Жақсыны көрмекке!
Әйгілі кинорежиссер, жазушы, азаматтық ұстанымы берік Ермек Тұрсынов «Кенже» фильмінің түсірілімін аяқтады. Режиссердің сөзіне сенсек, бұл бұрынғы «Келін» және «Шал» фильмдерінің соңы көрінеді.
Бұл турасында арнайы тоқталып өткен Тұрсыновтың сөзіне бір сәт ден қойсақ: «Кенже» атты фильмді аяқтадым. Бұл трилогияның соңғы бөлімі. Яғни, алдыңғы «Келін» және «Шал» фильмдерінің соңы. Сонымен қатар фильмде мен ең соңғы нәтижелерін көрсетуге тырыстым. Онда біздің қайдан шығып, қайда барғанымыз көрсетіледі… Әрине, онда атыс, төбелес, өлім сияқты бейнелер бар. Бірақ ойланатын нәрсе көп. «Экшн» болғаннан кейін, ол міндетті түрде болуы тиіс. Өз кезегінде «Крестный отец» фильмі – «экшн». Бірақ маған Форд Копполаға дейін әлі алыс, алайда барынша тырыстым», – деген болатын.
Сонымен бірге Ермек Тұрсынов баспасөз беттерінің біріне берген сұхбатында:«Бұл үш қадам – «Келін», «Шал», «Кенже», ана, әке, ұл, таулар, дала, қала – бұл менің ұлтымның эволюциясы тәрізді, сонау түрік кезеңінен бастап алынған тарихи үзінді. Ал мұнда мен аздап болса да болашаққа үңілгім келді. «Кенже» — бұл біздің болашағымыздың көрінісі. Бұл болашақта бізбен не болатыны туралы менің толғанысым. Сюжеті біраз қарапайым – бұл ауылда қалып, кейін қалаға күндерін көру үшін келген ағалы-інілінің оқиғасы», – деп фильмнің арқауы жайлы аздап айтып кеткен еді.
Айта кетерлігі – Ермек Тұрсынов «Мұстафа Шоқай», «Құрақ көрпе», «Гүлзар», «Апамның жұмағы», «Кешiккен махаббат», «Моңғол», «Бақсы», «Келiн» және тағы басқа көркем фильмдерге сценарий жазды. «Келiн» (2008), «Шал» (Эрнест Хемингуэйдiң «Шал мен теңiз» повесiнiң желiсiмен, 2012) фильмдерiн түсiрдi. Бiрнеше халықаралық байқаудың лауреаты. 2009 жылы Сұлтан Бейбарыс туралы жазған «Мамлюк» романын жариялаған.
Мұндайда, Ермектің өзі айтқан әлгі бір Копполаға дейін «әлі алыстың» жайын көп қазақ білер-білмес! Бірақ «Ермек тағы не бүлдірді екен» деп елеңдейтін елге онан гөрі «Келін» мен «Шалдан» кейінгі «Кенженің» жыры қызық болатынға ұқсаңқырайды…
