«Общественная позиция»
(проект «DAT» №27 (344) от 07 июля 2016 г.
Ойдан-қырдан
Бұған дейін хабарланғандай, сәуір айында Қазығұрт ауданының (ОҚО) мектеп оқушысы Мұхамедәлі Ағыманұлы өзенге ағып кеткен 3 жасар қызды құтқарып қалған еді. Жуықта оған ҚР президентінің жарлығы бойынша берілген «Ерлігі үшін» медалі салтанатты түрде табыс етілді, деп хабарлайды Stan.kz порталы.
Еске сала кетсек, оқиға 1 сәуір күні болған еді. Түні бойы жауған нөсерден кейін Алтынтөбе ауылды округіне қарасты Қосағаш ауылы маңындағы шағын Қаржан өзені күрт тасыған. Өзен жағасында ойнап жүрген балалардың арасындағы 3 жасар Ақбілек Серікбай суға құлап кетеді.
Бұл уақытта осы маңға жақын жерде Мұхамедәлі мен оның әкесі мал бағып жүрген екен. Әкесі малды қайыруға кеткенде, Мұхамедәлі балалардың шу ете қалған дауысын естиді. Қараса, кішкентай қыз суға ағып бара жатады.
«Ұлым дереу жүгіріп барып, көршінің қызын судан құтқарып қалды. Демі тоқтап қалған қызға жасанды жолмен тыныс алуына көмектесіпті. Кейін мұның бәрін қайдан білесің деп сұрасақ, мектепте мұғалімдері алғашқы көмек көрсетуді үйреткенін айтты. Мен өз ұлымды мақтан тұтамын!» – дейді оның әкесі Ағыман Сманов.
Осылайша оқушы өз өмірін қатерге тігіп, кішкентай қызды аман алып қалған. Бүгінгі күннің жас батыры болашақта құтқарушы болуды армандайды. Мұхамедәліге көптен күткен медалін облыстық Төтенше жағдай департаментінің басшысы Александр Путейко тапсырып, құтқарушылар қатарына қосылуға ұсыныс та жасады, – деп хабарлайды otyrar.kz.
