Бұл екі арада
Ал отбасын құрап, балалы-шағалы өмірге қадам басуға ниетті сұлулар кезегіне кімдер келді? Бұл қатарда да біраз қызық бар.
Шоу-бизнестегі «бизнес леди» атанған Динара Қырықбаева таяуда қуанышты жаңалығын жұртшылыққа жеткізді. «Instagram» деген «өсекші» желінің жеткізуіне қарағанда, Динараға сырға салған екен.
Алайда «қара қыздың» жүрегін жаулаған жігіттің кім екені құпия. Бір анығы – белгілі әнші Гүлнұр Оразымбетова мен атақты айтыскер Айнұр Тұрсымбаева өз «Instagrm» парақшаларында: «Қызға сырға салдық. Динара қыз енді ұлы жүздің келіні. Олжас – Динара, бақытты болыңдар!» деп жазып, Динараға сырға салу рәсімінен фотосуреттер жариялаған екен.
Ал «билет қалтада – пойыз қайда кетеді» демекші, сырға салынды – той қайда қашар дейсіз! Айтпақшы, Динараның «Event company by Dinara Кyrykbayeva» деп аталатын той ұйымдастыратын эвент-компаниясы бар. Бұл компанияда той өткізудің ең төменгі бағасы 3000-5000 доллар, ең жоғарысы – 50-200 мың. Бұл – жел сөздің желігі емес, Динараның өзі жария еткен ақпар. Ендеше Динара үшін ұзатылу – ұзақ-сонар қиындық болмайтыны ап-анық.
Ал «KeshYou»-ден кетіп, жұлдызды биікке жақындай түскен Мөлдір Әуелбекова «кезектің» ең соңында тұр. Оған сырға емес, әзірге сөз салып жүрген жігіт бар екен: оны мөлдіреген Мөлдірдің өзі «Instagram» желісіне «жетектеп әкепті».
Ол өзінің іnsta-парақшасына: «Өміріңдегі үлкен сәттілік – теңінді тауып, оның жүзіне тамсана қарау, қызыға тыңдау, шын ниетпен күлу және әр кездесуді тағатсыздана күту… Туылған күніңмен!» деп, бадырайтып жазып қойған екен.
Алайда әлеуметтік желідегі «сын айтқыштардың» пікірі екіге жарылады. Бірі жарасымды жұп санап: «Бақытты болыңдар!» десе, екіншісі: «Өзіңізден үлкендеу…» екен деп жатыр.
Бұл да аса бір мін тағарлық «кемістік» болмаса керек: өмірде ненің болса да үлкендеу болғаны жақсы емес пе…
Бетті дайындаған – Жансая ЕРТАЙ
