Бүгін – сәуірдің 16-күні біздің газеттің бірінші саны шыққанына 17 жыл толды. Кибернетикалық шапшаңдықпен зымыраған қазіргі заманда бұл 17 жыл аз ба, көп пе – оны ойлы оқырманның өз көңілі біледі. Біздікі – уақытпен емес, сол оқырманның сұранысымен санасудың апта сайын арпалысқан шаруасы ғана.
Осы жылдар аралығында біз не көрмедік?
Оны да біз емес, оқырман айтсын: «Анау жылы өздеріңізге бірнеше рет шабуыл жасап, газет журналистерін соққыға жығып, соттап, редакцияны тып-типыл тонап, тіпті автокөліктеріңіздің астына жарылғыш зат қойып кеткенін білеміз, әйтеуір аман қалғандарыңызға қуандық…» деген екен осы күнге арнап, Шығыс Қазақстан облысының Ұлан ауданынан (Тарғын ауылы) хат жазған газет жанашыры Арғынбек Кәріпов.
Міне, осы бір сөйлеммен бәрі айтылған. Рахмет!
«ДАТ»-қа ниеттес мыңдап саналатын оқырман қауымын – газеттің әр санын күткен, біздің амандығымызды тілеген ағайынға мың мәрте алғыс айтамыз! Баршаңызды «ДАТ»-тың туған күнімен құттықтаймыз!
Редакция
Бұл екі арада
180 ЕЛДІҢ ІШІНДЕ
160-орында тұрмыз
Қазақстан баспасөз бостандығы индексінде 2014 жылмен салыстырғанда 1 орынға алға жылжып, 180 елдің ішінде 160-орын алды, деп хабарлады халықаралық «Репортерлер шекарасыз» ұйымы.
Ұйым мәліметтерінше, 2014 жылы Қазақстан 180 орынның ішінде 161-орында, 2013 және 2012 жылдары, сәйкесінше, 178 орынның ішінде 160-орын алған.
Биыл Қазақстанға қарағанда келесі елдердің индекстегі позициялары төмендеу: Әзербайжан – 162-орын, Өзбекстан – 166 және Түркіменстан – 178, Беларусь – 157-орында, Ресей – 152, Украина – 129, Тәжікстан – 116, Қырғызстан – 88-орында, Армения – 78, Молдова – 72, Грузия – 69-орында, Литва – 31, Латвия – 28, ал Эстония индекстегі алғашқы ондықта.
Бірінші үш орын Финляндия, Норвегия мен Данияға бұйырды, ал соңғы үш орын, сәйкесінше, Түркменстан, Солтүстік Корея мен Эритреяға бұйырды.
ҚазТАГ
