Талғам таразысы
«Күрт өзгерген ауа райы қалай әсер етiп жатыр? Менiң айтпағым мынау… Кеше Алматының атақты мейрамханасында бір ағамыздың тойында болдық… Бұрынғы азуы алты қарыс жұлдыздарды көрмедім, олардың орнына МС Сайлаубек келген екен. Бәрі шулап, фотоға түсіп, қошеметтеп жатты… Жас жұбайлардың достарының жасаған «ең қымбат сыйлығы» ретiнде келген екен тағы…
Бұл кісінің осынша танымал болып кетуі неден болды өзі?! Қалай ойлайсыздар??? Кешеден бері соның жауабын таба алмай дал болдым…».
Бұл – белгілі айтыскер ақын Айнұр Тұрсынбаеваның инста-парақшасынан алынған жазба. Айтыста қандай тапқыр болса, Айнұр осы жазбасында да тапқырлық танытыпты. Айнұрдың «күрт өзгерген ауа райы қалай әсер етіп жатыр?…» деген сауалы астарында өнер өлкесіне өрекпіп келген МС Сайлаубек сияқты «күрт өзгеріске», одан да бұрын өнер райының осылай өзгеріске түсе бастауына деген өкпе-наз сезіледі.
Иә, «Түркітелевижн» жүлдесін әкелген Жанардан кейін, қалай десек те, биылғы жылдың «жаңалығы» МС Сайлаубек болды. Мұндай жаңалықты күтпеген жұртшылықтың арасында жағаларын ұстағандар да бар. Айнұр-ханым сол «жаға ұстаушылардың» бірі болса керек.
Екіншіден, «азулы жұлдыздарды» тойдан көре алмаған Айнұр-айтыскер ендігі тойшыл қазақтың талғамы «сайлаубектермен» шектеле ме деп қорқады. Бүгінде Сайлаубектің соңынан «ки менама бәк, ки миними бет…» деп «ән салып» жүрген жастардың қатары аз емес. Олар тәнтіліктен «кименамалап» жүр ме, жоқ әлде «жаңа» жұлдызды мазақ ете ме – ол қоғамның талқысындағы тақырып.
Дегенмен, «бізде де талғам бар, кімнің – кім екенін білеміз» дейтін жастардың пікірі дәтке қуат. Осы тұрғыдан келгенде, Айнұрдың уайымын уақыт уатып тастайтын өтпелі өкініш деп қабылдайық.
