Ермұрат!
Сенің жасың АЛПЫСҚА толатыныңды азуын айға білеп жүрген жігіттердің ешқайсысынан кем емес ақжарқын қарындасым Бақытгүлдің уәлі аузынан естігеніме алты күн болса да, әлі сене алмай жүрмін. Біріншіден, мен – алпысты анда-санда сағынып қоятынына жиырма төрт жыл болған пендемін. Сол себептен сенің 60-ты ерттеп мінгеніңе сенгім келмейді, неге, қайда асықтың екен, елудің ауылында 10-15 жыл неге жүре тұрмадың екен, – әлі менше сағынасың ғой?!.
Екіншіден, кешегі Кеңес дәуірінде мөлшермен он сөз ақиқаттың арасында екі-үш сөз ғана өтірік жүруші еді, ал сол дәуірден ат-тонымызды ала қашып, алақайлай бастағалы жиырма сегіз жыл десек, өз басым осы мерзімде он сөз өтіріктің арасынан бір сөз ақиқатты әрең көріп жүрмін. Ертеңді-кеш еститінім, оқитыным:
Қазақстан тәуелсіздікке табанды күреспен жетті; демократия жолына бірден түсті; адам құқын қадірлеуді бірден қолға алды; экономикасын гүлдендіруге бірден кірісті; ауыл шаруашылығын ғажап реформалады; ғылым-білімнің өрісін кеңейтті; сайлауды әділ өткізуді жүзеге асырды; сөз бостандығы мен ой еркіндігін қамтамасыз етті; жер бетіндегі ең бай отыз елдің қатарына ұмтылды. Иә, Нобель сыйлығының болашақ иесі, Елбасы Н.Назарбаевтың данышпандық басшылығы арқасында! Бүгін Қазақстанға бүкіл дүние жүзі қызыға көз тігіп, жан-жақты өркендеу тәсілімізді зерттеп, құлшына үлгі-өнеге алуда және Нұрсұлтан Әбішұлы Назарбаевты ғасыр саясаткері деп мойындауда; біздің президент кешегі қазақ Абылай ханмен, түрік Ататүрікпен, ағылшын Вашингтонмен терезесі тең тарихи тұлға!..
Бетіне бірден пәрәнжә киген биліктің, оның шабарманына айналған бұқаралық ақпарат құралдарының айтатындары – осы. Бетпақ биліктің азаншысы, қолшоқпары, езуінжалары болып алған, ат-атақтарынан жер үстіндегі жылқы тұрғай, судағы итбалық үркетін сарай ақын-жазушыларының жыры – осы. Бүгінгі бір жазушы депутат оны «2-Нұх пайғамбар!» деп, тағы бір ақын «Мұхаммед пайғамбардың бейнесі!» деп жазып, Күн мен Айды бағыттарынан адастыра жаздады. Пой-пой-ой!..
Ал өмірімізде бәрі де – керісінше! Міне, осындай тірліктен кейін, Ермұрат-ау, жасың алпысқа келгеніне қалай ғана сене алайын?!. Алайда сенейін, себебі көзі тірі тарихи тұлғалар: саясаттың сақасы Серікболсын Әбділдин, экономиканың ғұламасы Әкежан Қажыгелдин, ақиқаттың ақ семсері Ғалымжан Жақиянов сынды ардақты інілерім бастап, басқа шыншыл шырайлы іні-қарындастарым да қостап, сенің 60 жастағы ержүрек қаламгер екеніңді айтты, жазды.
Әлбетте, сенің КІМ екеніңді ешкімнің мағлұматынсыз-ақ баяғыдан білемін. Ендеше: құдай қосымша қуат беріп, енді бір қырық жаса және келін екеуің бала-немере-шөберелердің тек қызығын көріп, дос-жолдастарыңның ортасында жақсы жаса! Бұл – өзімнің де, Отбасымның да тілегі.
Ғаббас ҚАБЫШҰЛЫ
