ЗЫҒЫРДАН
ақын, қоғам қайраткері
Өзінің туған жерінде қазақтар қалаларда қаңғырып, екі қолға бір күрек таба алмай, жұмыс іздеп, біреулердің тауық қораларын паналап, шықпа жаным шықпа деп жүрсе, біздің тағдырымыздың бас гаранты Назарбаев мырза қытай азаматтарына көп қабатты үйлер салдырып, оларды жұмыспен қамтамасыз етіп, жаны шығып барады.
Мысал керек болса, мынау тұрған Көкшетау қаласының жанындағы Ильичевка ауылында қытайлар май шығаратын зауыт салып болып, 14 мың шаршы шақырым жерге күнбағыс егіп, қазіргі уақытта қытайдан келген жұмысшыларына деп көп қабатты үйлер тұрғызып жатыр. Және де тағы бір айта кетерлігі – өз елінде, өз жерінде қытайларға жалданып, жұмысқа тұрған қазақ жұмысшылары міндетті түрде қытай тілін үйренуі керек екен.
Көкшетаудан 30 шақырым қашықтықтағы Аймақ ауылының астық қабылдау бөлімшесін қытай азаматы сатып алып, тіпті былтыр желтоқсан айында жолдың екі жағына қытай мемлекетінің туларын желбіретіп қойған еді. Мен осыны СҚО-ның әкімі Құмар Ақсақаловқа айтып, алдыртып тастатқан едім. Бұрынғы Жамантұз, қазір Кенесары ауылы атанған мекеннің теміржол бойындағы зәулім элеваторын қытай сатып алды деп жұртшылық шулап жүр.
Тілі шұбарланған қазақты үш тілді қылғаны аздай, енді келіп: «Қытай тілін үйреніңдер, қытай біздің тағдырымыз» – деп, тіпті Алматыда қытай мектебін салдырды. Ал жер асты байлығымыз: мұнай, уран, алтын, күміс, мыс, темір, қалайы, т.б. сияқты бағалы кендеріміз шетелдіктерге, әсіресе қытайға қандай бағамен сатылып жатыр – ол жағы халыққа беймәлім құпия! Жердің асты-үстін сатқаннан қалталарына құйылып жатқан миллиардтаған доллар қаражаттардың есебін тек билік қана біледі…
Қарапайым халықтың тұрмыс-жағдайы мүшкілденіп, күннен-күнге құлдырап, қайыршыланып барады. Теңгеміздің түк құны қалмай, девальвацияға ұшырауына басқа ешкім емес, Ақорда билігі кінәлі! Қазақстанды дамытып, 30 дамыған елдер қатарына қосам деу – күлкілі, өзімбілем биліктің кезекті сандырағы. Битін сығып, қанын жалап отырған қайыршы халқымен кімді басып озып, қандай елге үлгі болмақшы?
Қытайдағы қазақ ұлтының зұлматқа (геноцид) ұшырауының түп-төркіні Назарбаевтың Қытайға ұзақ жылдарға жалға бермекші болған 1 миллион 700 мың гектар жерден басталады. 2014 жылы сол кездегі премьер Карим Масимов бастаған Қазақстан делегациясы Қытайға барған сапарында Евниев деген шенеунік арқылы Қытайға қазақтың 1 миллион гектар жерін сатуға келісім-шарт жасап қайтты…
Ақорда билігінің опасыздығы салдарынан «Қытайға жер сатпақ түгілі, жалға да бермейміз!» – деп, 2016 жылы көктемде Атыраудың халқы мың-мыңдап көшеге шықты. Атырауды қолдап, Қазақстанның басқа қалаларындағы қазақтар да көтерілді. Міне, осы тұстан басталып, қазаққа қаны қарайып шыға келген қытайлар өз жеріндегі қазақтарды мыңдап, азап түрмелеріне, яғни саяси лагерьлеріне тоғыта бастады. Қытайлар қазақтарды түрмеде азаптағандары аздай, құрандарын, жайнамаздарын өртеп, мешіттерін жауып, тіпті зираттарының айшықтарына дейін жойып жіберді! Мұны геноцид демей, не дейміз?!
Мұнан да жаман масқарасы – хансулар қазақтың ару қыз-келіншектерін мәжбүрлеп, күштеп, үйлеріне кезекпен қондырып, зорлық жасай бастады. Оған мысалды алыстан іздемейміз. Сайрагүлдің басынан кешкен зорлық-зомбылығы куә. Осының бәріне Назарбаев Нұрсұлтанды айыптап отырғаным – қазақ ұлтына қарсы қытай зұлматы оның Қытай басшысы Си Цзиньпиннің қолтығына су бүркіп, қазаққа қарсы айдап салғанынан басталды!
Биыл соңғы барған сапарында Назарбаевты қытайлар хан көтеріп қарсы алып, оның құрметіне әскери парад өткізді.
Газеттерден, әлеуметтік желілерден оқып жатқанымыздай, біздің желбуаз «жазушы» қауым қытай мен қазақтың арасында қалыптасып отырған осы сұмдық жағдайға атүсті қарап, көбігін ғана қалқып отыр. Тереңдетіп жазуға табандарында бүрі жоқ, біреуі тамағын тауып отырған қызметінен, біреуі мемлекеттік қызметтегі бала-шағаларына кесіріміз тиіп кете ме деп қорқып отырған жағдай осы.
Мен осы мақаламды «ДАТ», «Қазақ елі», «Жеті жарғы», «Президент және халық», «Жас Алаш» деген газеттерге және «Қамшы» интернет-порталына жіберемін, қайсы жарыққа шығарар екен, көрейік?
(медиа-проект «DAT» №35 (447) от 4 октября 2018 г.)
