Бұған дейін
Егер президент әкімшілігінің басшысы Нұрлан Нығматулиннің басы істесе, ол Жарылқап Қалыбайды сайлауға өткізуі керек және президентті соған көндіруі керек.
Оның себебі мынадай: президенттің коммунист болып жүргендегі үкілеген асыл арманы – Кеңес Одағының Министрлер Кеңесін басқару болғаны белгілі. Ол Одақ кенеттен тарқағанда, қолжетім жердегі сол арман ғайыпқа кетіп, жоқ болды.
Қарапайым металлургтен Коммунистік партияның күшімен, кезіндегі марқұм Димекеңнің сенімімен тақтың төріне шығып қалған Нұрекең сонда да әйтеуір бір Одақтың мекемесін басқарамын деген үмітпен сол Одақтың басқа түрде болса да құрылуына 25 жыл бойы жанталасып келеді…
Бірақ… енді сол мақсатқа жеттім-ау дегенде, Ресей ойда-жоқта бүкіл әлемнің жауына айналып отыр. Енді елбасы 25 жыл «интеграция!!!» деп, ойбайлап алып, қалай 180 градусқа бұрылады?
Өзі қазған әдемі шұңқырға өзі топ етіп түсті де қалды…
Оның үстіне Путин бауыры сайлаудың алдында ЕАЭО ортақ валютасы болады деп, қалған екі ағасымен де ақылдаспай қойып қалды. Бұл – сайлауға түскен Нұрекеге, әрине, үлкен минус. Теңгеден айырылғанымыз – туымыздың жығылғаны… Оны білімсіз адамдар да түсінеді.
Меніңше, Путин елбасыға орыныңды жастау, басқа сенетін адамға бер деген сияқты. Соған Нұрекең көнбеген соң, қырсық мінезді Путин әзірге осындай арнайы шалыс істеді деп ойлаймын.
Ал енді біздің ағайындардың тура осы жерде міндетті түрде айтатын: «А причем тут Жарылкап?» – деген сұрағына жауап айтайын.
Жарылқапты өткізсе, қазақ ұлтшылдарының нақты дауысы көрінеді. Мысалы, «Жарылқапқа халықтың берген дауыстарына тиіспеңдер!» деп бұйрық берсе, оған 20 мен 30 пайыздың арасында дауыс берілуі керек.
Және бұл Жарылқапты пір тұтқаннан емес, шалдан шаршағаннан дауыс ауысады деп ойлаймын… Өйткені 25 жылда адам тұрмақ, металлдың да «шаршайтыны» белгілі…
Ал бұл президентке неге керек?
Ол ертең Путинге: «Кешір, Володя! Мендегі 30–35 пайыз ұлтшылдар қарсы болып жатыр. Маған Майданның керегі жоқ. Ортақ валютаға қарсы емеспін, бірақ ол әлі ертерек…» – деп айтуы керек. Басқа мәселелерге келсе де – солай…
Путиннің өзі орыс ұлтшылдарын 100% пайдаланып отыр. Тіпті Украинаға қарсы да соларды айтақтап салып отыр. Біздің Ақордада отырған данышпандар осындай жағдайды түсініп, неге пайдаланбасқа?
Нұрлан мырза, осы туралы ойладыңыз ба?
Тегі, сіздер қазақ халқының болашағын ойлайсыздар ма осы?
Серік САПАРҒАЛИ
(«Фейсбуктағы» парақшасынан)