«Общественная позиция»
(проект «DAT» №02 (273) от 15 января 2015 г.
Ойдан-қырдан
Бәрекелді!
Белгілі әнші, актриса және тележүргізуші Мөлдір Әуелбекова әнші Индира Елеместің продюсері атанды. Әуелі Әуелбекова бұл идеяның авторы әнші Нұрлан Еспанов екенін айрықша атап өткен болатын.
Әнші сонымен қатар осы қадамға бармас бұрын көп ойланғанын, ол қызды бұдан бұрын да біраз уақыт сынап көргенін жасырмады. Есесіне, өнер айдынында қанаттанып, өз карьерасын жаңа бастаған Индира Елемес бүгінде біраз концерттерге қатысып, жеке қоржынына бір су жаңа бейнебаян сүңгітіп үлгеріпті.
Мөлдірдің мүмкіндігі – өзінің мүмкіндігі деп білетін жас әнші Индира да: «Мөлдір бұл саланы жақсы біледі. Сондықтан бірлескен жұмыс өз нәтижесін беретініне сенемін», – деген еді. Бәлкім, жас әншінің сенімі алдамағанынан болар, енді ақпан айында шетелде алғашқы бірлескен бейнебаян түсірілмек.
Не десек те, кезінде «Кеш Ю» тобында жүріп, кейіннен жеке-дара ән салып та тыңдарманының құлақ құрышын қандырып, ыстық ықыласына бөленген Мөлдірдің өнерден тіккен өз отауына баяндылық тілейміз!
Осындайда «баяндылық» деп Баянды еске саламыз-ау? Есентаеваны өзіне продюсер ете жүріп, Әуелбекованың да ептеп үйренгені бар деп білдік. Ал былайғы жұлдыз баққан жұрт үшін ендігі тап-тамаша әңгіме де ерте шыққан құлақтан кейін шыққан мүйіздің озатын-озбайтындығында болса керек?
