«Общественная позиция»
(проект «DAT» №42 (359) от 17 ноября 2016 г.
Апта аптығы
Астанада құрылысшылардың көз алдында ЭКСПО көрмесі аумағындағы нысандардың бірі опырылып түсті, деп хабарлайды Baq.kz.
«Декоративтік көпірдің бір бөлігі бар еді, ол расында опырылды. Бұл бүгін бірнеше сағат бұрын болып отырған жағдай. Себептерін әзірге білмеймін. Бұл ғимаратты BI Group компаниясы салып жатыр. Олар енді жобалаушыны шақырды, құрылыс бөлігін қайта қалпына келтіретін болады», – деді «Астана ЭКСПО-2017» ҰҚ АҚ қоғаммен байланыс департаментінің директоры Сергей Куянов.
Оның айтуынша, ұлттық компаниядағылар ғимаратты әзірше пайдалануға қабылдамағандықтан, бұл нысанды енді мердігерлер өз қаражатына қайта қалпына келтіруі тиіс.
Baq.kz
Меңзеу
Басқа елде ең алдымен миллиардер болады, содан соң президент болып сайланады. Біздің елде президент болады, содан соң барып миллиардер болады.
• Ержан Тәліптің ФБ-парақшасынан
ҒАЛАМТОР ҒАРІП БОЛДЫ
Қазақстан Freedom House халықаралық ұйымы ұйымдастырған ғаламтор еркіндігі рейтингінде 65 орынның 50-шісіне тұрақтап, өз позициясын төмендетті.
Жарияланған зерттеуге сәйкес, еркін емес ғаламтор деңгейі бойынша – 63 балл, ал БАҚ-тағы еркін емес сөз деңгейі бойынша – 84. Айта кетелік, Freedom House желідегі еркіндік деңгейін 0 – 100 аралығында белгілейді. Бұл ретте 0 балл толығымен тәуелсіз ғаламторды білдіреді.
Қазақстанда ғаламтордағы сөз бостандығын шектеу барлық 9 параметр бойынша анықталған: әлеуметтік желілерді бұғаттау; саяси, әлеуметтк және діни контентті бұғаттау; үкіметтік тілшілердің белсенділігі; ақпараттық-коммуникациялық желілерді бұғаттау; ғаламтордағы цензураны күшейтетін заң қабылдау; саяси немесе әлеуметтік тақырыптарда сөз қозғаған блогерлерді қамауға алу; блогерлерге шабуыл жасау; билікті сынға алатын интернет-ресурстарға техникалық шабуыл жасау.
Freedom House барлығы 65 елді үш параметр бойынша бағалаған: ғаламторға қол жетімділік, контентке шектеу қою және қолданушылар құқығының бұзылуы.
Тізімде бірінші орында Эстония мен Исландия (6 балдан), сосын Канада (16 балл) мен АҚШ (18 балл). Грузия 10-шы орында (25 балл), Армения – 17-ші (30 балл), Қырғызстан – 21-ші (35 балл), Украина – 25-ші (38 балл), Әзірбайжан – 43-ші (57 балл), Беларусь – 48-ші (62 балл), Қазақстан – 50-ші (63 балл), Ресей – 52-ші (65 балл), Өзбекстан – 61-ші (79 балл). Соңғы 63 пен 65 аралығындағы үш орында Иран, Сирия және Қытай (сәйкесінше, 87, 87 және 88 балл).
Еске салсақ, былтырғы Freedom House құрастырған ғаламтор еркіндігі рейтингінде Қазақстан 65-тің 48-інші орнында болған еді. 2015 жылы Қазақстан ғаламтор еркіндігі индексінде 61 балл жинады.
Azattyq.org