Общественная позиция»
(проект «DAT» №02 (273) от 15 января 2015 г.
Кім айтады?
Танымал кинорежиссер Ақан Сатаев «Хакер» киносының жарнамасын жариялады. Режиссер кезекті бұл еңбегі жайлы дереккөзді өзінің Facebook әлеуметтік желісіндегі парақшасында бөліскен болатын.
Дереккөзге негізделгенде, жаңа туындының жақын арада көрсетілімге шығатыны белгілі болды. Әсілінде, «Сатайфильм» кинокомпаниясы канадалық «Know Rules Media» кинокомпаниясымен бірлесіп, «Хакер» киножобасын бастаған еді. Нақтырақ айтқанда, түсірілім жұмыстары осыдан екі жыл бұрын қолға алынған.
Фильм сценарийін Тимур Жақсылықов пен жас кинематографшы Санжар Сұлтанов жазған. Аталмыш киноның негізгі сюжетінде несие картасын жымысқы жолмен бұзып, оңай олжамен күн көретін хакердің шынайы өмірі баяндалған. Канадалық «Know Rules Media» кинокомпаниясымен бірлесе алып барылған түсірілімнің барысы Нью-Йорк, Торонто, Бангкок секілді ірі қалаларда қамтыған.
Естеріңізге сала кетсек, кинорежиссер Ақан Сатаев осыған дейін «Рекэтир», «Жаужүрек мың бала», «Ликвидатор», «Адасқандар» атты кинофильмдер түсіріп, отандық кинематографияда өз қолтаңбасын қалдырумен қатар, ең табысты режиссердің қатарына көтерілген еді.
Оның үстіне «Хакер» драмалық триллері Ақан Сатаевтың алғашқы батыстық жобасы көрінеді. Батыстық демекші, осы түсірілімнен соң режиссердің өз кәсібінде сол жақтың біраз тәжірибесін жүзеге асыруы мүмкін болып отыр.
Мысалы, ол жақта: «Актер 12 сағаттан көп жұмыс жасамауы керек. Ал режиссер эпизодта ойнайтын актерлермен сөйлеспеуі, әрі кеңес бермеуі тиіс екен. Барлық емле тек көмекшілері арқылы іске асады. Тағы бір қызығы – түскі ас уақыты қатаң реттелген және үзіліс кезінде ешкім жұмыс жайлы әңгімелеспейді, тіпті тыйым салынған», – дейді Ақан Сатаев.
Мұндайда Сатаев мырза қайдағы бір канадалық компанияның кинофильмдегі жұмыс тобына салған тыйымын қайдам, туындыдан тапқан тиынын айтса, елге сол көп қызық болар ма еді, кім білсін?
Ал бүгінгі отандық телеөнімде тақырыпқа қоятын биліктің тыйымы тіптен Ақандар айтпас бітеу әңгіме болса керек…
