«Общественная позиция»
(проект «DAT» №16 (287) от 23 апреля 2015 г.
Тураби тұғыры
Нұртөре Жүсіп:
Хайуанаттар бағында үлкен екі піл тұр: жақында оның ұрғашысы пілдеді, әкесінен айнымайтын бір кішкентай піл өмірге келді. Үлкен пілдер кіп-кішкентай қазыққа жұп-жұқа шынжырмен байланған. Бір тартса пырт еткізіп үзіп, қашып кетуіне болар еді. Олар неге қашпайды? Өйткені үлкен пілдер де кішкентай кезінде қанша күшенсе де, бұл жерден ешқайда қашып кете алмайтынын түсінген. Сондықтан қанша үлкен, қанша күшті болса да, олар қашып кету туралы ешқашан ойламайды да…
Бойында пілдің қуатындай күш-қайрат бола тұра, біздің қазақтың ештеңе істегісі келмейтінін пілдің пейілімен түсіндіруге болатын сияқты…
Серік Өміртай:
Көрінген өзі біліп, хат жолдай салатын заман болды ғой. Ұлым «әке, сізге «сік» деген біреуден хат келді» деп, айқай салмасы бар ма?!
«Тәйт! Аузыңды бұзам» деп, ашумен қолынан жұлып алсам, расымен «СІК_РК» деген біреуден орысша: «26.04.15 күні сайлауға келіңіз…» деген хат келіпті.
Сіздерге де келді ме?))
Ахметбек Нұрсила:
…Жанталасып соғысып жатқан әлемде бір бейқам жатқан, «шоу»-латып, шырылдауық шегіртке сияқты тойлатып: «аспанға қарап, жұлдызды санап, «чип-чип» деп, «жүрегі ауырмай» жүрген бір ұлт бар. Теледидарын қосып қалсаң, «Тойбестстар», «Бенефис-шоу», «Түнгі студия»!..
Қашанғы «шоу»-латады екенбіз? Апамыз күндіз жоғалып, ойнап кеткенде ұрсушы еді: «Ой, ойының осылғырлар!» – деп. Түбінде ойынымыз осылады-ау… «Шаншар» мен «Нысананың», «Екі езу» мен «Базар жоқтың» заманы жүріп-ақ тұр қазір…
Қазіргі кез бәрін қойып, «Қалай сауданы, өндірісті дамытамыз, келер ұрпаққа қалай бай да мәдениеті жоғары қоғам қалыптастырып кетеміз» деп, әрқайсымыз ойланатын заман емес пе?!
«Не түсер құр күлкіден жыртың-жыртың…» – демеп пе еді Хакім Абай?!
Айтқожа Фазыл:
«…Патриот бол!! Патриот бол!» деген жалаң сөзге еріп, патриот болып жатқан жастар аз. Және сол «патриот бол» мен «патриотпын» деп айғайлайтындардың көбісін көріп, жастар «патриот» деген боқауыз сөз деп ұғынар… «АРТ» телеканалындағы жекпе-жекте қазақ тілі қоғамының облбасшысы мені екі сөзінің бірінде «сіз патриот емессіз» деп әшкерелемек болды өзінше. Екі айдан кейін ол ақша жеп ұсталып, өз басымен қайғы болып кетті.
Маған орыстардың патриоттық тәрбиесі ұнайды. «КрымНаш», «СевКазНаш», «Великая Россия» деген сөздерде орыс жастары үшін табылмас, суалмас патриоттық жатыр. Біздегі патриоттық тәрбиелеу бүгінгі күнге немесе келешекке байланысты емес, түгелдей өткен ғасырлардағы жетістіктерге «батырларға, қалмақ қырғындарына» байланысты. Қазіргі мақтайтынымыз – ет, киіз үй, қазақтың салт-дәстүрі, киімдері, т.б. қазіргі заман талабына сәйкес емес нәрселер…
Мен жолдастарыммен бірге Путиннің «Қазақ мемлекеті болмаған» деген мәлімдемесіне қарсы Астанадағы Ресейдің елшілігіне бардым: оған 100 метр жеткізбей бізді бір автобус «ОМОН» ұстады. Мемлекет мүддесі, келешегі үшін керісінше істеу керек еді ғой…
Мен орыс телеканалдарының біздің эфирді түгелдей жаулап алуына 1000% қарсымын. Себебі бұрын ауылыңды, үйіңді тонау үшін, ұрылар ауыл иттеріне сүйек тастап, өздеріне үрмейтін етіп алатын болған. Ресей телеканалдары – орыстардың біздің жастарға тастаған сүйегі.
Украинадағы оқиға, одан кейінгі орыстардың шуылы, Путин мен «Жирик» сияқтылардың мәлімдемелерінен біздің жауымыз 80% Ресей деп ойлау керек.
Біз қазір олармен ауыз жаласып, келесі ұрпаққа түтіндеп жатқан шоқ тастап кетіп барамыз.
Маржан Момбекова:
Таңертең «ФБ»-қа бір шолу жасаймын. Орыс тілді бір досымның парақшасын қарап шығып, мәңгүрттікті жеңу мүмкін емес екендігіне көз жеткіздім. Тақырып келімсектер туралы болатын. Еуропалықтардың дағдарыс салдарынан өздеріне жетпей жатқан соң, Африка, Азия елдерінен көшіп келіп жатқан келімсектерге наразылықтары туралы талқыланып жатқан. Қызды-қыздымен бір жас қыз: «У нас своих переселенцев хватает из Монголии, Китая, оралманы говорят только на казахском и учатся у нас» депті.
Әттеген-ай, сен секілді мәңгүртті қай қазақ тудырып еді?!
Аманғали Әбуов:
Ресей мамандары мен идеологтары баяғы патшалық кезеңде басталған басқыншылық, қазақтың жерін иеленіп, өзін жою, не мәңгүрт-орысқұлға айналдыру идеяларын әлі жүзеге асыруын жалғастырып келеді. Таяуда ғана «Ортақ еуразиялық ақпарат үшін медиаресурстарды біріктірейік» деп ұсыныс жасап отыр. Бұл енді таза «Қазақстан Ресейдің бір губерниясы болып, қол астыма кір» дегендері ғой. Медиаресурстарды біріктірсек – «қара ивандар» болғанымыз.
Біздің билік ауыспай, Мәскеуден бойын аулақ салатын билік келмей болмайды. Өйткені 1991 жылдан бері біз онсыз да орыстың империяшыл медиаресурстарын тұтынып, оқып, көріп, тыңдап келеміз. ТМД-ға ортақ деп «Мир» деген арнаны ашты, ол толық Ресейдің насихатшысы болып отыр. Еуразия, КТК, НТК, «31», «7 канал», «Казспорт» та жартылай, «Астана», тағы басқа қазақстандық деп саналатын телеарналардың басым бөлігі орыс тілінде хабар, ақпарат таратып қана қоймай, ресейлік телеарналардың өнімдерін көрсетіп жүр. Қазақстандық телеарналарда кемі 50 пайыз орыс тілінде ақпарат, өнім таратады. Тіпті қай каналды ашып қалсаң да, қазақпен қазақ отырып алып, орысша сайрап жатады. Дүңгіршектердегі газет-журналдың 70 пайызы орысша, ол аз десеңіз, басым бөлігі ресейлік өнімдер. Билік «Қазақстандық өнімді сатып алайық!» – деп ұрандатып жүр ғой. Медиарусурстарда да тек «Қазақстандық өнімдерді сатып алу керек» деп, халыққа қазақи, ұлттық, ең болмағанда, қазақстандық идеологияны насихаттаудың орнына Ресейдің медиаресурстарына барлығын қосып берейік деу – барып тұрған орысқұлдық.
(Пікірлер интернеттің әлеуметтік
желілерінен алынды)
