«Общественная позиция»
(проект «DAT» №18 (382) от 12 мая 2017 г.
Ойдан-қырдан
Жуырда Әл-Фараби атындағы Қазақ ұлттық университетінің Халықаралық қатынастар факультетінде әнші, продюсер, тележүргізуші, ұстаз, «МузАрт» тобының мүшесі, Қазақстанның еңбек сіңірген қайраткері, «Дарын» мемлекеттік жастар сыйлығының иегері Сәкен Майғазиевпен кереметтей кездесу өтті. Кездесуді Халықаралық қатынастар факультеті «Әлемдік экономика» мамандығының 1-курс студенттері ұйымдастырған болатын.
Бұл кездесу әдеттегі әншілермен болатын кездесуден мүлдем бөлек болды. Себебі бұл кездесуден студенттер Сәкен Майғазиевті жаңа қырларынан тануға мүмкіндік алды. Сәкеннің студенттермен болған сұхбаты өнер өлкесін ғана емес, қоғамдық ортадағы әлеуметтік мәселелерді де, жастар тәрбиесі проблемасын да қамтыды. Әнші студенттердің әр сұрағына толықтай жауап беріп қана қоймай, сонымен қатар өзінің өмірлік тәжірибесінің негізінде жиналған жастарға ағалық қамқорлығын танытып, ақыл-кеңестерін де айтып отырды.
Бұдан бөлек Сәкен әнші студенттермен қосылып, қызықты ойындар ойнады, жанды дауыста ән шырқады, ал студенттер болса, өз өнерлерін көрсетті. Ақынжанды студенттер кездесу үстінде Сәкен-серіге арнап өлең шығарды. Осындай қызғылықты және танымды кездесуді ұйымдастырған 1-курс студенттерінің кураторы, доцент Назым Дабылтаева, әншімен дидарласуға дәнекер болған Айсунна Жұмабекке студенттер алғыстарын білдірді.
Аружан МҰСАЕВА,
университеттің 1-курс студенті