Қазақстан 2014 жылы Бразилиядан жалпы сомасы $9,1 млн-ға 6,7 мың тонна ет импорттады, деп хабарлайды ҚазТАГ. Ол 2013 жылмен салыстырғанда көлемі жағынан 18,3%-ға, сомасы жағынан 43,8%-ға артық, деп хабарлады агенттік ҚР Қаржы министрлігінің кедендік бақылау комитетіне сілтеме жасап.
Жарияланған мәліметтерде көрсетілгендей, Кедендік одақ елдерін есепке алмағанда, Қазақстан 2014 жылы $196,5 млн-ға 169,1 мың тонна ет сатып алған: ол 2013 жылғымен салыстырғанда көлемі жағынан 6,7%-ға, ал сомасы жағынан 7,7%-ға аз.
Қазақстанға ет жеткізетіндердің арасында ең ірілері: АҚШ – 119,4 мың тонна ет (-4%) $104,1 млн (-1,9%) сомаға, Украина – 19,3 мың тонна ет (-2,2%), $33,3 млн (-7%) сомаға, Польша – 5,2 мың тонна ет (-37,3%), $13,3 млн (-35,6%) сомаға, Канада – 4,7 мың тонна ет (+9,8%), $12,4 млн (+18%) сомаға сатқан.
Сонымен, мұндай алыс-берістің мәні не болғаны: былтыр біз Ресейге 13 мың тонна ет саттық, ал алыс-жақын шетелдерден 170 мың тоннаға жуық ет сатып алдық. Ендеше өзімізді жарылқамай жатып, шетке ет сатқан не теңіміз?
Ерлан АУЫЛБАЛАЕВ