«Общественная позиция»
(проект «DAT» №41 (405) от 09 ноября 2017 г.
Алматыдағы Қазақ көз аурулары ғылыми-зерттеу институты мен Жарбосынов атындағы Урология орталығы жеке меншікке сатылады, деп хабарлады бұрнағы күні ҚазТАГ ҚР Қаржы министрлігінің Мемлекеттік мүлік және жекешелендіру комитетіне сілтеме жасап.
«Акционерлік қоғам болып табылатын екі нысан да толығымен жеке меншікке сатылады. «Құрмет белгісі» орденді Қазақ көз аурулары институтының 100 пайыз акциясының бастапқы сатылым бағасы 3,025 миллиард теңге, Жарбосынов атындағы Урология орталығы – 1,598 миллиард теңгеге бағаланды». Қаржыминнің хабарына қарағанда, «тендердің басты шарты – мекемелердің негізгі қызметі 10 көлемінде сақталуы тиіс. Жекешелендіруге жататын нысандарға мейілінше жоғарғы баға ұсынған сатып алушы тендердің жеңімпазы саналады».
Науқас адамдар емделу кезегіне айлап, тіпті жарты жыл бұрын жазылатын екі бірдей өте маңызды институтты жеке меншікке сату қандай мұқтаждықтан пайда болды? Қазірдің өзінде нарық жағдайында жұмыс істейтін, науқастар ағылып келіп, көпшілігі өз ақысына емделетін қос бірдей ғылыми-зерттеу ордалары мемлекеттің бюджетіне тәуелді ме еді?
Біз осы хабар тараған сәтте-ақ анықтаған деректер бойынша, бұл екі мекеме бюджетке соншалықты ауыртпалық салып отырған жоқ. Ендеше өзін-өзі асыраған халықтық маңызы басым мекемелер кімге керек болды? Және ең бастысы – бұл денсаулық ордаларын миллиардтаған сомаға сатып алуға аталған ұжымдар маман-дәрігерлерінің мүмкіндігі келе ме?
Алдағы апталарда редакцияның журналистік тексеру тобы бұл сұрақтарға жауап табуға тырысады. Ал әзірге белгілі болып отырғандай, аты-жөндерін көрсетуді қаламаған инсайдерлік ақпарат көздерінің айтуына қарағанда, бұл мекемелерді ҚР парламенті сенатының депутаты Дариға Назарбаева сатып алмақ. Немесе тендерге түсетін және міндетті түрде ең жоғары баға ұсынатын, тиісінше жеңіп шығу мүмкіндігі шексіз сатып алушы – ел президенті қызының бақылауындағы тұлға (тұлғалар).
Бұл ақпарат шындыққа қаншалықты жанасады? Біз осы жарияланым арқылы сенатор Дариға Назарбаева ханымға редакциялық сауал жолдаймыз. Егер инсайдерлік хабар жаңсақ болып, журналистік тексеру нәтижесінде аталған ақпарат бұрыс болса, тиісті терістеме жариялайтынымызды мәлімдейміз.
Ермұрат БАПИ,
«DАТ» медиа-жобасын шығарушы
Ақпарат үшін:
• Регистрация участников тендера заканчивается 21 ноября 2017 года в 08.00 часов, а сам тендер состоится в тот же день в 10.00 часов на веб-портале реестра государственного имущества.