғы екі жылда төрт бірдей фильм («Свадьба на троих», «Побег из ауыла», «Рэкетир-2», «Анаға апарар жол») арқылы кинокөрерменге танылған Аружан Жазылбекова бүгінде композитор Си Синхайдың өмірі жайлы қытайлық кинематографтар таспалап жатқан тарихи фильмге түсуде. Қытай музыка өнерінде өзіндік тарих қалдырған композитордың өмір жолын қамтитын фильмнің эпизодтары алдымен Алматыда, содан соң Мәскеу мен Пекинде түсіріледі. Ал Си Синхай Қазақстанға Қытай коммунистік партиясының жолдамасымен келіп, майданнан жаралы қайтқан жауынгерлер үшін қан тапсырған мейірімді азамат болғанын бүгінде көпшілік білмесе керек.
«Соғыс жылдары ол кездейсоқ Алматыға, қазақстандық қайраткер, дирижер Бақытжан Байқадамовтың отбасына тап болады. Ол біраз уақыт біздің елімізде өмір сүріп, шығармашылықпен айналысқан. Мен Си Синхай үйінде тұрған Бақытжан Байқадамовтың әпкесін ойнаймын», – дейді Аружан.
«Бұл фильмді 600 миллион көрермен тамашалайды. Режиссермен ымдасып түсінісеміз, себебі ол ағылшынша да, орысша да білмейді, ал мен қытайша түсінбеймін. Өкінішке қарай, қытайлық продюсерлердің саясатына сәйкес, барлығы құпияда қалады. Біз тіпті әлеуметтік желіге сурет жүктей алмаймыз», – деген екен актриса Stan.kz тілшісіне.
Келесі жылы прокатқа шығатын жаңа фильм арқылы Аружан қытай көрермендерінің жүрегіне дүниені дүр сілкіндірген Димаш сияқты жол таба ала ма – оны уақыт көрсетеді.
«D»