Қазақстан халқының саны биылғы жылдың басынан бері 0,3%-ға артып, 1 сәуірге 17 млн 476,1 мың адам болды, деп хабарлады ҚР Ұлттық экономика министрлігінің статистика комитетінен.
Соның ішінде қалалықтар – 9 916,6 мың (56,7%), ауылдықтар – 7 559,6 мың адам (43,3%) болған. 2014 жылғы 1 сәуірмен салыстырғанда халық саны 255 мың адамға немесе 1,48% өсті.
АХАТ органдары ұсынған азаматтық хал актілері жазбаларындағы мәліметтерді өңдеу нәтижесінде 2015 ж. қаңтар-наурызда туылғандар саны 92,1 (92,8) мың адам болып, 2014 ж. қаңтар-наурызға қарағанда 0,8%-ға кеміді. Туудың жалпы коэффициенті 1000 адамға – 21,31 адам.
Қарастырылып отырған кезеңде қайтыс болғандар саны 33,3 мың адам болған, бұл 2014 ж. қаңтар-наурызда қайтыс болғандардың абсолюттік мөлшеріне сәйкес. Өлім-жітімнің жалпы коэффициенті 1000 адамға – 7,70 адам.
2015 ж. қаңтар-наурызда республика халқының табиғи өсімі 2014 ж. қаңтар-наурызбен салыстырғанда 0,7 мың адамға немесе 1,2% кеміп, 58,8 (59,5) мың адамды құрады. Табиғи өсімнің жалпы коэффициенті 1000 адамға шаққанда 13,61 (13,96) адамды құрады.
2015 ж. қаңтар-наурызда АХАТ органдары 30,3 (31,6) мың неке қию туралы акті жазбасын ұсынды. 2014 ж. қаңтар-наурызбен салыстырғанда олардың саны 4,1% азайды. Үйленудің жалпы коэффициенті 1000 адамға 7,02 (7,42) неке болған. 2015 ж. қаңтар-наурызда ажырасулар саны 12,0 (11,6) мың болды, 2014 ж. сәйкес кезеңмен салыстырғанда олардың саны 3,4% көбейді. Ажырасудың жалпы коэффициенті 1000 адамға шаққанда 2,77 бұзылған неке болған.
Көші-қон полициясы органдары ұсынған келу/кетуді статистикалық есепке алу талондарындағы мәліметтерді өңдеу нәтижесінде 2015 жылғы қаңтар-наурызда елімізге тұрғылықты тұруға келгендердің тіркелу саны (көшіп-қонушылар) 2014 ж. қаңтар-наурызбен салыстырғанда 14,2% кеміп, 4 165 адам болды. Елімізден кеткен қоныс аударушылардың тіркелу саны 11,1% көбейіп, 4 516 адамды құрады, көші-қонның айырымы – 351 адам болды.
Өңіраралық көшіп-қонушылардың үлесіне еліміздің жалпы ішкі көшіп-қонушылар санының 43,4%-ы тиесілі. Өңіраралық көші-қонның оң айырымы Алматы (10 828 адам), Астана (324 адам) қалаларында және Ақмола (1 126 адам), Маңғыстау (195 адам), Қостанай (143 адам) облыстарында қалыптасты.
ҚазТАГ