«Общественная позиция»
(проект «DAT» №39 (356) от 27 октября 2016 г.
Солай ма?
Қазақстанда жаңа «Қазақстан театрлар ассоциациясы» қоғамдық бірлестігі құрылды, деп хабарлады 20 қазанда ҚазТАГ ҚР Мәдениет және спорт министрлігінің баспасөз қызметіне сілтеме жасап.
Ведомство сайтында жарияланған хабарда айтылғандай, Ассоциацияның президенті болып М.Әуезов атындағы Қазақ мемлекеттік академиялық драма театрының көркемдік жетекшісі, КСРО Халық әртісі Асанәлі Әшімов сайланды.
Жаңа «Қазақстан театрлар ассоциациясы» театр қоғамдастығының құрылуы туралы жетекші қазақстандық театрлардың басшылары жариялады. Бұл шешімді қолдаған Қазақстанның жетекші театрларының басшылары қатарында М.Әуезов атындағы Қазақ мемлекеттік академиялық драма театры, Ғ.Мүсірепов атындағы Қазақ мемлекеттік академиялық балалар мен жасөспірімдер театры, Н.Сац атындағы мемлекеттік орыс академиялық балалар мен жасөспірімдер театры, М. Лермонтов атындағы орыстың мемлекеттік академиялық драма театры, Мемлекеттік республикалық кәріс музыкалық комедия театры, Мемлекеттік республикалық ұйғыр музыкалық комедия театры, Республикалық неміс драма театры және т.б. басшылары бар, деп хабарлады агенттік.
Қазақстан Республикасы Мемлекеттік республикалық театрлары құрылтай жиналысының шешімінде: «Біз «Қазақстан театрлар ассоциациясының» мақсаттары мен міндеттері заман талабына сай болып, Қазақстан театр қауымдастығына қолдау көрсете отырып, халықаралық деңгейде рухани бай мәдениетімізді жан-жақты көрсететінін мәлімдейміз», – деп жазылған.
Еске сала кетсек, Қазақстанда осындай мақсаттарды жүзеге асыру үшін құрылған «Қазақстан театр қайраткерлері одағы» бар еді. Оның төрағасы – Қазақстанның Халық әртісі, Мемлекеттік сыйлықтың лауреаты Тұңғышбай Жаманқұлов.
Енді, міне, Мәдениет және спорт министрлігінің мұрындық болуымен «үй ішінен үй тіккен» жаңа қауымдастық құрылды. Егер министр Арыстанбек Мұхамедиұлын «жыныстық бопсалауға» икемдеді деген Өнер академиясы түлектерінің жазғыруын және бұл «секс-скандалға» Тұңғышбай Жаманқұлов мырзаның қолдау көрсеткенін ескерер болсақ, жаңа қауымдастықтың қандай мақсатта құрылғанын жобалауға болады. Ол жобаның мақсаты – «Қазақстан театрлар ассоциациясын» мемлекеттік тапсырыстар қаржысымен қолдау арқылы «Қазақстан қайраткерлері одағын» құрту.
Әйтпегенде елдегі ресми тіркеуден өткен айналдырған 55 театр үшін екі бірдей қоғамдық ұйымның қажеті қанша еді? Оның үстіне жаңа қауымдастықтың президенттігіне Тұңғышбай мырзаны сынаушылар тобын басқарған Асанәлі Әшімов сайланғанын қапер қылсақ, министр Арыстанбек Мұхамедиұлының жобасы «кек алу» науқанын көксейтінін білуге болады.
Әлде біздің бұл жоралғымыз жаңсақ па? Ал егер бір қазанға қос қоғамдық ұйымның жетекшілерін тоқайластырған министрлік басқа уәж айтар болса, біздің тілшіміз Арсекең мен Тұқаңды газет бетінде тоғыстыруға дап-дайын.
«D»