Қазақ жерінде болған 1916 жылғы ұлт-азаттық көтерілісіне биыл 100 жыл толады. Патша өкіметінің 25 маусымдағы «Бұратана халықты мемлекеттік қорғаныс жұмыстарына пайдалану тәртібі туралы» Жарлығына сәйкес Түркістан мен Дала өлкесінен Герман майданына окоп қазуға 400 мың, соның ішінде Қазақстанның далалық облыстарынан – 100 мыңнан астам, Жетісудан – 87 мың адам жіберу көзделді.
Жетісу мен Торғай даласында бұрқ еткен көтеріліс патша режиміне қарсылық білдіріп, оған бағынудан бас тартты. Торғайда Әбдіғапарды хан көтеру оқиғасы азаттық сүйген қазақ халқының дербес өмір сүруге ұмтылысын көрсетті. Ұлт-азаттық жолындағы күрес 1917 жылы Ақпан төңкерісіне, ол Қазақ төңкерілісіне жалғасты. Алашорда қайраткерлерінің тынымсыз күресі кейін Қазақ Республикасының негізі болған Қазақ автономиясының құрылуына жеткізді. Яғни, бүгінгі Тәуелсіз Қазақстан – сол Ұлт-азаттық күресінің жемісі.
Сол сахарадағы Ұлт-азаттық көтерілісі басталған күнге дейін 100 күн ғана қалды. Бірақ Қазақстан үкіметінен осы даңқты датаға байланысты әлі күнге бір құжат жарық көрмеді. Үкімет қаулысын күткенімізге бір жыл болды. Өткен жылы нешетүрлі 20 жылдықтарды ресми тойладық. Сонда Ұлт-азаттық күресінің 100 жылдығы ҚХА-ның 20 жылдығы құрлы болмағаны ма?! Өз тарихына немқұрайды қарау ҰЯТ емес пе?! «Ұлт-азаттық көтеріліс» деген сөзден шошымай, даңқты датаны лайықты атап өтелік!
«Сен өткеніңе топырақ шашсаң, келешек саған тас атады» деген, осыны ұмытпайық ағайын!
Марат Тоқашбаевтың
«Фейсбук» парақшасынан