Сочи қаласында өткен «Жаңа толқын-2015» байқауында қазақстандық жас әнші Әдемі екінші орын алып келгені – бүгінде жалпақ жұртқа мәлім жәйт. Мәлімсізі – байқау барысында ресейлік танымал әнші Ирина Дубцова бәйгеде бақ сынаған таланттар арасынан неге Әдеміні ғана таңдап алғаны.
Біріншіден, Ресейде біздегі сияқты компьютердің көмегімен «фанера» әнші болу мүмкін емес. Ал дауылпаз Дубцова өзінің дауысын, ән өнеріне таласы бар талант екенін комптың көмегімен емес, әйгілі примадонна Алла Пугачеваның алдында дәлелдеген әнші.
Міне, сол Ирина ханым көптің ішінен Әдеміні әлдіге балауы – талантты тани білу деген сөз. Ирина Дубцова Әдемімен бірге дуэт орындаған соң: «Мен бұған дейін мұндай сыңғыры сырлы дауысты естімеген едім», – деген екен.
«Жаңа толқын» байқауында алған екінші орнынан кейін Әдеміге шетелдерден ұсыныстар көптеп түсіп жатыр. Бұл туралы «Nur.kz» порталына әншінің жетекшісі Ринат Гайсин: «Әдемінің өнеріне тәнті болып, ағылшын тілінде бірлесіп ән жазайық деген ұсыныс түсті. Қазір бұл мәселелерді ойластырып жатырмыз», – дейді.
