КІМГЕ ДАҒДАРЫС, «ЖАНБАҒЫС»…

  • Британ сотында Қазақстанның бұрынғы президентінің үлкен қызы, әрі парламент сенатының спикері Дариға Назарбаеваны Лондондағы құны 100 миллион доллардан асатын күдікті үш жылжымайтын мүліктің иесі деп атады.

Сейсенбі, наурыздың 10-ы күні Лондон Жоғарғы сотында өткен отырыстан кейін британ басылымдары ел астанасындағы офшорлық компаниялардың атына тіркелген үш жылжымайтын мүліктің иесі ретінде Қазақстан парламенті сенатының спикері, әрі бұрынғы президент Нұрсұлтан Назарбаевтың үлкен қызы Дариға Назарбаева мен оның үлкен ұлы Нұрәлі Әлиевті атады. Сотқа дейін ВВС медиакомпаниясы британ билігінің күдігін туғызған Лондонның қымбат аудандарының біріндегі зәулім үйде Нұрәлі Әлиев тұрады деп жазған.

Британ билігі «қайдан алынғаны белгісіз байлық» ретінде бұғаттау туралы ордер берген бұл үйлер туралы ақпарат сот барысында жария етілді. Ұлыбританияның қылмыспен күрес жөніндегі агенттігі ел аумағынан «лас» ақшаға жылжымайтын мүлік сатып алуға қарсы күресте қолданылатын бұл ордерді осымен екінші рет пайдаланып отыр. Егер иесі қаржыны заңды жолмен тапқанын дәлелдей алмаса, онда осы ордерге сүйеніп, күдікті мүлік тәркіленеді.

«Назарбаевтың жиені Нұрәлі Әлиев пен оның анасы, Назарбаевтың қызы Дариға Назарбаева сейсенбі күні Лондон Жоғарғы сотында Лондондағы құны 80 миллион фунт стерлинг тұратын «қайдан алынғаны белгісіз байлық» ретінде бұғаттауға ордер берілген үш жылжымайтын мүліктің түпкілікті бенефициары (меншік иесі – Ред.) ретінде аталды» деп жазды британдық Financial Times газеті.

Британ басылымдары Қылмыспен күрес жөніндегі агенттік бұғаулаған нысандар – қымбат үйлер мен пәтерлер екенін жазады. Атап айтқанда, Денвуд-роудтағы зәулім үй, Челси ауданындағы 31 миллион фунт стерлингке алынған қос пәтер және «миллиардерлер көшесі» аталып кеткен Бишоп-авенюдегі 39 миллион фунт стерлингке сатып алынған қымбат үй.

Нұрәлі Әлиев пен оның әйелі Аида Әлиеваның өкілі Лорна Скиннер Бишоп-авенюдегі үйде отбасымен бірге тұрған Әлиевті мүліктің иесі деп атады, деп жазады Financial Times. Адвокат «жақында ұры түскенін» айтып, бұл нысан туралы ақпаратты жария етпеуді сұраған, бірақ сот оның өтінішін қанағаттандырмады.

Жылжымайтын мүліктер тіркелген офшорлық компаниялардың адвокаты бұл үйлерге Дариға Назарбаеваның бұрынғы күйеуі әрі Нұрәлі Әлиевтің әкесі Рахат Әлиевтің қатысы жоғын, үйлер оның ақшасына сатып алынбағанын айтқан. Ұлыбританияның қылмыспен күрес жөніндегі агенттігінің тергеушілері жылжымайтын мүлік Рахат Әлиевтің «лас ақшасына» сатып алынған деп санайды.

Назарбаеваның өкілінің айтуынша, оның клиенті «ешқандай құқық бұзушылыққа қатысы жоғын жеткізеді және соттың бұл мәселені тезірек шешкенін асыға күтеді».

Лондондағы сот процесі жалғасып жатыр.

Добавить комментарий

Республиканский еженедельник онлайн