«Общественная позиция»
(проект «DAT» №18 (430) от 10 мая 2018 г.
Қаскелеңдегі «Үш қоңыр» автобекеті жанында Ташкент –Алматы автожолында жеке әскери бекеттің жұмыс істеу фактісі бойынша қылмыстық іс қозғалды, деп ҚР ІІМ-нің Мемлекеттік тіл және ақпарат департаментіне сілтеме жасап ҚазТАГ хабарлады.
«Қазіргі уақытта аталған факті бойынша Алматы облысы ІІД Қарасай аудандық ІІБ ҚР Қылмыстық кодексінің 389-б., 3-т. (озбырлық) бойынша қылмыстық іс қозғады», – деп хабарлады Ішкі істер министрлігі ҚазТАГ жолдаған сауалға орай берген жауабында.
Биылғы жылдың сәуір айында өткен баспасөз мәслихатында Кәсіпкерлер мен меншік иелерінің құқығын қорғау одағының президенті Василий Резван әлдебір лауазымдының жол бойына әскери пост қою жөніндегі іс-әрекеттері заңсыз екендігін атаған еді. «Бүгінгі күні постың заңсыз жұмысы тоқтатылды, – деді одақ президенті. – Біз облыстың ІІД-де мәлімдеме жасадық, қазір ІІМ-не жолаушы тасымалдаушылар жіберген барлық шағым хаттармен жұмыс істейтін жедел тергеу тобы құрылды, шағым жазған жүргізушілермен сұхбат жүргізілуде».
Дегенмен, В.Резван заңсыз постының қызметкерлері өздерінің заңсыз әрекеттерін басқа жолмен жалғастырып жатқанын айтты. Заңсыз қойылған «Үш қоныр» бекетінің күзетшілері Ташкент – Алматы күре жолының бойында Алматыға келген автобустардың қайда тоқтағанын видеокамерамен жабдықталған квадрокоптермен бақылап, автобустардың нөмірлерін жазып алып, автобус жүргізушілерін қыспаққа алып, кек қайтарып жатқан көрінеді.
Қылмыстық іс қозғалса да, заңсыз бекеттің жұмысын жалғастыруға пәрмен берген мықты лауазым иесі кім? Біз ҚазТАГ таратқан жоғарыдағы хабар бойынша журналистік тексеру жүргізу барысында, бұл дөкей ҚР президенті Нұрсұлтан Назарбаевтың інісі – Болат Назарбаев екенін анықтадық. Бұдан бірнеше жыл бұрын халықаралық автобекет ретінде салынып, жұмысы тоқтап қалған «Үш қоңыр» бекетіне «жан бітіру» үшін, президенттің туған інісі Қаскелең аудандық ІІД-іне ұзақ қашықтыққа жүретін автобустарды Алматыға жеткізбей, өзінің жеке меншік бекетіне қарай бұру жөнінде әпербақандық әрекетпен бұйрық берген екен. «Біз президенттің інісі бұйырған әрекетке еріксіз барып отырмыз, оған қарсы келетін амалымыз болмады», – дейді аты-жөнін атауды құп көрмеген полиция офицері.
Василий Резван бастаған құқық қорғаушылар көтерген мәселеден кейін, Ташкент – Алматы тас жолы бойымен жүретін автобустар арнайы полицейлік конвоймен қамтамасыз етілсе де, заңсыз әрекет әлі де жалғасып жатқан көрінеді. Тіпті бұл заңсыздық туралы ҚР президенті Нұрсұлтан Назарбаевтың өзіне де, ҚР парламенті депутаттарына дейін мәлім болса да, автобустарды «Үш қоңыр» бекетіне бұрғызу әрекеті әлі де тыйылмаған екен.
«Ал заң қайда қалады? Оның үстіне бұл озбырлық жөнінде қылмыстық іс қозғалды емес пе, заңсыз әрекет неге жалғасып жатыр?» – деген сауалға: «Нұрсұлтан Назарбаев – алыста, ал Болат Назарбаев – дәл қасымызда жүр, сондықтан біз ол кісінің айтқанынан шыға алмаймыз», – дейді офицер. Біздің журналистік тексеру анықтағандай, заңсыз қойылған постының әскери қызметшілері автобустардан жолаушыларды түсіріп тастап, жүргізушілерден алым жинайды екен. Егер жүргізуші алым төлесе – автобус Алматыға жіберіледі, төлемесе – «Үш қоңыр» бекетіне бұрылуға мәжбүр болады. Ал Алматыдан 30 шақырым жерде түсіп қалуға мәжбүр болған жолаушылар жүктерін арқалап, такси жалдап немесе Қаскелең мен Ұзынағаш жақтан келе жатқан автобустарға артылып, қалаға өз беттерімен жетулеріне тура келеді.
«Бұл Назарбаевта тойым бола ма, жоқ па?! – дейді жол бойында Алматыға жетуге көлік күтіп тұрған жолаушылардың бірі. – Иемденбеген меншігі қалмады, енді өздері де ілдебайлап, әрең жүрген автобус жүргізушілеріне салық салу – озбырлықтың көкесі ғой! Бұған тыйым салатын лауазымгер бар ма, жоқ па?!».
«Негізі, автобус жүргізушілері Назарбаевтың жандайшаптарына төлейтін салықты біздерден – жолаушылардан жинап алады. Қалаға тақап қалғанда, жүргізушілер бұл жағдайды ескертіп, әркімнен ақша жинайды. Біз бермедік, сөйтіп автобустан түсіп қалуға тура келді», – дейді тағы бір жолаушы.
Біздің газет бұл озбырлық әрекетті бақылауға алғанын хабарлаймыз. Себебі бұл елге атаусыз қожайын болған Болат Назарбаевтың әпербақандығы мұнымен тоқтайды деген сенім жоқ. Егер осы жағдайға байланысты деректеріңіз болса, редакцияға хабарлауды сұраймыз (тел. 282-72-30. Электронды пошта: [email protected]).
Сырым ДАТОВ