Өткен аптаның жұмасы күні Алматыдағы «Астана» қонақ үйінде Желтоқсан көтерілісінің құрбандары мен Жаңаөзен қырғыны кезінде қаза болғандарға ас беріліп, Құран оқылды.
Бұл шараны белгілі қоғам белсенділері Мұхтар Тайжан, Батырғали Әміреев және Рысбек Сәрсенбайұлы бастаған бірқатар ұлтшыл азаматтар ұйымдастырғанын атап айтқан жөн. Ас барысында Құран оқылып, Жаңаөзенде қаза болған құрбандардың тізімі оқылды. Екі Желтоқсанның құрбандарына тағзым ретінде бір минуттық үнсіздік жарияланды.
Маңғыстаудан ат арытып жеткен азаматтар бұл иманды шараға жергілікті халық атынан өз ризашылықтарын білдірді. Жаңаөзен қырғыны сияқты, биліктің өз халқына қарсы оқ атқан қасіреті мұнан былай орын алмасын деген ойларын ортаға салды.
Қазақтың біраз зиялыларының басын қосқан бұл аста бата-тілектен өзге сын да айтылды. Белгілі жазушы Қабдеш Жұмаділов ағамыз: «Желтоқсан көтерілісінің құрбандарын – Желтоқсан құрбандары делік, ал мына Жаңаөзендегі қырғында қаза болғандар мен Алтынбаек Сәрсенбаев, Заманбек Нұрқаділов сияқты жеке тұлғалардың қазасын ненің, кімнің құрбандары деп тарихқа енгіземіз?! Бізден кейінгі ұрпақ, міне, осы туралы ойлана жүргені, мұны зерттей жүргені дұрыс болар еді», – деді.
Ас барысында Болатхан Тайжан атындағы қордың қолдауымен басып шығарылған «Адайлар тарихы» кітабының тұсаукесері болып, ол жиналған халыққа таратылды.
