Жамбыл облысы Жуалы ауданындағы Боралдай ауылдық әкімшілігіне қарасты Қоғалы ауылында соғыстан, еңбек армиясынан оралмаған боздақтарға, соғыстан кейін елге келіп, еңбек етіп, қайтыс болған азаматтарға арналып үлкен ас берілді. Аумағы 580 метрден асатын бейіт пен ескі қорымдарға қоршау жасалып, кіре берісіндегі қақпаның маңдайшасына «Қоғалы» деп жазылды.
Төмпешік-постаменттің үстіне қойылған қызыл мәрмәр тасқа аты қашалып жазылған барлығы 150-ден астам марқұм болғандар – осы Қоғалыда туып-өскен азаматтар. Аруақтарға құран бағышталып, естеліктер айтылды. Алғашқы сөздің басын осы ескерткішті орнату жұмыстарын өз қолына алып, ұйымдастыра білген Ордабек Момынқұлов ағамыз бастап, қысқаша баяндама жасады. Кеңестер Одағы заманында Мәскеудегі халықаралық көрмеге қатысқандардың қатарында Қоғалы ауылының сол кездегі үздік бөлімше меңгерушісі Алшынбек Қасқырбаев пен колхоздың бас шопаны Айкелді Қабылов болғанын атап өтті.
Аудан әкімі Батырбек Құлекеев сөз барысында аудан бойынша 14 ескерткіштің ашылғанын айтса, Қызылордадан келген қонақтардың атынан жасы сексенді еңсерген Мұқит Смайылов, Сағадат Нұрмағанбетов атындағы қордың Жамбыл облысы бойынша басшысы Тұрғынғали Нұрсейітов болашақ ұрпаққа үлгі болар игі іске ризашылықтарын білдірді.
Осы шараға Сәтпай Қожамқұлов, Сәрсенбек Құлбаев, Ғабит Жәйшібеков, Ғалым Қожамқұлов, Нұрғали Мырзалиев, Қуаныш Болысбаев қаржылай демеушілік жасаса, ауылдың әр түтіні он мың теңгеден жинап, өз үлестерін қосты. Ауыл ақсақалдары Бура Көпбосынов пен Әзімбек Қасқырбаев, Тұралы Әзімов құрылыс жұмысының сапалы жүргізілуіне ақыл-кеңестерін айтып, басы-қасында жүрді.
Аға ұрпаққа тағзым ету – болашаққа өнеге болсын деген ниеттен туған ізгі шараға ауыл, аудан, облыс аумағанынан келіп қатысқан азаматтарға «ДАТ» газеті арқылы алғыс айтып, қуанышымызбен бөлісуді жөн көрдік.
Дәулетбек ҰЛАМАКӘДІРОВ,
зейнеткер
