«Общественная позиция»
(проект «DAT» №41 (358) от 10 ноября 2016 г.
Ойдан-қырдан
- Жақында ғана Республика сарайында дүркіретіп концертін өткізген Шаһизада ханым аталмыш мәдениет ғимаратының ұжымына өкпесі қара қазандай, деп жазады Alashinform.kz сайты.
Өйткені концерт барысында техникалық қателіктер болып, әншінің көптен күткен кешінің шырқы бұзылған. Бұл жайында ол «Астана» арнасының «Ел аузында» бағдарламасына берген өзінің сұхбатында мәлімдеді.
«Республика сарайына кінә тағып отырмын. Себебі ондағы мамандар дыбысты өшпейтін жерде өшіріп, әдемі көріністерді тоқтатып тастайды. Шынымды айтсам, мен өте қапа болдым, қаншама ақша төленіп отыр, қаншама сенім артқан болатынбыз», – дейді өнер иесі. Танымал әнші осындай үлкен сарайдың атына сай еместігін, лайықты жұмыс жасалмағанын айтады.
Мұндай жағдай «Ринго» тобының әншілерін де айналып өтпепті.
«Микрофоным бірнеше рет қосылмай қалды. Ондағыларға болған жайтты айтқанымда, байқамай қалғанын айтты», – дейді топ әншісі Данияр тілшілерге берген сұхбатында.
Орын алған жағдайлардан кейін әншілердің Республика сарайының басшылығына деген реніші өршіп тұр. Шаһизада бұны жабулы қазан күйінде қалдырмақ емес, шара қолданамын дейді: «Мен заңгерлермен арнайы келісім-шарт бойынша Республика сарайының қателіктері үшін, концертімді бұзғаны үшін олармен ақылдасып, сотқа берейін деп отырмын. Өйткені олай жасай беруге болмайды ғой».
Сонымен қатар ол бірер жыл бұрын күрделі жөндеуден өткен сарайдың сапасына да сын тақты. «Қаншалықты жөндеуден өткізгенін мен түсіне алмадым. Ішіндегі дүниелер ескі, сырты ғана жылтырап тұрған сияқты. Қалжыңдап айтқанда, ішіндегі дүниелер «китайский» екен», – дейді өнер иесі.
Жеке кешінің ойдағыдай өтпегеніне, төлеген ақшасының ақталмағанына әнші қатты өкінеді. Ендігі жерде мекеме ұжымынан өтемақы талап етпек ойы бар.
