Жоғарғы соттың назарына
Редакциямызға Алматы қаласының «Әйгерім» ықшамауданында тұратын Меделхан Сайдахметова хабарласты. «Алтын алқа» төсбелгісімен марапатталған көп балалы ардақты ананың айтуынша, сот шешімімен өзінің жалғыз баспанасы мен жерінен айырылып қалғалы тұр. Отбасының меншігіне аяқ астынан біреу дауласқан. Мәселенің мән-жайын түсіндіру үшін 15 жылға шегініс жасайық.
2000 жылы «Тамсан» ішкі мигранттар мен репатриант жастар қоғамы деп аталатын ұйым Алматы қаласы әкімдігінің бөлген жерінен соғыс ардагері әрі мүгедегі Құлжабай Сайдахметов пен оның жұбайы, «Алтын алқаның» иегері Меделхан Сайдахметоваға «Әйгерім» ықшамауданынан №158 нөмірлі жер үлесін береді. Отбасының тірнектеп жиған қаржысына тек 5 жыл өткен соң ғана үй тұрғызуға шамалары жеткен.
Баспанаға қол жеткізіп, «уһ» деген жандардың қуанышы көп ұзамай су сепкендей басылады. Жер үлесін бөлген әкімдіктегі шенеуіктер үй «қызыл жолақ» үстінде тұр деген сылтаумен баспананы заңдастырудан бас тартады. Ең қызығы – кейінірек Сайдахметовтар отбасы өздерімен бірге баяғы «Тамсан» қоғамынан жер телімін алған көршілерінің түгелімен үй-жайы мен жерлеріне меншік иесін айғақтайтын құжат алғанын біледі. Бізге де кезек келер деп, арқаны кеңге салып жүрген жандар жерлерін бөтен адамның даулап жүргенін білгенде, аспаннан жай түскендей абдырап қалады.
Алатау аудандық сотында Ибрагимова есімді азаматша өзіне 2004 жылы берілген №108 жер телімінің мемлекеттік актісін көрсетеді. Және сол жерді Сайдахметова заңсыз иеленіп отыр деп айыптайды. Алайда «Тамсан» қоғамының жер телімдері сызбасында шағымданушының фамилиясы жоқ боп шығады. Яғни, қоғам Ибрагимова есімді адамға жер телімін бермеген. Бұл азаматша даулап жүрген №108 жер телімі ешқашан «Тамсанның» иелігінде болмағаны да анықталды.
Сонда бұл адам неліктен Меделхан Сайдахметова бала-шағасымен тұрып жатқан № 158 жер теліміне дауласады деген қисынды сұрақ туады? Оған Алатау аудандық соты заңның әріптеріне сүйене отырып, әділетті жауабын беруі тиіс еді. Алайда судья заңның өзіне ғана мәлім тармақтарына сүйене отырып, 85 жастағы Меделхан әжейге бала-шағасымен баспаналарын бұзып, жерді шағымданушыға беруге бұйырады. Жауап беруші тарап адвокатының айтуынша, алғашқы сот отырыстарында жер теліміне қатысты Ибрагимованың атына кадастрлық істің тіркелмегені анықталған. Мұны айғақтайтын құзырлы органның хаты да бар. Ал кейінірек әкелген кадастрлық құжаттың өрескел заң бұзушылықтармен толтырылғаны әшкереленеді. Дәлірек айтқанда, жер телімінің шекарасын анықтауға көршілер емес бөтен адамдар қатысқан дейді адвокат. Ал жерге орналастыру құжаттамасының жобасына Алматы қалалық жер қатынастары басқармасының бастығы келісім бермеген.
10 жылдан бері жер телімін іздемеген, оның салығын төлемеген адамның аяқ астынан өзгелердің жеріне осылай дауласқаны таң қалдырады. Алайда бәрінен бұрын жауап беруші тарапты судьялардың құжаттардың заңдылығымен қоса, дау болған жердің қай жерде орналасқанын анықтауды да қажет деп таппағаны есеңгіретті. Алатау аудандық соты Меделхан әжейдің жауапкер ретінде тартылған немересінің қолына баспананы бұзып, жерді шағымданушыға беру туралы шешімді ұстатады.
10 баланы дүниеге әкеп, тәрбиелеген «Батыр ана» 85 жасында далада қалуы мүмкін. Тоғыз бірдей сот отырысынан әділетті шешім көре алмаған соғыс ардагерінің жесірі ендігі үмітін Алматы қалалық сотының апелляциялық коллегиясына артуда. Кеше ғана жеңістің кезекті мерейтойында әкелері мен аналарының ерлігін ұмытпауға серт берген шенеуіктер аштық пен соғыстың ащы дәмін татқан кейуананың бүгінгі жанайқайын естір ме екен? Естіп қана қоймай, алыс пен берістен гөрі қарыз бен парыздың жүгі анағұрлым ауыр екенін түсінсе, қәне?
Дәнен БАЙСАЛ,
Алматы қаласы
