Бәрекелді!
Индонезиялық «Sportsatu.com» порталының журналистері Азияның ең сұлу спортшы қыздарының қысқаша тізімін жасады. Бір қуанарлығы – қазақстандық волейболшы қыз Сабина Алтынбекова автор атаған рейтинг бойынша бәссіз, бәсекелессіз бірінші орынға жайғасқан.
Аталмыш портал дерегіне сүйенсек: «Соңғы уақытта Азияның сұлу спортшы қыздары жайлы сөз қозғағанда, бірден 2014 жылы сұлулығымен танымал болған Сабина Алтынбекова ойға келеді…» деп жазған болатын.
Сонымен қатар, «Sportsatu.com» порталы ұсынған сұлулар үздігінің алғашқы үркердей үлбіреген үштігіне біздің Сабина сұлудан кейінгі лайықты екеу деп, Қытайдың футбол құрамасының қақпашысы Чжао Лина мен индиялық шахматшы қыз, халықаралық гроссмейстер Таниа Сачдевті енгізген.
Осындайда қазақ қызының сұлулығын «Алты құрлыққа» тағы бір мәрте паш еткен Сабинажаннан айналып кетпей көр?! Бәлкім, жазушы Мұхтар Мағауинның бәз бір шығармасына арқау етіп: «Әлемдегі ең сұлу қыз – қазақ қызы» дейтіні де тегіннен-тегін болмаса керек! Сосын ғой, сосын біз Сабинадай сұлуларымызды өз ішімізде қаншалықты әспеттей алдық деп ойға қаласың…